Культурэм икIэнхэм тафэсакъын фае
Адыгэ Республикэм ит псэуалъэхэу федеральнэ мэхьанэ зиIэ культурнэ кIэным къыхиубытэхэрэм ащыщэу чIыпIи 6 Кадастрэ палатэм 2022-рэ илъэсым Iоныгъом амыгъэкощырэ мылъкумкIэ Къэралыгъо реестрэ зыкIым хигъэхьагъ.
Культурнэ кIэным къыхиубытэрэ псэуалъэхэр зэрыт чIыпIэхэм ягъунапкъэхэм афэгъэхьыгъэ къэбарыр реестрэм зэритым ишIуагъэ къэкIощт хэбзэгъэуцугъэу щыIэр укъуагъэ мыхъунымкIэ, ащ дакIоу тарихъым исаугъэт итеплъэ нахь къызэтенэжьынымкIэ.
Культурнэ кIэным къыхиубытэрэ псэуалъэм игъунапкъэхэр зыухэсырэр а кIэным икъэухъумэнрэ игъэфедэнрэ афэгъэзэгъэ ГъэIорышIапIэр ары. ГущыIэм пае, мы илъэсым Iоныгъом Iошъхьэ къэхэлъи 6: «Зарево-7», «Зарево-12», «Зарево-9», «Зарево-8», «Зарево-11», «Зарево-10» зыфиIохэрэр реестрэм хагъэхьагъэх.
«ДжырэкIэ кIуачIэ зиIэ хэбзэгъэуцугъэм культурнэ кIэныр зыдэщыт чIыпIэм етIэнхэу, псэолъэшIын горэхэр ащызэшIуахынхэу, е зэрар ахэм языхын зылъэкIыщт IофшIэнхэр ащагъэцэкIэнхэу ыдэрэп. Къэралыгъо реестрэм кIэныр зэрэхэтым ишIуагъэ къэкIо ащ фэдэ зекIуакIэхэу хэбзэгъэуцугъэм пэшIуекIохэрэр зэрамыхьанхэмкIэ», — къыIуагъ Адыгэ Республикэм и Кадастрэ палатэ ипащэу ХъокIо Аюб.
Чъэпыогъум и 1-м ехъулIэу зэрагъэунэфыгъэмкIэ, кIэным къыхиубытэрэ чIыпIэ 25-рэ ыкIи псэолъи 108-рэ реестрэм хагъэхьагъ.
Росреестрэм исервисэу «Публичная кадастровая карта» зыфиIорэр къызфагъэфедэзэ чIыгу Iахьыр къагъэгъунэрэ шъолъырым къыхеубытэмэ агъэунэфын алъэкIыщт. МыщкIэ къызфагъэфедэн алъэкIыщтых МФЦ-м иофисхэр, Росреестрэм исайт.
Инвестиционнэ ыкIи предприниматель IофшIэныр агъэцакIэ зыхъукIэ хэмыукъонхэм пае Къэралыгъо реестрэр агъэфедэ.