Адыгеим и ЛIышъхьэу КъумпIыл Мурат хэлажьэзэ общественнэ организациеу «Врачхэм я Хасэ» иапэрэ зэхэсыгъо Мыекъопэ къэралыгъо технологическэ университетым щыкIуагъ. Научнэ-практическэ конференциеу «Актуальные вопросы науки и практики в современной медицине: междисциплинарный подход, современные тренды» зыфиIорэм тегъэпсыхьагъэу ар кIуагъэ.

Iофтхьабзэм хэлэжьагъэх Адыгеим ыцIэкIэ сенаторэу Хъопсэрыкъо Мурат, МКъТУ-м ипрезидентэу, Адыгэ Респуб­ликэм и Къэралыгъо Советникэу ТхьакIущынэ Аслъан, Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем, МКъТУ-м иректорэу Къуижъ Саидэ, АКъУ-м иректорэу Мамый Даут, Москва иклиникэхэм ыкIи имедицинэ научнэ-ушэтэкIо учреж­дениехэм яспециалист шъхьаIэхэр, МКъТУ-м и Мединститут, Адыгеим, Краснодар краим, Къэбэртэе-Бэлъкъарым ыкIи Къэрэщэе-Щэрджэсым яIэзэпIэ учреждениехэм яспециалист шъхьа­Iэхэр.

Джащ фэдэу мы зэIукIэгъум хэлэжьагъэх нэ узхэмкIэ НИИ-у М. Красновым ыцIэкIэ щытым, Урысые лъэпкъ ушэтэкIо медицинэ университетэу Н. Пироговым ыцIэкIэ щытым, Ломоносовым ыцIэкIэ щыт МКъУ-м и Медицинэ-научнэ гупчэ, кIэлэцIыкIу хирургиемкIэ ыкIи травматологиемкIэ НИИ-м, Н. Филатовым ыцIэкIэ щыт кIэлэцIыкIу къэлэ клиническэ сымэджэщым, IэпыIэгъу псынкIэмкIэ Н. Склифосовскэм ыцIэкIэ щыт НИИ-м яшIэныгъэлэжь медикхэр ыкIи нэмыкIхэр.

Республикэм и ЛIышъхьэ зэIукIэм хэлажьэхэрэм «Врачхэм я Хасэ» изэхэщэнкIэ Iофэу ашIагъэм пае зэрафэразэр къыIуагъ.

«ТэркIэ мэхьанэ иIэу щыт респуб­ликэм ащ фэдэ Совет зэрэщызэхащагъэм. Лъэпкъэу къызхэкIыгъэхэм емылъы­тыгъэу, тиреспубликэ щыщхэр нахьыбэу ащ хэхьанхэ фаеу сэ­лъытэ. Хэгъэгум имедицинэ учреждениехэм мымакIэу тичIыпIэгъухэр гъэхъагъэ хэлъэу ащэлажьэх. Советым иIофшIэн нахьыбэу ахэр къыхэгъэлэжьэ­гъэнхэ ыкIи зэдэлэжьэныгъэ- гъусэныгъэ пытэ азыфагу илъын фае. Тишъолъырхэм ащыпсэу­хэрэм а Iофыр афэлэжьэщт, псауныгъэм икъэухъумэн нахь шIогъэ ин къытэу хэхъоныгъэ ышIынымкIэ ишIуагъэ къэ­кIощт, шъолъырхэм язэпхыны­гъэхэм ягъэпытэн иIахьышхо хишIыхьащт», — къыIуагъ КъумпIыл Мурат.

Урысыем и Президентэу Владимир Путиным къыгъэуцугъэ пшъэрылъхэм атегъэпсыхьагъэу урысые медицинэ наукэм хэхъоныгъэ ышIыным мэхьанэшхо зэриIэр къыхагъэщыгъ.

Республикэм и ЛIышъхьэ шъхьафэу къащыуцугъ Адыгеим псауныгъэм икъэу­хъумэнкIэ илъэпкъ проектхэмрэ икъэралыгъо программэхэмрэ япхырыщын зэрэкIорэм, медицинэм иинфраструктурэ нахьышIу шIыгъэным. Ащ къызэриIуагъэм­кIэ, медицинэ учреждениехэр зэрагъэцэкIэжьхэрэм, зэрэзэтырагъэпсыхьэхэ­рэм ямызакъоу къуаджэхэми адэс специалистхэм яшIуагъэ арагъэкIы, врачхэм яIэпэIэсэныгъэ хагъахъо, Урысыем иапшъэрэ еджэпIэ шъхьаIэхэм тистудент-медикхэр ачIэсых.

«Тиспециалистхэм ягъэхьазырынкIэ, ахэм яIэпэIэсэныгэ зы­къегъэIэтыгъэнымкIэ хэгъэгум имедицинэ учреждение шъхьа­Iэхэм яIэпыIэгъу тищыкIагъ. Шъо IофшIэнымкIэ опытэу шъуи­Iэ хъугъэр тищыкIагъ, джащ фэдэу наукэм ылъэны­къокIи тизэдэлэжьэныгъэ дгъэпытэн фае», — къыIуагъ КъумпIыл Мурат.

Зэхэсыгъом ыуж юбилейнэ медалэу «Адыгэ Республикэр зызэхащагъэр илъэси 100 хъугъэ» зыфиIорэр хэгъэгум имедицинэ гупчэ шъхьаIэхэм яIофышIэхэм аратыгъэх, джащ фэдэу Урысые ФедерациемкIэ и Совет ищытхъу тхылъ ахэм къафагъэшъошагъ. Адыгеим ыцIэкIэ сенаторэу Хъопсэрыкъо Мурат, МКъТУ-м ипрезидентэу Тхьа­кIущынэ Аслъан, МКъТУ-м иректорэу Къуижъ Саидэ къэгущыIагъэх.

КIэлэцIыкIу хирургиемкIэ ыкIи травматологиемкIэ НИИ-м икъутамэ ипащэу Жанна Семеновам (организацием итхьаматэу хадзыгъэм) къыIотагъ чат фэдэу апэ ар зэрэзэхащэгъагъэр. Москва имедицинэ учреждениехэм ядокторхэмрэ яапшъэрэ медицинэ учреждениехэмрэ ястудентхэр ащ хэтыгъэх. Ащ зэхэщакIо фэхъугъэр Москва щыпсэурэ адыгэ нахьыжъхэм я Совет итхьаматэу Агъыр­бэ Юр ары.

Непэ Хасэм медицинэ шIэныгъэхэмкIэ доктор 12, медицинэ шIэныгъэхэмкIэ кандидат 22-рэ хэт, псауныгъэм икъэу­хъумэн учреждение 30-мэ ахэм Iоф ащашIэ. ИлъэситIум къыкIоцI лъэныкъо 20-м ехъукIэ пациенти 100-м ехъумэ консультациехэр ахэм адашIыгъэх.

Общественнэ организациеу «Врачхэм я Хасэ» иуставрэ пэщэныгъэ дызезыхьащтхэм ягъэнэфэнрэ япхыгъэ Iофыгъохэм нэужым атегущыIагъэх.

Зэхэсыгъом илъэхъан Хасэм и Координационнэ совет аухэсыгъ. Адыгеири зэрахэтэу, врач 19 ащ джыри хагъэхьагъ.

АР-м и ЛIышъхьэ ипресс-къулыкъу