КIэлэегъаджэм и Мафэ фэгъэхьыгъэ зэхахьэ АР-м и Къэралыгъо филармоние мы мафэхэм щыкIуагъ.

Iофтхьабзэм хэлэжьагъэх АР-м и Премьер-министрэ ип­шъэрылъхэр зыгъэцэкIэрэ КIэ­рэщэ Анзаур, Адыгеим и Къэралыгъо Совет – Хасэм и Тхьаматэу Владимир Нарожнэр, министрэхэм я Кабинет хэтхэр, депутатхэр, муниципалитетхэм япащэхэр, общественнэ организациехэм ялIыкIохэр, кIэлэегъэ­джэ сообществэр, нэмыкI­хэри.

АР-м и ЛIышъхьэу КъумпIыл Мурат ыцIэкIэ шъолъырым Iоф щызышIэрэ кIэлэегъаджэхэм, ветеранхэм ямэфэкIкIэ КIэрэщэ Анзаур къафэгушIуагъ. ТищыIэныгъэ гъогу тытезыщэрэ, тезыгъаджэрэ ыкIи тызыпIурэ кIэлэегъаджэхэм тазэрафэразэр ятIонымкIэ непэрэ мафэр ама­лышIоу зэрэщытыр ащ хигъэунэфыкIыгъ. КIэлэцIыкIу пэпчъ сэнаущыгъэу хэлъымкIэ зыкъы­зэIуихыным, къыткIэхъухьэрэ лIэужхэм яхэгъэгу шIу алъэгъоу пIугъэнхэм кIэлэегъаджэхэм, кIэлэпIухэм яIахьышхо зэрэхэлъыр, ащ къыхэкIыкIэ гъэсэныгъэм исистемэ къэралыгъомкIэ сыдигъуи анахь шъхьаIэу зэрэщытыщтыр ащ къыIуагъ.

— Ныбджэгъу лъапIэхэр, кIэлэегъэджэ IофшIэным иветеранхэр, шъуимэфэкI мафэкIэ сышъуфэгушIо, — къыIуагъ КIэрэщэ Анзаур. — Мы сэнэ­хьатым зищыIэныгъэ езыпхыгъэхэм яIофшIэн хэшIыкIы­шхоу фыряIэм ишIуагъэкIэ къыткIэхъухьэрэ лIэужхэм шIэ­ныгъэ куухэр зэрагъэгъотынхэ, щыIэныгъэмкIэ ящыкIэгъэщт сэнэхьатым феджэнхэ амал яI. Гъэсэныгъэм хэ­хъоныгъэхэр ышIынхэм, кIэлэ­егъаджэм имэхьанэ зыкъегъэ­Iэтыгъэным афэшI къэралыгъом, республикэм непэ ща­шIэрэр бэ. Iофхэм язытет на­хьышIу хъуным фэIорышIэрэ лъэпкъ проектхэр чанэу рес­публикэм щагъэцакIэх. Непэ республикэм еджапIэхэр, кIэ­лэцIыкIу IыгъыпIэхэр щытэгъэ­цэкIэжьых ыкIи щытэшIых, ящыкIэгъэ оборудованиякIэр аIэкIэтэгъахьэ. Мы илъэсым муниципалитетиплIымэ ягурыт еджэпIи 8-мэ игъэкIотыгъэ гъэцIэкIэжьынхэр ащыкIуа­гъэх. КъэкIорэ илъэсым джыри 7 дгъэкIэжьыщт.

КIэрэщэ Анзаур къызэриIуагъэмкIэ, анахьэу анаIэ зытырагъэтыщтыр кIэлэегъэджэ ныбжьыкIэхэм ягъэхьазырын ары. Iоныгъом и 1-м ехъулIэу респуб­ликэм ит гурыт еджапIэхэм ыкIи кIэлэцIыкIу IыгъыпIэхэм специалист ныбжьыкIи 164-рэ аIу­хьагъ.

— Республикэм гъэсэны­гъэм­кIэ исистемэ, шъолъырым ыкIи къэралыгъом зэрэпсаоу хэхъоныгъэхэр ашIынхэмкIэ шъуигъэхъагъэхэм, шъуиIоф­шIэн шъукъызэрекIуалIэрэм мэхьанэшхо зэряIэм щэч хэлъэп. Ащ къыхэкIыкIэ кIэлэегъаджэм щыIэныгъэм чIыпIэу щиубытырэм, ежь пшъэ­дэкIыжьэу ыхьырэми ахэхъо. Лъытэныгъэ зыфэтшIырэ ти­кIэлэегъаджэхэр! ШъуимэфэкI­кIэ джыри зэ сыгу къыздеIэу сышъуфэгушIо. Творческэ гъэхъагъэхэр шъушIыхэзэ джыри нахь лъэгэпIэ инхэм шъуанэсынэу, ежъугъаджэхэ­рэм шъуарыгушхон амал, псауныгъэ пытэ ыкIи щыIэкIэшIу шъуиIэнэу сышъуфэлъаIо, — къыIуагъ АР-м и Премьер-министрэ ипшъэрылъхэр зыгъэцакIэрэм.

Нэужым «Адыгэ Республикэм гъэсэныгъэмкIэ изаслуженнэ IофышI» зыфиIорэ щытхъуцIэр кIэлэегъэджэ пэрытхэм, гурыт еджапIэхэм, кIэлэцIыкIу IыгъыпIэхэм япащэхэм афагъэшъошагъ. Ахэм ахэтыгъэх Тэхъутэмыкъое гурыт еджапIэу N 1-м урысыбзэмкIэ ыкIи литературэмкIэ икIэлэегъаджэу АкIэгъу Марыет, Мыекъопэ гурыт еджа­пIэу N 15-м урысыбзэмкIэ ыкIи литературэмкIэ икIэлэегъаджэу, пащэм игуадзэу Зоя Блинде, Очэпщые гурыт еджапIэу N 9-м ипащэу Делэкъо Марыет, кIэлэ­цIыкIу IыгъыпIэу N 46-м ипащэу Лариса Исаченкэр, пенсием щысэу Къайтыкъу Къадырхъан, зэкIэмкIи мы щытхъуцIэр нэбгырэ 16-мэ афагъэшъошагъ.

Джащ фэдэу 2022-рэ илъэсым зэхащэгъэ зэнэкъокъум изэфэ­хьысыжьхэм адиштэу, IофшIэнымкIэ гъэхъэгъэшIу зиIэ кIэлэ­егъэджэ анахь дэгъухэр къыха­хыгъэх, ахэм афэгушIуагъэх, АР-м и ЛIышъхьэ идипломрэ сомэ мин 200 зырызрэ шIухьафтынэу афагъэшъошагъэх. Джащ фэдэу зэнэкъокъум илауреат хъугъэхэм дипломхэр ыкIи сомэ мин 50 зырыз къалэжьыгъэх.

Нэужым Владимир Нарожнэм гущыIэ ратыгъ. АР-м и Парламент идепутатхэм ацIэкIэ зисэнэхьат мэфэкI хэзыгъэунэфыкIыхэрэм ар къафэгушIуагъ. АР-м и Къэралыгъо Совет – Хасэм ирэзэныгъэ тхылъ нэбгырэ заулэмэ аритыжьыгъ.

Республикэм итворческэ купхэм къагъэхьазырыгъэ концертымкIэ мэфэкIыр аухыгъ.