Пыдзэфэ пытэхэм ядэщын фэгъэзэгъэ шъолъыр операторыр кIэщакIо зыфэхъугъэ зэнэкъокъоу «КIэлэцIыкIухэм къэбзэныгъэр къыхахы» зыфиIорэм икIэуххэр джырэблагъэ зэфахьысыжьыгъэх.

Ащ фэгъэхьыгъэ Iофтхьабзэр культурэм и Унэу «Гигант» зыфиIорэм щыкIуагъ. Зэнэкъокъум ишапхъэхэм къызэращыдэлъытэгъагъэмкIэ, илъэси 3 — 6 зыныбжь кIэлэцIыкIухэмрэ зихэхъогъухэмрэ жъы хъугъэ пкъыгъохэр имыдзыжьхэу «псэ къызэрапыбгъэкIэжьыщтыр» къаугупшысын, Адыгеим итамыгъэ­хэр къашIынхэ, хэкIыр зэхэдзыгъэным шIуагъэу пылъыр къагъэ­лъэгъон фэягъ.

Сурэти 120-рэ экспертхэм къарахьылIагъ. Ахэм янахьыбэр шъолъыр операторым иIофшIэн фэгъэхьыгъагъ. ГущыIэм пае, текIоныгъэр къыдэзыхыгъэхэм ащыщэу Шамиль Маушевым мыIэрысэ дахэхэр зэрылъ лагъэу, Адыгеир хьакIэхэм хьалэлэу зэрапэгъокIырэр къэзыгъэлъагъорэм хэкIыр дэзыщырэ автомашинэу, къэбзэныгъэм итамыгъэ хъурэр готэу сурэт къышIыгъ. БжашIо Екатеринэ хэкIыр унэм къызэрэрахырэм къыщыублагъэу, ащ игъэкIодын нэсыжьэу Iофэу зэшIохыгъэ хъухэрэм мэхьанэу яIэр къыгъэлъэгъуагъ. Полина Логачевам исурэт хэкIыр зэхэдзыгъэныр шIокI зимыIэ Iофэу зэрэщытым фэгъэ­хьыгъагъ.

ЗиIофшIагъэ анахь дэгъоу къыхахыгъэхэм дипломхэмрэ нэпэеплъ шIухьафтынхэмрэ аратыгъэх.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.