Урысые Федерацием и Президентэу Владимир Путиным УФ-м ишъолъыр­хэм апшъэрэ IэнатIэхэр ащызыIыгъыщт нэбгырэ 15-у хадзыгъэхэм видеокон­фе­рен­цие шIыкIэм тетэу ты­гъуасэ зэIукIэгъу адыриIагъ. Iофтхьабзэм хэлэжьагъ Адыгэ Республикэм и ЛIы­шъхьэу КъумпIыл Мурат.

Шъугу къэтэгъэкIыжьы: 2022-рэ илъэ­сым Iоныгъом и 11-м Адыгеим и Къэ­ралыгъо Совет — Хасэм ия ХIV-рэ зэхэсыгъо къыдыхэлъытагъэу Адыгэ Республикэм и ЛIышъхьэ ихэдзынхэр щыIагъэх. Шъэф мэкъэтыным икIэуххэмкIэ, АР-м ипэщэ IэнатIэкIэ зыкIыныгъэ ахэлъэу депутатхэм КъумпIыл Мурат икандидатурэ къыдырагъэштагъ.

Пэублэ гущыIэу хэгъэгум и Президент къышIыгъэм шъолъырхэм япэщэ IэнатIэкIэ хадзыгъэхэм къащыфэгушIуагъ, Урысыем щыкIогъэ хэдзынхэм уасэ къафишIыгъ. Ащ къызэрэхигъэщыгъэмкIэ, шъхьэихыгъэ шIыкIэм тетэу, бырсыр къахэмытаджэу ахэр кIуагъэх.

Урысые Федерацием и Президент шъолъырхэм яIофшIэнкIэ анахь зигъо лъэныкъо шъхьаIэхэр къыгъэнэфагъэх. Пстэуми анахь мэхьанэ зиIэр — «цIыф­хэм ящыIэкIэ-псэукIэ зыкъегъэIэтыгъэныр, шъолъырхэм социальнэ-экономикэ лъэныкъомкIэ яIофхэм язытет нахьышIу шIыгъэныр, ыпэкIэ тылъыкIотэным пае цыхьэшIэгъу лъэпсэ пытэ гъэпсыгъэ- ныр ары».

«Тихэгъэгу джырэкIэ IэкIыб къэралхэм апкъ къикIырэ къиныгъохэм ахэт. Шъолъырхэм япащэхэм, джащ фэдэу хабзэм илъэныкъо зэфэшъхьафхэм яIэшъхьэтетхэм ащ къыхэкIэу пшъэдэ­кIы­жьэу ахьырэр нахь ин мэхъу, гухэлъхэу зыфэдгъэуцужьыгъэхэр зэшIохыгъэ хъун­хэмкIэ зэкIэми акIуачIэрэ яамалрэ зэрагъэуIун фаеу мэхъу. Федерацием ишъолъырыкIэхэм IэпыIэгъу ятыгъэнымкIи, шъхьафит хъужьыгъэ чIыпIэхэм мамыр щыIакIэр ащыгъэуцугъэнымкIи ащ фэдэ зэдегъэштэныгъэ-зэкъотыныгъэр ищыкIагъэу щыт. Шъолъырхэм шIушIэ IэпыIэгъур къащаугъои, цIыф псэупIэхэм ыкIи районхэм анаIэ атырагъэты, IэпыIэгъу афэхъух. А IофшIэным хэлэжьэрэ пстэуми сызэрафэразэр къэсэIо. ТишIуагъэ зэкIыхэрэми ар къы­зэрагурыIорэм сицыхьэ телъ», — къыхигъэщыгъ Владимир Путиным.

Частичнэ мобилизацием илъэхъан хэбзэгъэуцугъэу щыIэр укъуагъэ мы­хъу­ным иIофыгъо пстэуми анаIэ тырагъэтынэу хэгъэгум и Президент шъолъырхэм япащэхэм пшъэрылъ афишIыгъ. Джащ фэдэу мобилизацием хэфэгъэ цIыфхэм яунагъохэм IэпыIэгъу ятыгъэным, шъо­лъырхэм яэкономикэхэм нахь хэхъо­ныгъэ ашIыным анаIэ тырагъэтынэу ари­­Iуагъ. Транспорт, инженер, унэ-коммунальнэ Iофыгъохэм япхыгъэхэ, джащ фэдэу псауныгъэм икъэухъумэнкIэ, гъэ­­сэныгъэмкIэ инфраструктурэм игъэ­кIэжьын, тыкъэзыуцухьэрэ дунаим изытет нахьышIу шIыгъэным, къалэхэмрэ псэупIэхэмрэ нахь зэтегъэпсыхьагъэ, нахь гуIэтыпIэ хъунхэм япхыгъэ пшъэ­рылъхэр ащ къыгъэуцугъэх.

