Адыгеим и ЛIышъхьэу КъумпIыл Мурат тхьамэтагъор дызэрихьэзэ къолъхьэ тын-Iыхыным пэшIуекIорэ Комиссием изэхэсыгъо кIуагъэ.

Анахьэу анаIэ зытырагъэтыгъэр къэралыгъо ыкIи муниципальнэ къулыкъушIэхэм къолъхьэ тын-Iыхыным епхыгъэ хэ­бзэгъэуцугъэу щыIэм ишапхъэ­хэр зэрагъэцакIэхэрэр, къэралыгъом ифэныкъоныгъэхэм апае товархэр къащэфхэ зыхъукIэ а шапхъэхэр икъоу къыдалъы­тэнхэр ары.

Мы IофыгъомкIэ игъэкIотыгъэ псалъэ къышIыгъ Адыгэ Республикэм и ЛIышъхьэ и ГъэIорышIапIэу къолъхьэ тын-­Iыхыным ыкIи нэмыкI хэбзэу­къоныгъэхэм апэшIуекIогъэным фэгъэзагъэм ипащэу Алексей Селезневым. Ащ къызэрэхи­гъэщыгъэмкIэ, хэбзэгъэуцугъэу джырэкIэ кIуачIэ зиIэр зэхя­гъэшIыкIыгъэнымкIэ IофшIэн гъэнэфагъэ ГъэIорышIапIэм ре­нэу зэшIуехы, джащ фэдэу IэнатIэ зыIыгъхэм яшIэныгъэхэм а лъэныкъомкIэ джыри нахь ахагъэхъоным пае Iофтхьэбзэ зэфэшъхьафхэр зэрахьэх. 2022-рэ илъэсым пыкIыгъэ мэзи 9-м зэхащэгъэ уплъэкIунхэм нафэ къызэрашIыгъэмкIэ, хахъоу яIэ­хэм афэгъэхьыгъэ къэбар ­имыкъу гъогогъу 54-рэ аIэкIагъэхьагъэу къыхагъэщыгъ, IофшIапIэхэм ащылажьэхэрэм къахэтэджэрэ зэгурымыIоныгъэ-зэпэуцужьыныгъэхэм япхыгъэ шапхъэхэр гъогогъуи 2-рэ амыгъэцэкIагъэу къыхагъэщыгъ. А щыкIагъэхэр дэгъэзыжьыгъэнхэмкIэ Iофтхьэбзэ гъэнэфагъэ­хэр зэрахьагъэх.

«Декларационнэ кампаниехэм атегъэпсыхьагъэу илъэс къэс уплъэкIунэу зэхатщэхэрэм нахь зятэгъэушъомбгъу ыкIи ахэм япчъагъэ нахьыбэ тэшIы. Ха­хъохэм афэгъэхьыгъэ къэбарым иугъоин нахь тэрэзэу екIолIэнхэу зэкIэми сялъэIу, документхэр агъэхьазырхэ зыхъукIэ хэукъоныгъэхэр хэмыхъухьанхэм анаIэ икъоу тырагъэтын фае», — къыIуагъ Адыгеим и ЛIышъхьэ.

Къалэу Мыекъуапэрэ Адыгэ­къалэрэ япащэхэм къаIотагъ муниципалитетхэм къолъхьэ тын­-Iыхыным ыкIи нэмыкI хэ­бзэукъоныгъэхэм апэшIуекIорэ Iофтхьабзэхэу зэшIуахыхэрэм афэгъэхьыгъэу.

Муниципальнэ гъэIорышIапIэхэм ыкIи чIыпIэ зыгъэIорышIэжьыным инэмыкI къулыкъухэм къэралыгъом ифэны­къоныгъэхэм атегъэпсыхьэгъэ товархэр къащэфхэ зыхъукIэ къолъхьэ тын-Iыхыным пэшIуе­кIогъэнымкIэ уплъэкIун Iофтхьа­бзэхэр зезыхьэрэ ыкIи хэ­бзэухъумэкIо къулыкъухэм къа­Iуагъэхэм нэужым ядэIугъэх. ФАС-м Адыгэ РеспубликэмкIэ и ГъэIорышIапIэ ипащэ игуадзэу ЖэнэлI Аслъан къызэриIуа­гъэмкIэ, тхьаусыхэ тхылъ 25-­мэ 2022-рэ илъэсым ГъэIорышIапIэр ахэплъагъ, джащ фэдэу къафэгъэзэгъэ учреждениехэм алъэныкъокIэ къаIэкIэхьэгъэ тхылъхэм Iоф адашIагъ. ЗэрагъэунэфыгъэмкIэ, тхьаусыхэ 16-р Iофым изытет тефэу щытых. Хэу­къоныгъэхэр дагъэзыжьынхэу учреждении 7-мэ афагъэпытагъ. Зэхэубытагъэу къэпIон хъумэ, хэукъоныгъэхэм анахьыбэр зэпхыгъэр заявкэхэм ягъэхьазырынрэ пIалъэхэр укъуа­гъэ зэрэхъугъэхэмрэ ары.

Адыгэ Республикэм и ЛIы­шъхьэу КъумпIыл Мурат Адыгэ Республикэм товархэм якъэ­щэфынкIэ икомитет пшъэрылъ фи­шIыгъ ФАС-м иопыт къы­п­къырыкIыхэзэ муниципальнэ къулыкъушIэхэр егъэджэгъэнхэм ипрограммэ зэхигъэуцонэу. ТапэкIэ хашIыхьэгъэ хэукъоныгъэхэм афэдэхэр амышIыжьынхэмкIэ ащ шIогъэ гъэнэфагъэ иIэу щыт.

ЗытегущыIэгъэхэ Iофыгъохэм якIэуххэр зэфихьысыжьхэзэ республикэм и ЛIышъхьэ къыхигъэщыгъ къолъхьэ тын-Iыхыным пэуцужьыгъэнымкIэ ве­домствэхэм язэдэлэжьэныгъэ агъэлъэшыным мэхьанэшхо зэ­риIэр ыкIи а IофшIэным хэ­бзэухъумэкIо, уплъэкIун Iофхэм афэгъэзэгъэ къулыкъухэр къы­хэгъэлэжьэгъэнхэу.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тыри­хыгъэх.