Адыгэ къэралыгъо университетыр урысые проектэу «Код будущего» зыфиIорэм хэлажьэ. Ащ къыдыхэлъытагъэу я 8 — 11-рэ классхэм ащеджэрэ кIэлэеджакIохэм программированиемкIэ илъэситIу курсхэр къафызэIуахыщтых.

Университетым щызэхащэщт базэм ишIуагъэкIэ программированиемкIэ шIэныгъэ дэгъухэр кIэлэеджакIохэм зэрагъэгъотын амал яIэщт, бизнес-приложениехэр, джэгукIэхэр ыкIи сайтхэр зэхагъэуцонхэ алъэкIыщт. Джащ фэдэу ОГЭ-м ыкIи ЕГЭ-м языфэгъэхьазырынкIэ ишIуагъэ къэкIощт, олимпиадэхэм ахэлэжьэщтых.

Лъэпкъ проектэу «Цифровая экономика» зыфиIорэм ифедеральнэ проектэу «Развитие кадрового потенциала IT-отрасли» зыцIэм къыдыхэлъытагъэу ар зэхащэ. ИкIыгъэ илъэсым къэралыгъом иIэпыIэгъу ишIуагъэкIэ кIэлэеджэкIо мини 10-м ехъу ыпкIэ хэмылъэу онлайн— курсхэм ахэлэжьагъэх. Пилотнэ проектыр ыпэрапшIэу Белгородскэ, Новгородскэ, Калужскэ, Тульскэ, Оренбургскэ, Нижегородскэ, Пензенскэ шъолъырхэм ыкIи Башкирием, Татарстан, Якутием ащырагъэжьэгъагъ. Мы илъэсым къыщыублагъэу хэгъэгу пстэуми ащагъэцакIэ.

Курсхэр чъэпыогъу мазэм рагъэжьагъэх. ИлъэситIурэ кIощт егъэджэныр плIэу зэтеутыгъэщт. КIэухым кIэлэеджакIохэм сертификатхэр аратыжьыщтых. Адыгэ къэралыгъо университетым ипресс-къулыкъу