ЗэIукIэгъум зыщатегущыIагъэхэр
АР-м и ЛIышъхьэу КъумпIыл Муратрэ ООО-у «Газпром межрегионгаз» зыфиIорэм игенеральнэ пащэ игуадзэу Юрий Пахомовскэмрэ республикэм и Правительствэ зычIэт унэм тыгъуасэ зэIукIэгъу щызэдыряIагъ.
Iофтхьабзэм хэлэжьагъэх АР-м и Премьер-министрэ ипшъэрылъхэр зыгъэцакIэу КIэрэщэ Анзаур, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевыр. АР-м экономикэ хэхъоныгъэмрэ сатыумрэкIэ иминистрэу Шэуджэн Заур, АР-м финансхэмкIэ иминистрэу Виктор Орловыр, ООО-у «Газпром межрегионгаз Майкоп» игенеральнэ пащэу Игорь Сырчиныр.
Урысые Федерацием и Президентэу Владимир Путиным социальнэ газификациемкIэ пшъэрылъэу къыгъэуцугъэхэм, газификациемкIэ программэр Адыгеим зэрэщыпхыращырэм, газым ыуасэ зэратырэм зэIукIэгъум щатегущыIагъэх.
КъумпIыл Мурат къызэрэхигъэщыгъэмкIэ, республикэм газ отраслэм мэхьанэшхо щыраты. ПАО-у «Газпромым» зэдэлэжьэныгъэ дэгъу зэрэдыриIэм ишIуагъэкIэ газификациемкIэ Адыгеим иIофхэр нахьышIу мэхъу зэпытых. ГущыIэм пае, джыдэдэм Адыгеим игазрыкIуапIэхэр километрэ мини 5 фэдиз мэхъух, газификациер республикэм процент 91,54-м щынагъэсыгъ. Илъэси 5-м телъытэгъэ программэм икIэуххэм атетэу процент 96-м ар нагъэсынэу рахъухьэ.
Джащ фэдэу республикэм и ЛIышъхьэ къызэрэхигъэщыгъэмкIэ, социальнэ газификациемкIэ программэм Адыгеим лъэшэу анаIэ щытырагъэты. ЦIыф куп заулэмэ газрыкIуапIэр яунэ къещэлIэгъэнымкIэ мылъкоу агъэкIодыгъэм щыщ афалъэгъужьы.
«Адыгеим иэкономикэ хэхъоныгъэ ешIы, псэуалъэу агъэпсырэр нахьыбэ мэхъу, инвестиционнэ площадкэхэр зэхащэх. Газотранспорт системэу джыдэдэм щыIэм республикэм ифэныкъоныгъэхэр зэкIэ ригъэкъужьышъухэрэп. Джащ епхыгъэу республикэм газификациер нахь щыдгъэпсынкIэн фае. Анахьэу тынаIэ зытедгъэтыщтхэр индустриальнэ паркымрэ зыгъэпсэфыпIэу «Лэгъонакъэ-рэ» яинфраструктурэ игъэпсын ары. Ахэм экономикэми, социальнэ лъэныкъоми хэхъоныгъэ арагъэшIыщт», — къыIуагъ Адыгеим и ЛIышъхьэ.
ПсэупIэхэу Прикубанскэм, Хьащтыку, Псэкъупсэ ягаз станциехэм ягъэкIэжьын 2024-рэ илъэсым ипэублэ нахь мыгужъоу фежьэнхэу республикэм «Газпромым» игъо зэрэфилъэгъугъэр КъумпIыл Мурат зэIукIэгъум хэлажьэхэрэм агу къыгъэкIыжьыгъ. Республикэм 2023-рэ илъэсым ыкIэ нэс газ станциехэу «Новый сад», «Индустриальный парк» зыфиIохэрэр агъэпсынхэм мэхьанэшхо ареты. А проектхэм джыдэдэм Iоф адашIэу аублагъ.
Юрий Пахомовскэм зэдэлэжьэныгъэ дэгъу къызэрадыриIэм Адыгеим и ЛIышъхьэ «тхьауегъэпсэу» риIуагъ. ПАО-у «Газпромым» иподразделениехэм республикэм ихэбзэ къулыкъухэм зэдэлэжьэныгъэ дэгъу зэрадыряIэри ащ хигъэунэфыкIыгъ.
«Илъэс къэс газэу республикэм щагъэфедэрэм хэхъо. Илъэсым къыкIоцI сомэ миллиарди 4,5-рэ фэдиз зыосэ газ республикэм къыIэкIэтэгъахьэ. ПАО-у «Газпромым» амал иI фэе пстэуми газыр аIэкIигъэхьанэу. ПсынкIэу ищыкIэгъэ инфраструктурэр гъэпсыгъэным мэхьанэшхо иI. ПАО-у «Газпромым» иправление итхьаматэу Алексей Миллер пшъэрылъ къызэрэтфигъэуцугъэм тетэу инвесторхэми, газыр аIэкIэдгъахьэ зышIоигъо пстэуми тишъыпкъэу тадэлэжьэщт», — къыIуагъ Юрий Пахомовскэм.
ООО-у «Газпром межрегионгаз» зыфиIорэм игенеральнэ пащэ игуадзэ зэрэхигъэунэфыкIыгъэмкIэ, газ станциехэм ягъэкIэжьынкIэ ыкIи ягъэпсынкIэ Iофтхьабзэу рахъухьагъэхэр зэкIэ зэхащэщтых. Социальнэ газификациемкIэ пшъэрылъэу яIэхэри агъэцэкIэнхэ ямурад.
Газ уасэм итынкIэ чIыфэу къатенэгъагъэр къезыгъэIыхыгъэхэм Адыгейри ащыщ. ГазыпкIэр процент 88-мэ къатыжьыгъ. Фабэр аIэкIэзыгъэхьэрэ предприятиитIу джыдэдэм мыщкIэ ауж къинэрэр. Илъэсыбэ хъугъэу цIыфхэм газымкIэ уасэр дэгъоу къаты. Процент 95,4-м джыдэдэм ар нэсыгъ.
Адыгеим и ЛIышъхьэ зэIукIэгъум икIэух щыхигъэунэфыкIыгъ газыр аIэкIэгъэхьэгъэнымкIэ Iофтхьабзэу республикэм щырахъухьагъэхэм мэхьанэшхо зэриIэр, «Газпромым» зэдэлэжьэныгъэу дыриIэр ыгъэпытэным зэрэфэхьазырыр.
Шъугу къэтэгъэкIыжьы КъумпIыл Муратрэ Алексей Миллеррэ Адыгэ Республикэм газификациемкIэ ипрограммэу 2021 — 2025-р илъэсхэм ателъытагъэм зэрэкIэтхагъэхэр, сомэ миллиарди 3-м ехъурэ инвестициехэр ащ зэрэпэIухьащтхэр. 2025-рэ илъэсым нэс мы программэм диштэу Iофтхьэбзэ 24-рэ зэхащэнэу рахъухьэ.
АР-м и ЛIышъхьэ ипресс-къулыкъу
Сурэтыр А. Гусевым тырихыгъ.