Къалэу Мыекъуапэ имэрэу Геннадий Митрофановым Мыекъуапэ идзэ комиссарэу Алексей Санташовым IофшIэгъу зэIукIэгъу ды­ри­Iагъ.

Къалэм ипащэ игуадзэу, ветеранхэм якъэлэ Совет итхьаматэу Юрий Томчак зэIукIэм хэлэжьагъ.

Военкомым къызэриIуагъэмкIэ, къалэу МыекъуапэкIэ мобилизацием епхыгъэ пшъэ­рылъхэу цIыфхэм якъыхэщын епхыгъэхэр непэкIэ гъэцэкIагъэ хъугъэх. Дзэ сэнэхьат зырызхэмкIэ джыри частьхэм ахагъахъо.

КъызэрэхигъэщыгъэмкIэ, Уры­сые Федерацием и Пре­зидентэу Владимир Путинымрэ Адыгэ Республикэм и ЛIы­шъхьэу КъумпIыл Муратрэ анахьэу анаIэ зытырагъэтырэр мобилизацием хэфэгъэ цIыфхэм зыкъызэрафагъэзэрэ тхылъхэм тэрэзэу Iоф адэшIэгъэныр ары.

Алексей Санташовым къы­зэриIуагъэмкIэ, къалэм идзэ комиссариат мобилизацием хэ­фагъэхэм къагъахьырэ тхылъхэм язэхэфын псынкIэу зэ­шIуехы.

«Тхьаусыхэ тхылъ къызы­тIэ­кIахьэкIэ медицинэ комиссиехэр зэхэтэщэх, цIыфхэм ялъэIу тхылъхэм тахэплъэ. «Къэралыгъо фэIо-фашIэхэр» зыфиIорэ порталымкIэ цIыфхэм ялъэIу тхылъхэр аштэх. АщкIэ амалитIу къызфагъэфедэ. ЗымкIэ — ежь ишIоигъоныгъэкIэ кIо­хэрэм ятхылъхэм ахэплъэх, ятIо­нэрэмкIэ хэукъоныгъэ зы­хэхъухьэгъэ Iофыгъохэр зэ­шIуахых. НахьыбэрэмкIэ лъэIу тхылъхэр зыфэгъэхьыгъэхэр мобилизацием къыхырагъэу­бытагъэхэм япсауныгъэрэ яуна­гъорэ язытет ары. ЗэкIэ тхылъхэм ахэплъэх ыкIи дэгъоу, лъэ­ныкъохэр зэкIэ икъоу къыдалъытэхэзэ, джэуапхэр аратыжьых», — къыIуагъ Алексей Санташовым.

Геннадий Митрофановым къызэрэхигъэщыгъэмкIэ, мобилизацием къыхиубытэхэрэм яунагъохэм IэпыIэгъу ятыгъэн, нэбгырэ пэпчъ лъэIу тхылъэу къытыгъэм хэплъэнхэ фае. «Тэ типшъэрылъыр теуры­кIуагъэ къызхэтымыгъафэу а тхылъхэм джэуапхэр яттыжьынхэр ары. Частичнэ мобилизациемкIэ IофшIэнэу дгъэцакIэрэр хэбзэгъэуцугъэу щыIэм ыкIи Урысые Федерацием зыкъэу­хъумэжьынымкIэ и Министерствэ къыгъэнэфэрэ лъэныкъо­хэм адиштэн фае. Дзэкъулы­къушIэхэм япшъэрылъхэр дэ­гъоу агъэцэкIэнхэшъ, яунагъо­хэм агъэ­зэжьыным мэхьанэшхо иIэу щыт», — къыхигъэхъо­жьыгъ Геннадий Митрофа­новым.

Адыгэ Республикэм и ЛIышъхьэ ипресс-къулыкъу