Адыгэ къэралыгъо университетым социальнэ технологие­хэмрэ зекIонымрэкIэ ифакультетрэ Мыекъопэ техноло­гич­ескэ университетым экономикэмрэ гъэIорышIэнымрэкIэ ифакультетрэ ащеджэрэ студентхэр ары тапэкIэ Адыгеим зекIон хъызмэтым зыщегъэушъомбгъугъэным дэлэ­жьэщтхэр.

Ахэр ары зекIон индустрием хэхьэрэ шъолъыр класстерхэм профессионал ащыхъущтхэр, рекреационнэ, экологическэ зекIонхэр лъызыгъэкIо­тэщтхэр. А Iофыгъохэр къыдалъыти, зекIоным и Дунэе мафэ Кавказ био­сфернэ заповедникым иIо­фышIэхэм студентхэм заIуагъэкIагъ.

ЭкологиемкIэ шIэны­гъэхэр цIыфхэм ягъэгъотыгъэнымкIэ заповед­ни­кым иметодистэу Валентина Куцей хабзэм къыгъэгъунэрэ чIыопсхэм зе­­кIоныр зэращызэхащэ­хэрэр, псэушъхьэу хэсхэм япчъагъэ зызэрэзэбли­хъурэр, тапэкIэ зыгъэпсэфакIо къакIохэрэм япчъа­гъэ хагъэхъоным зэрэ­дэлажьэхэрэр студентхэм къафиIотагъ.

НыбжьыкIэхэри зэдэгущыIэгъум чанэу къыхэлэ­жьагъэх. Ахэм къагъэхьазырыгъэ къэбархэм зекIоным хэхъоныгъэ егъэшIыгъэным пае ежьхэм къыхахырэ шIыкIэхэм ягугъу къащашIыгъ.

Заповедникым иIофы­шIэ студентхэм агуригъэ­Iуагъ еджэфэхэкIэ ахэр волонтерхэм ахэхьанхэ, за­поведникым щырагъэ­кIокIырэ Iофтхьабзэхэм ахэлэжьэнхэ, проект зэфэшъхьафхэм ягъэцэкIэнкIэ IэпыIэгъу афэхъунхэ зэра­лъэкIыщтыр. Джащ фэдэу заповедникым практикэр щахьымэ, мэзхэмкIэ плъа­кIохэу щылажьэхэмэ, ахэм яIэпэIэсэныгъи хэхъощт.

Шъаукъо Аслъангуащ.