УФ-м и Президентэу Владимир Путиныр илъэс 70-рэ зэрэхъугъэм фэшI Адыгеим и ЛIышъхьэу КъумпIыл Мурат ащ фэгушIуагъ. Адыгэ Республикэм зэкIэ щыпсэухэрэм ацIэкIэ ыкIи ежь ыцIэкIэ гущыIэ фабэхэр фиIуагъэх.

«Владимир Владимир ыкъор тарихъым чIыпIэшхо щызыубытыгъэ цIыф, тихэгъэгу хэхъоныгъэ езыгъэшIырэ, джырэ уахътэм икъиныгъохэр зэрифэшъуашэу зэпызычын зылъэкIырэ пащ.

Президентым иакъылышIуагъэ, иIэпэIэсэныгъэ, чыжьэрыплъэ политикэу зэрэщытым яшIуагъэкIэ Урысыер ицыхьэ зытелъыжьэу къэралыгъо гъэпсыным игъогу рэкIо, илъэпкъ федэхэр цыхьэшIэгъоу къеухъумэх.

ЦIыфыгъэ шэпхъэ дахэхэу обществэм хэлъхэр къэу­хъумэгъэнхэмкIэ, хэгъэгум фэшъыпкъэхэу ныбжьыкIэхэр пIугъэнхэмкIэ политикэу ащ пхырищырэм амал къытыгъ тихэгъэгу дунаим ифэшъошэ чIыпIэ щиубытыным пае Урысыем ис цIыф лъэпкъ зэфэшъхьафхэр зэкъоуцонхэмкIэ.

ЩыIэныгъэм илъэныкъо пстэуми пIомэ хъунэу ащ афишIыгъэ зэхъокIыныгъэ инхэм яшIогъэшхо къэ­кIуагъ цIыфхэм ящыIэкIэ-псэукIэ нахьышIу хъунымкIэ, экономикэм хэхъоныгъэ ышIынымкIэ, социальнэ Iофы­гъоу къэуцухэрэр зэшIохыгъэнхэмкIэ, Урысые Федерацием ишъолъырхэм зэдиштэу хэхъоныгъэ ашIынымкIэ.

РеспубликэмкIэ мэхьанэшхо зиIэ пшъэрылъхэр зэшIохыгъэнхэмкIэ, цIыфхэм ящыIакIэ нахьышIу шIыгъэнымкIэ, АдыгеимкIэ анахь мэхьанэ зиIэ проектхэр пхырыщыгъэнхэмкIэ Президентым IэпыIэгъоу къытитыгъэм ишIогъэшхо къэкIуагъ.

Урысыем ифедэ зыхэлъ IофшIэнышхо Владимир Владимир ыкъом зэрэзэшIуихырэм, тиреспубликэ лъэныкъо пстэумкIи хэхъоныгъэ ышIынымкIэ IэпыIэгъу ин къызэрэтитырэм апае инэу сыфэраз! Псауныгъэ пытэ иIэнэу, бэгъашIэ хъунэу, ти Хэгъэгушхоу Урысые Федерацием ифедэ зыхэлъ Iоф пстэуми текIоныгъа­кIэхэр, гъэхъэгъакIэхэр ащишIынхэу фэсэIо!», — къы­щеIо шIуфэсым.