Адыгэ къэралыгъо университетым «День первооткрывателя» зыфиIорэ Iофтхьабзэр бэмышIэу щыкIуагъ.

Урысые фестивалэу «Наука 0+» зыцIэм къыдыхэлъытагъэу ар зэхащагъ ыкIи кIэлэеджэкIо, студент 200 фэдиз хэлэжьагъ. Тематическэ площадкэ 20 фэдиз ахэм афызэхащагъ. «День первооткрывателя» зыфиIорэм мастер-классхэр, квестхэр, викторинэхэр, экскурсиехэр щызэхащагъэх. Нэбгырэ пэпчъ ушэтакIоу зилъытэжьын, зипроектхэр щыIэныгъэм щыпхырызыщырэ шIэныгъэлэжь ныбжьыкIэхэм нэIуасэ афэхъун амал иIагъ. Мыщ фэдэ гъэпсыкIэм тетэу Iофтхьабзэр апэрэ, Адыгэ къэралыгъо уни­верситетым истудент шIэныгъэ обществэ игукъэкIыкIэ ар зэхащагъ. Ушэтын IофшIэным ныбжьыкIэхэр нахь фэщэгъэнхэр, гъэсэныгъэм иучрежде­ниехэм зэпхыныгъэ адыряIэу адэлэжьэнхэр ары пшъэрылъ шъхьаIэу зэхэщакIохэм зыфагъэуцужьырэр.

— Университетым ушэты­нымкIэ амалэу иIэхэм нэIуасэ афэт­шIынхэм, тиIофшIэн ашIогъэшIэгъоныным, ащ къыхэлэ­жьэнхэм фэшI мы Iофтхьабзэр зыкIызэхэтщагъэр, — еIо ушэтынхэмкIэ департаментым ипа­щэу Елена Куква.

Лъэныкъо зэфэшъхьафхэу ушэтынхэр зыщыпшIын плъэ­кIыщтхэри къыIуагъ: студент научнэ обществэр, социальнэ проектированиемкIэ еджапIэр, шIэныгъэ лабораториехэм Iоф ащыпшIэныр, студент шIэныгъэ-ушэтын коллективхэр, «Сириус. Лето: начни свой проект» зыфиIорэ программэр.

«День первооткрывателя» зыфиIорэ Iофтхьабзэр гъэшIэгъонэу кIуагъэ. ШIэныгъэ-гъэ­сэныгъэ кластер пэпчъ лъэныкъо зэфэшъхьафхэмкIэ площадкэхэр къагъэхьазырыгъагъэх. 3D-печатымкIэ ыкIи араб каллиграфиемкIэ мастер-классхэм ахэлэжьэнхэ, уашъом ит жъуагъохэр алъэгъун, археологическэ музеим икъэгъэлъэгъонхэм яплъын амал яIагъ, джащ фэдэу криминалистхэм бзэджэшIагъэ­хэр зэрагъэунэфырэ пкъыгъохэр ыкIи нэмыкIхэр алъэгъугъэх. Урысые фестивалым къы­дыхэлъытагъэу университетым джыри геолого-минералогическэ музеим изал къыщызэIуахыщт, шIэныгъэм икино и Мафэ ыкIи нэмыкIхэр зэхащэщтых.

Урысые фестивалэу «Наука 0+» зыфиIорэр анахь проект инхэм ащыщ. Илъэс къэс чъэпыогъум къыщегъэжьагъэу шэ­кIогъум нэс шъолъыр 80-мэ ар ащызэхащэ. 2022-рэ илъэсым фестивалым «Создавая будущее» темэу иIагъэр.

Адыгэ къэралыгъо университетым ипресс-къулыкъу.