Мы мафэхэм Адыгеим мэхьанэ ин зиIэ Iофтхьабзэ щыкIуагъ. Москва щы­псэурэ адыгэ нахьыжъхэм я Совет итхьаматэу Агъырбэ Юрэ игукъэкIыкIэ общественнэ организациеу «Врачхэм я Хасэ» зэхащагъ.

ДжырэкIэ Хасэм псауныгъэм икъэухъумэн учреждение 30-мэ ащы­лэжьэрэ медицинэ шIэ­ныгъэхэмкIэ доктор 12, медицинэ шIэныгъэхэмкIэ кандидат 22-рэ хэт.

Шъугу къэдгъэкIыжьын, Н. И. Пироговым ыцIэ зыхьырэ Урысые лъэпкъ ушэтын медицинэ университетым идокторхэмрэ истудентхэмрэ илъэс заулэкIэ узэкIэIэбэжьымэ общественнэ организацие Москва щызэхащэгъагъ. Ялъэпкъэгъоу къэралы­гъом икъэлэ шъхьаIэ къа­кIохэрэм IэпыIэгъу ара­гъэкIыныр ары пшъэрылъ шъхьаIэу зыфагъэуцужьыгъэр. ИлъэситIум къыкIоцI сымэджи 100-м ехъумэ яшIуагъэ арагъэкIыгъ.

Iофтхьабзэр Мыекъопэ къэралыгъо технологическэ университетым щы­кIуагъ. Научнэ-практическэ конференциеу «Актуальные вопросы науки и практики в современной медицине: междисциплинарный подход, совре­менные тренды» зыфи­Iорэм цIыфыбэ къекIо­лIагъ. Хэлэжьагъэхэм ащыщых кIэ­лэцIыкIу хирургиемкIэ ыкIи травматологиемкIэ НИИ-м икъутамэ ипащэу Жанна Семеновар, Адыгэ Респуб­ликэм псауныгъэр къэу­хъумэгъэнымкIэ иминистрэу Мэрэтыкъо Рустем, МКъТУ-м иректорэу Къуижъ Саидэ, Москва иклиникэхэм ыкIи име­дицинэ научнэ-ушэтэкIо учреждениехэм яспециалист шъхьаIэхэр, МКъТУ-м и Мединститут, Адыгеим, Краснодар краим, Къэ­бэртэе-Бэлъкъарым ыкIи Къэрэщэе-Щэрджэсым яIэзэпIэ учреждениехэм яспециалист шъхьа­Iэхэр.

Iофтхьабзэм къекIолIагъэхэм шIуфэс къарихыгъ Жанна Семеновам.

— Адыгеим, Къэ­бэр-тэе-Бэлъкъар ыкIи Къэ­рэщэе-Щэрджэс респуб­ликэм арыкIыгъэу, Уры­сыем икъэлэ зэфэшъхьаф­хэм ащеджагъэхэу, ащ къадэнэжьыгъэхэу адэсыр макIэп. Тыкъызыщыхъугъэ чIыпIэхэм ащыпсэурэ цIыфхэм медицинэ Iэпы­Iэгъу ядгъэкIыныр, тиныбжьыкIэхэм щысэтехыпIэ тафэхъуныр ары пшъэ­рылъ шъхьаIэу зыфэд­гъэуцужьырэр. Тиорга­низацие мэхьанэу иIэр цIыфхэм IэпыIэгъу тафэ­хъуныр, къыткIэхъухьэрэ ныбжьыкIэхэм яшIэныгъэ­хэм ахэдгъэхъоныр ары. Тызэкъотмэ — тылъэш, ащкIэ непэрэ Iофтхьа­бзэм мэхьанэшхо иI, тизэпхыныгъэ нахь пытэ хъунэу, шIуагъэ пылъэу тызэдэлэжьэнэу сэгугъэ, — къы­Iуагъ ащ.

Агъырбэ Юрэ ишIуфэс тхыгъэ нэужым къеджа­гъэх. «Врачхэм я Хасэ» зыфиIорэм иапэрэ научнэ-практическэ конфе­ренцие зэрэзэхащагъэмкIэ къэзэрэугъоигъэхэм ар къафэгушIуагъ. АР-м и ЛIышъхьэу КъумпIыл Мурат, Адыгеим ыцIэкIэ се­наторэу Хъопсэрыкъо Мурат, Адыгэ Республи­кэм псауныгъэр къэу­хъу­мэгъэнымкIэ иминистрэу Мэрэтыкъо Рус­тем, МКъТУ-м иректорэу Къуижъ Саидэ Iоф­тхьабзэм изэхэщэнкIэ яшIуагъэ къызэрагъэкIуагъэмкIэ зэрафэразэхэр ащ къыщиIуагъ. Непэ «Врач­хэм я Хасэ» зисэнэхьат хэшIыкI ин фызиIэ спе­циалистхэр зэрэхэтхэр, ахэр яшIэныгъэхэмкIэ къа­дэгощэнхэм зэрэфэ­хьазырхэр къыхигъэщыгъ. IофшIэнэу апэ илъыр зэрифэшъуашэу зэшIуахынэу къафэлъэIуагъ.

Республикэм псауны­-гъэр къэухъумэгъэным исистемэ хэхъоныгъэхэр ышIынхэмкIэ мыщ ишIуагъэ къызэрэкIощтыр Мэрэтыкъо Рустем къы­Iуагъ. Нэужым медицинэм ылъэ­ныкъокIэ гъэхъагъэу щы­Iэхэм, къэралыгъо программэ зэфэшъхьафхэм яшIуагъэкIэ хэхъоныгъэу ашIыгъэхэм ар къатегущыIагъ.

Къуижъ Саидэ псалъэ зештэм Мыекъопэ къэ­ралыгъо технологическэ университетым иIофшIэн зэрэзэхищэрэм, анахьэу медицинэ институтым къащыуцугъ. Iэзэн Iофым, педиатрием, стоматоло­гием, фармацием алъэ­ныкъокIэ специалистхэр апшъэрэ еджапIэм къы­чIагъэкIых.

Конференцием хэла­жьэ­хэрэр нэужым секциеу гощыгъэхэу Iоф ашIагъ. «Современные технологии в хирургической прак­тике» ыкIи «Актуальные вопросы многопрофильного стационара. Наука и практика» зыфиIорэм те­гущыIагъэх, яшIэныгъэхэмкIэ зэдэгощагъэх.

Нэужым Хасэм изэхэсыгъо щыIагъ. Ащ къырагъэблэгъагъэх АР-м и ЛIышъхьэу КъумпIыл Мурат, Адыгеим ыцIэкIэ сенаторэу Хъопсэрыкъо Мурат. Общественнэ организациеу «Врачхэм я Хасэ» иуставрэ ащ пэ­щэныгъэ дызезыхьащтхэм ягъэнэфэнрэ япхыгъэ Iофыгъохэм щатегущыIагъэх. Зэхэсыгъом Хасэм и Координационнэ совет аухэсыгъ. Адыгеири зэра­хэтэу, врач 19 ащ джыри хагъэхьагъ.

ДЕЛЭКЪО Анет. Сурэтхэр Iэшъынэ Ас­лъан тырихыгъэх.