Урысыем и Президентэу Владимир Путиным Правительствэм хэтхэм зи­чэзыу зэхэсыгъоу адыриIагъэм къы­щы­гущыIагъ УФ-м транспортымкIэ иминистрэу Виталий Савельевыр.

Анахьэу ащ ынаIэ зытыридзагъэр лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн ары. Къэралыгъом ипащэ пшъэрылъэу къыгъэуцугъагъэхэм ащыщ къалэхэр къэзыухьэрэ гъогухэр ыкIи зэхэкIыпIэхэр шIыгъэнхэр. Ар зэшIохыгъэ зэрэхъурэми къэзэрэугъоигъэхэр тегущыIагъэх.

Адыгэ Республикэр пштэмэ, Мыекъуапэ къэзыухьащт автомобиль гъогум ишIын тегъэпсыхьагъэу ящэнэрэ едзыгъом къыдыхэлъытэгъэ пшъэрылъхэр зэшIуихыгъэх.

ЗэкIэмкIи гъогум икIыхьагъэ километри 7,4-рэ мэхъу, лъэмыдж зэпырыкIыпIи 3 иI. Федеральнэ IэпыIэгъум ишIуагъэкIэ мы проектым игъэцэкIэн 2021-рэ илъэсым республикэм щырагъэжьагъ, ащ сомэ миллиарди 3,4-рэ пэIуагъэхьагъ.

Адыгеяавтодорым ипащэу Алексей Корешкиным къызэриIуагъэмкIэ, Адыгеим къэралыгъо гъэпсыкIэ зиIэр илъэси 100 зэрэхъугъэр зыщыхагъэунэфыкIыгъэ чъэпыогъум и 5-м ехъулIэу ар къызэIуахыгъ.

Мы гъогум ишIын мэхьанэшхо зэриIэм щэч хэлъэп. Ащ ишIуагъэкIэ транзит транспортыр урамэу Хьахъу­ратэм текIыщт, гъогур нахь щынэгъончъэ хъущт. Ары пшъэрылъ шъхьаIэу республикэм ипащэхэм зыфагъэу­цужьыгъэр.