Адыгеим мобилизацием къыхиубытагъэхэм IэпыIэгъу ятыгъэным фытегъэпсыхьэгъэ IофшIэныр щылъагъэкIуатэ.

Адыгэ Республикэм и ЛIышъхьэ къы­зэриIуагъэмкIэ, тхьамафэу блэкIыгъэм дащыгъэхэм янахьыбэм республикэм щагъэнэфэгъэ сомэ мини 100 зырызыр аратыгъ. Къэнагъэхэм мы лъэхъэнэ благъэхэм ахъщэр аIэкIагъэхьащт. Ахэм къахимыубытэхэрэр нэбгыри 6 мэхъух, документхэм япхыгъэ Iофыгъохэм ар къахэкIыгъэу щыт.

— Нэбгырэ пэпчъ зырызэу Iоф дэтшIэщт, пэрыохъуныгъэхэр зэкIэ щыдгъэзыещтых, цIыфхэм аIэкIэхьан фэе ахъщэр яттыщт. Джащ фэдэу мобилизацием къыхиубытагъэхэм яунагъохэм IэпыIэгъу тедзэ аратынэу пшъэрылъ афэс­шIыгъ. ЕджапIэм джыри мыкIорэ кIэлэцIыкIухэр зыща­­­Iы­гъ­хэм ны-тыхэм ахъщэ аратыщтэп, кIэлэеджакIохэри ыпкIэ хэмылъэу агъэшхэщтых, — къы­Iуагъ АР-м и ЛIышъхьэу КъумпIыл Мурат.

Мобилизацием къыхиубытагъэхэм ыкIи ахэм яунагъохэм яIофыгъохэм язэшIохын муниципалитетхэм япащэхэр афагъэзагъэх, джащ фэдэу дащыгъэхэм ялъэIу тхылъхэм псынкIэу ахэплъэнхэу пшъэрылъ афашIыгъ.

Частичнэ мобилизацием епхыгъэ упчIэу къэуцухэрэм яджэуапхэр номерэу 122-м шъутеомэ къышъуатыщтых, телеграм-каналым, «Однокласникхэм», «Адыгея — частичная мобилизация» зыфиIохэрэм зафэжъугъэзэн шъулъэ­кIыщт. Джащ фэдэу телеграмымкIэ инфоботыр атIупщыгъ.