Чъэпыогъум и 4-м УФ-м ошIэ-дэмышIэ IофхэмкIэ ыкIи цIыфхэм якъэухъумэнкIэ икъулыкъу и Мафэ хагъэунэфыкIы. Мыщ ипэгъокIэу Мыекъопэ къэралыгъо технологическэ университетым мэфэкI зэхахьэ щызэхащагъ.

Iофтхьабзэм хэлэжьагъэх АР-м псауныгъэр къэухъу­мэгъэнымкIэ иминистрэу Мэрэтыкъо Рустем, Мыекъо­пэ къэралыгъо технологическэ университетым иректорэу, Урысыем и МЧС АР-мкIэ и ГъэIорышIапIэ и Общественнэ совет итхьаматэу Къуижъ Саидэ, а гъэIорышIапIэм ипащэу, полковникэу Станислав Илющенкэр, къулыкъум иветеранхэр, ведомствэм икъулыкъушIэхэр, апшъэрэ еджапIэхэм якIэлэегъаджэхэр, студентхэр.

Iофтхьабзэм ипэублэ Урысыем ошIэ-дэмышIэ Iоф­хэмкIэ и Министерствэ иIофышIэхэм агъэхьазырыгъэ видеороликым еплъыгъэх. Къулыкъум итарихъ, иIофшIэн зэрэзэхащэрэр ащ къыщыраIотыкIыгъ.

— ОшIэ-дэмышIэ IофхэмкIэ ыкIи цIыфхэм якъэухъумэнкIэ къулыкъум иIофшIэн мэхьанэшхо иI. Къэралыгъом икъэухъумэнкIэ, ащ ицIыфхэр щынэгъончъэу псэунхэмкIэ пшъэрылъышхо зиIэ къулыкъухэм ар ащыщ, ащ испециалистхэр чIыпIэ зэжъу ифагъэхэм пстэуми апэ алъэIэсых. МэфэкI мафэмкIэ сышъуфэгушIо, псауныгъэ пытэ шъуиIэнэу, шъуиунагъо шъудэтхъэжьэу, ошъо къаргъо ташъхьагъ ит зэпытынэу шъуфэсэIо! — закъыфигъэзагъ Iофтхьабзэм къекIолIагъэхэм Станислав Илющенкэм.

Нэужым Урысыем и МЧС и Щытхъу тхылъ АР-м псауныгъэр къэухъумэгъэнымкIэ иминистрэу Мэрэтыкъо Рустем фагъэшъошагъ. «За пропаганду спасательного дела» зыфиIорэ бгъэхалъхьэр Мыекъопэ къэралыгъо технологическэ университетым иректорэу Къуижъ Саидэ ратыгъ. Джащ фэдэу зищыIэныгъэ мы Iофым езыпхыгъэ ветеранхэр агъэшIуагъэх, щытхъу тхылъхэр аратыгъэх.

НэкIубгъор зыгъэхьазырыгъэр ДЕЛЭКЪО Анет. Сурэтхэр Iэшъынэ Аслъан тырихыгъэх.