«Адыгэ РеспубликэмкIэ мэхьанэшхо иIэу щыт Урысые Федерацием и Президент IэпыIэгъоу къытитырэм, ар ренэу зэхэтэшIэ. Республикэм цIыфхэр зычIэ­сыщтхэ унэхэр, гъогухэр, псауныгъэм икъэухъумэн, гъэсэныгъэм, куль­ту­рэм япхыгъэ псэуалъэхэр щашIых, Iоф­шIэпIэ чIыпIакIэхэр зэхащэх, инвестиционнэ проект инхэр пхыращых, энергетикэм ылъэныкъокIэ кIэхэр къыхахых. Владимир Путиным тишъолъыр ынаIэ къызэрэтыригъэтырэм ишIуагъэкIэ республикэмкIэ мэхьанэшхо зиIэ Iофыгъохэр зэшIохыгъэнхэмкIэ унэшъо гъэ­нэфагъэхэр аштагъэх. Ахэр цIыфхэм Iэ­пыIэгъу ятыгъэным, инфраструктурнэ псэолъэшхохэр гъэпсыгъэнхэм япхыгъэу щытых. Социальнэ пшъэрылъхэмрэ экономикэм иIофыгъохэмрэ гъэцэкIагъэ хъунхэм пае федеральнэ IэпыIэгъу тедзэм ишIогъэшхо къытэкIы. А пстэуми амал къаты тицыхьэ зытелъыжьэу неущрэ мафэм тыпэплъэнымкIэ ыкIи тигъэхъагъэхэм ахэдгъэхъонымкIэ», — къыIуагъ КъумпIыл Мурат.

Республикэм ынаIэ къызэрэтыригъэтырэм, ишIуагъэ къызэрэригъэкIырэм апае хэгъэгум и Президент зэрэфэразэр Адыгеим и ЛIышъхьэ къыIуагъ. КъумпIыл Мурат къызэрэхигъэщыгъэмкIэ, респуб­ликэм ис цIыфхэмрэ хэгъэгум ипащэ­хэмрэ цыхьэшхоу къыфашIыгъэр къы­гъэ­шъыпкъэжьыщт, Адыгеим тапэкIи хэ­хъоныгъэ ышIыным пае фэлъэкIыщтыр зэкIэ ышIэщт.

«Тэ типшъэрылъ зэпхыгъэр респуб­ликэм щыпсэурэ пстэуми яфедэ хэлъэу тишъолъыр хэхъоныгъэ едгъэшIыныр ары. А гухэлъыр къыддэхъуным пае цIыфхэм яIэпыIэгъу IэубытыпIэ тшIыщт, къэралыгъом ипащэ ипшъэрылъхэр дэх имыIэу дгъэцэкIэщтых. Непэ IэкIыб къэралхэм апкъ къикIырэ гумэкIыгъохэр щыIэ нахь мышIэми, хэгъэгум фэшъыпкъэ кIочIэ пстэури нахь зэкъодгъэуцон фае, Владимир Путиным къыгъэуцугъэ стратегическэ гухэлъхэмрэ пшъэрылъхэмрэ зэшIохыгъэ хъунхэм апае амалэу тиIэр зэкIэ дгъэфедэщт», — къыIуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, гухэлъ шъхьаIэу щытыр лъэ­ныкъо пстэумкIи, амал зэриIэкIэ къыттефэрэр зэкIэ тшIэныр, цIыфхэм ящыIакIэ зыкъедгъэIэтыныр ары. АщкIэ яшIуагъэ къэкIощт Адыгеим исоциальнэ-экономикэ хэхъоныгъэкIэ унэе программэм, лъэпкъ проектхэм, къэралыгъо программэхэм, партиеу «Единэ Россием» ипроектхэм, инвестициехэм, бизнесым, общественнэ объединениехэм, республикэм ихэхъоныгъэ зиIахь къыхэзышIыхьэ зышIоигъо пстэуми шIуа­гъэ къэзытыщт зэдэлэжьэныгъэ-гъусэныгъэ пытэ адытиIэным.

АР-м и ЛIышъхьэ ипресс-къулыкъу