Лэжьыгъэхэм якъэгъэкIын пылъхэм къэралыгъо IэпыIэгъоу аратыщтым пае УФ-м и Правительствэ IэпэчIэгъэнэ фондым къыхихыгъэ ахъщэр шъолъырхэм атырагощагъ.

Адыгэ Республикэм сомэ миллион 43-рэ мин 767-м ехъу къыфатIупщыгъ. НахьыпэкIэ федеральнэ бюджетым ща­гъэнэфэгъагъэри къыдэплъы­тэмэ, лэжьыгъэхэм якъэгъэкIын пылъхэм апае ­мы илъэ­сым республикэм къыфатIупщыщтыр сомэ миллион 88-рэ мин 344-м ехъу.

АР-м илIыкIоу УФ-м и Къэралыгъо Думэ щыIэ Владислав Резник иIэпыIэгъукIэ УФ-м и Федеральнэ ЗэIукIэ икомиссие мы Iофым хэплъагъ ыкIи Адыге­им ащ фэдэ IэпыIэгъу къыратыныр игъоу ылъытагъ.

АР-м и ЛIышъхьэу КъумпIыл Мурат къызэрэхигъэщыгъэмкIэ, лэжьыгъэхэм якъэгъэкIын пылъхэм ахъщэу ащ халъхьэрэм нахьыбэу федэ къыхьынымкIэ, заушъомбгъунымкIэ, бэдзэршIыпIэм чIыпIэ гъэнэфагъэ щаубытынымкIэ мыр IэпыIэгъушхо афэ­хъущт.

— ЧIыгулэжьхэмкIэ мыр фе­дэшхоу щыт, шапхъэхэм адиштэу къагъэкIыгъэ гъомылап­хъэхэр цIыфхэм аIэкIагъэхьанымкIи ащ ишIуагъэ къэкIо. Лэ­жьыгъэ къэгъэкIыным зиу­шъомбгъумэ, къэралыгъор гъомылэпхъэнчъэу къызэрэмынэщтыр гъэнэфагъэ, — къыIуагъ КъумпIыл Мурат.

Адыгеим ипащэхэм кризисым пэшIуекIорэ Iофтхьабзэхэм ама­лэу къатырэр зэкIэ агъэфедэзэ, мэкъумэщ отраслэм щылажьэ­хэрэм IэпыIэгъу мымакIэу зэра­фэхъухэрэр Къэралыгъо Думэм идепутатэу Владислав Резник къыхигъэщыгъ.

— Республикэм ипащэхэр тигъусэхэу, «Единэ Россиер» къотэгъу къытфэхъузэ, мэкъу­мэщ хъызмэтым пае тапэкIи федеральнэ ахъщэ Адыгеим къыфатIупщыным тыдэлэжьэщт, — къыIуагъ депутатым.

УФ-м мэкъу-мэщымкIэ и Министерствэ къызэритыгъэмкIэ, мэкъумэщ продукциер IэкIыбым зыгъакIохэрэм пошлинэу атыщтыр охътэ гъэнэфагъэкIэ нахь макIэ къашIыгъ. Чъэпыогъум и 5-м къыщыу­благъэу и 11-м нэс коц тонным пае пошлинэр сомэ 2119-м, хьэм пае атыщтыр сомэ 1849,8-м, натрыфым пае агъэ­нэфагъэр сомэ 3295,6-м анэсэу къеIыхыгъ. Ащ ыпэкIэ коц тонным пае сомэ 2476,6-рэ, хьэм — сомэ 2152,6-рэ, натрыфым — сомэ 3659,9-рэ пошлинэу алъатыщтыгъ.