Адыгеим щыпсэоу нэбгырэ мин 17-м ехъумэ хэкIыр зэрэдащырэм ыпкIэ зыпарэкIи атыгъэп. ЧIыфэу ахэм ателъыр зэкIэмкIи миллиони 130-рэ фэдиз мэхъу.

— Шъолъыр операторым зэтемызэу ыкIи къэ­мыуцоу Iоф зэришIэщтыр цIыфхэм пы­дзафэхэм ядэщын ыпкIэ къызэратырэм бэкIэ епхыгъ. ЧIыфэ зытелъхэм ар къызэраIытхыжьыщтым тегъэ­псыхьэгъэ IофшIэнхэр Iоныгъо мазэм дгъэлъэшыгъэх. Охътэ благъэм ахэр къатыжьынхэр шIокI зимыIэ Iофэу зэрэщытыр къызщиIорэ тхыгъэхэр зэкIэми афэдгъэхьыгъэх. Ахэм яшIуагъэ къэмыкIомэ хьыкумым зыфэдгъэзэщт. Джащыгъум хэкIым ыуасэ имызакъоу, «пенеу» техъуагъэри, хьыкумым тедгъэкIодагъэри къатыжьын фаеу хъущт, — къыIуагъ «ЭкоЦентрэм» и Адыгэ шъо­лъыр къутамэ ипащэу Алыбэрд Налбый.

УФ-м ипсэупIэ Кодекс къызэрэщиIорэмкIэ, пыдзэфэ пы­тэхэр зэрэIуащыхэрэм ыпкIэ мазэм иапэрэ мэфипшI шIомыкIэу зэкIэми атын фае. Игъом ыкIи комиссие темыхъуагъэу компанием икассэхэм ащыптын плъэкIыщт. Мары яадресхэр: къалэу Мыекъуапэ, урамэу Пионерскэр, 297-рэ, Тэхъутэмыкъое районымкIэ поселкэу Яблоновскэр, урамэу Школьнэр, 10/1. Джащ фэдэу «Сбербанк-онлайн» зыфиIорэ приложениер е «Сбербанкым» ибан­коматхэр, итерминалхэр бгъэфедэхэми хъущт.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.