Къэлэ зыгъэпсэфыпIэ паркыр къэмышIэжьынэу аужырэ мазэхэм зэхъокIы: Шъхьэгуащэ инэпкъхэр агъэпытагъэх, паркым къыхиубытэрэ шъолъырэу псыхъом пэблагъэр агъэкIэрэкIагъ, цIыфхэм къызщакIухьэрэ лъэс гъогухэр агъэкIэжьых, чэщ остыгъэхэр зэблахъух…

Паркым жьы къабзэ къыщызыщэнэу мафэ къэс къакIохэрэми, къэлэдэс­хэм ащыщхэми къэлэ бас­­сейным къырыкIощтыр ашIэ ашIоигъоу зэупчIы­жьых. Псы фабэу бассейным итыщтыгъэу зызщагъэпскIыщтыгъэм фэзэ­щыгъэх. Джащ фэдэу зы­гъэпсэфыпIэу «Мэз­дахэ» игъэпсын зыфежьэщтхэри ашIэ ашIоигъу.

Ахэми, нэмыкI упчIэхэми яджэуапхэр игъэкIо­тыгъэу къыщитыжьыгъэх Адыгэ Республикэм псэо­лъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ иминистрэ игуа­дзэу Лев Каракян шъо­лъыр гъэIорышIэнымкIэ Гупчэм щыдашIыгъэ «зэ­дэгущыIэгъу занкIэм».

Ащ къызэриIуагъэмкIэ, цIыфыбэмэ къызэрашIошIыщтыгъэу, бассейныр Адыгеим къэралыгъо гъэ­псыкIэ зиIэр илъэси 100 зыщыхъурэм тефэу агъэ­кIэжьынэу щытыгъэп. Мы лъэхъаным къэлэ паркым щагъэпсыжьыщтхэ бас­сейнхэу кIэлэцIыкIухэм апае ыкIи нахьыжъхэм зызщагъэпсэфыщтхэм ягъэпсын тефэщт сметэр зэхагъэуцо. Нэужым Iоф­шIэнхэм апэIухьащт ахъщэр къызхагъэкIыщтым ыкIи бассейнхэм ягъэкIэ­жьын зырагъэжьэщтым тегущыIэщтых. Л. Каракян къызэриIуагъэмкIэ, къэлэ бассейным игъэкIэжьын къихьащт илъэсым рагъэ­жьэщт.

ЗыгъэпсэфыпIэу «Мэз­дахэ» загъэпсыщтым фэгъэхьыгъэу Л. Каракян къы­Iуагъ къэлэ админист­рацием проект зэригъэ­хьазырырэр. Ар илъэсыр имыкIызэ республикэ ми­нистерствэм IэкIагъэ­хьащт, нэужым федеральнэ проектэу «Формиро­вание комфортной городской среды» зыфиIорэм хагъэхьаным фэшI агъэ­хьыщт. Проектыр зыпхырыкIыкIэ, зыгъэпсэфыпIэу «Мэздахэ» изэтегъэпсы­хьан рагъэжьэщт.

Ащ епхыгъэу Адыгэ Республикэм и ЛIышъхьэу КъумпIыл Мурат Фондэу «Дом. РФ» зыфиIорэм ипроектировщикхэм заIуи­гъэкIагъэу щыт.