Дизайнерхэм загъэхьазыры
Адыгеим идизайнерхэм къэгъэлъэгъонэу «Этномодэм и Тхьамаф» зыфиIорэр шэкIогъу мазэм ыкIэм зэхащэщт. Мы уахътэм ащ къыщагъэлъэгъощт щыгъынхэр агъэхьазырых, фестивалым кIощт дизайнер ныбжьыкIэхэр къыхахых.
Движениеу «Этномода» зыфиIорэм икураторэу, филологие шIэныгъэхэмкIэ докторэу, Адыгэ къэралыгъо университетым ипрофессорэу Макерова Сусаннэ къызэриIуагъэмкIэ, зэнэкъокъур Стамбул дэт коммерческэ университетым щыкIощт.
Проектым пшъэрылъэу иIэр Урысыем ис дизайнерхэм яIэшIагъэхэр къагъэлъагъохэзэ, чIыпIэ ыкIи хэгъэгу зэфэшъхьафхэм ядизайнерхэм аIуагъэкIэнхэу, лъэпкъ нэшанэхэр агъэфедэхэзэ агъэхьазырыгъэ пкъыгъохэм нэIуасэ афашIынхэу, зэгъусэхэу яIофшIагъэхэр лъагъэкIотэнхэу, модэм игупчэхэр нахьыбэу къызэIуахынхэу ары.
Республикэм икIырэ дизайнерхэм адыгэ щыгъынхэр Стамбул къыщагъэлъэгъощтых. Этномодэм ылъэныкъокIэ Урысыемрэ Тыркуемрэ ябизнес-сообществэ тапэкIэ лъэбэкъукIэхэр зэдашIыхэу рагъэжьэщт.
Шъаукъо Аслъангуащ.