Росгвардием ихэушъхьафыкIыгъэ кIуачIэхэр зызэхащэгъэ мафэр мэфэкI шIыкIэм тетэу хагъэунэфыкIыгъ.

Iофтхьабзэм хэлэжьагъэх ыкIи ямэфэкIкIэ къафэгушIуагъэх Росгвардием АР-мкIэ и ГъэIорышIапIэ ипащэу, полицием иполковникэу Иван Гричановыр, Адыгеим и ЛIышъхьэ ыкIи АР-м иминистрэхэм я Кабинет я Администрацие ипащэу Владимир Свеженец, АР-м ифедеральнэ инспектор шъхьа­Iэу Сергей Дрокиныр, щынэ­гъончъэнымкIэ Федеральнэ къулыкъум АдыгеимкIэ и ГъэIорышIапIэ ипащэу, полковникэу Михаил Кемеровыр, АР-м хэгъэгу кIоцI IофхэмкIэ иминистрэу, полицием иполковникэу Олег Безсмельницыныр, пшъэ­рылъэу иIэмкIэ гъу­нэпкъэ гъэ­нэфагъэ зиIэ обществэу «ЧОП Альфа-С» зыфи­Iо­рэм ипащэу Олег Сергиенкэр.

Терроризмэм пэшIуекIогъэныр, общественнэ рэхьатны­гъэм, щынэгъончъагъэм алъыплъэгъэныр, бзэджашIэхэр къау­бытынхэр ары УФ-м и Росгвардие икъулыкъушIэхэм япшъэрылъ шъхьаIэр. Ащ нэмыкI Iофтхьэбзэ къинхэми афэгъэзагъэх.

Мы илъэсым подразделениер ипшъэрылъхэм къахиубытэрэ Iофыгъо 70-мэ язэшIохын хэлэжьагъ.

Япшъэрылъ агъэцакIэзэ зидунай зыхъожьыгъэхэм Iофтхьабзэм хэлэжьагъэхэр зы та­къикърэ афэшъыгъуагъэх.

ЗиIофшIэнкIэ анахь къахэ­щыгъэхэм щытхъу тхылъхэр, шIухьафтынхэр кIэухым афагъэ­шъошагъэх.