КIэлэеджакIохэм ыпкIэ амытэу Урысыем къыщакIухьан ыкIи зыкъыщаплъыхьан зэрэфит­хэм фэгъэхьыгъэ программэу Ростуризмэм зэхищагъэм Iоф зишIэрэр мэзиплI хъугъэ.

Программэр лъэпкъ проектэу «ЗекIонымрэ хьакIэпэгъокIынымкIэ индустриемрэ» зыфиIорэм хэхьэ. Урысыем ишъо­лъыр 18-у ар зыщагъэфедэрэм Адыгэ Республикэри ахэфагъ. Еджа­кIохэм апэу социальнэ сертификат зэрагъэгъотын фае. Порталэу «Госуслуги» зыфиIорэр ащкIэ IэпыIэгъу къа­фэхъущт.

Зисабый зекIо зыгъакIо зышIоигъо ны-тыхэм районхэм ыкIи къалэхэм цIыфыр социальнэу къэу­хъумэгъэным фэгъэзэгъэ гупчэхэу ащызэхэщагъэхэм лъэIу тхылъхэр аIэкIагъэхьанхэ фае. Нэужым ны-тыхэм якIэлэцIыкIу зыдэ­кIощт чIыпIэр къыхахы, туроператорым зэзэгъыныгъэу дашIыгъэм кIэтхэжьых. ЗэкIэмкIи кIэлэеджэкIо мини 100 фэдизмэ мыгъэ заплъыхьанэу кIощтых.

Адыгеим щыщхэу я 5 – 9-рэ классхэм ащеджэхэрэ нэбгырэ 1259-мэ социальнэ сертификатхэр аратыщтых. Ахэм якъы­хэхын АР-м зекIонымрэ зыгъэпсэфыпIэхэмрэкIэ и Комитет, Адыгеим IофшIэнымкIэ ыкIи социальнэ хэхъоныгъэмкIэ и Министерствэ Iоф дашIагъ. ЫпкIэ хэмылъэу зекIо кIощт кIэлэ­еджакIохэр къызэрыхахыщтхэри къагъэ­нэфагъ. Ахэр еджэнымкIэ къахэщыхэу, республикэм ыкIи Урысыем ащызэхащэрэ олимпиадэхэм ащытекIуагъэхэм е зигъот мэкIэ унагъохэм, сабыибэ зэрысхэм е зянэ-зятэ зимыIэжьхэм ащыщынхэ фае.

Сертификат къызэратыхэрэр респуб­ли­кэм ичIыпIэ гъэшIэгъонхэм ащэщтых. ХьакIэщ-хэм ыпкIэ хэмылъэу арысыщтых, агъэшхэщтых, экскурсиехэр афызэхащэ­щтых.

Апэрэ кIэлэеджэкIо 325-р Каменномостскэм ащагъэх. Чэзыу-чэзыоу нэ­мыкI купхэми закъарагъэплъыхьащт, тичIыопс идэхагъэ къарагъэлъэгъущт.

Шъаукъо Аслъангуащ.