Урысые Федерацием и Правительствэ и Тхьаматэ игуадзэу Татьяна Голиковам видеоконференцие шIыкIэм тетэу IофшIэным епхыгъэ Iофыгъохэм афэгъэзэгъэ межведомственнэ купым изичэзыу зэхэсыгъо тыгъуасэ зэрищагъ. Ащ хэлэжьагъ Адыгеим и ЛIышъхьэу КъумпIыл Мурат.

Зэхэсыгъом илъэхъан цIыфхэм Iоф­шIэн ягъэгъотыгъэнымкIэ хэгъэгумрэ ЮФО-мрэ яIофхэм язытет, IофшIэнмыгъотыныгъэм къыкIегъэчыгъэнымкIэ Iофтхьэбзэ заулэхэм япхырыщын зэрэкIощт шIыкIэм иIофыгъохэр къаIэтыгъэх.

Татьяна Голиковар къызэгущыIэм хигъэунэфыкIыгъ лъэпкъ проектхэмрэ къэралыгъо программэхэмрэ япхырыщын, джащ фэдэу къэуцурэ Iофыгъохэр псынкIэу зэшIохыгъэнхэм мэхьанэшхо зэряIэр.

«Тызэсэжьыгъэ Iофыгъохэм анэмыкIэу предприятие зырыз­хэм яфэныкъоныгъэ­хэм, IофышIэхэр икIэрыкIэу гъэ­хьазыры­жьыгъэнхэмкIэ, егъэ­джэгъэнхэмкIэ амалыкIэу щы­Iэхэм ягъэфедэн ыкIи нэ­мыкIхэм непэ татегущыIэщт», — къы­Iуагъ Татьяна Голиковам.

Къыблэ федеральнэ шъолъырым цIыфхэм IофшIэн ягъэгъотыгъэнымкIэ иIофхэм язытет игъэкIотыгъэу къыщыуцугъэх IофшIэнымрэ социальнэ ухъумэныгъэмрэкIэ министрэу Антон Котяковыр, джащ фэдэу IофшIэнымрэ цIыфхэм IофшIэн ягъэгъотыгъэнымрэкIэ Федеральнэ къулыкъум ипащэу Михаил Иванковыр.

Адыгэ Республикэм и ЛIышъхьэу КъумпIыл Мурат ащ нэужым къэгущы­Iагъ. Ащ къызэрэхигъэщыгъэмкIэ, рес­публикэм IофшIэнмыгъотыныгъэм къыщыкIегъэчыгъэным пае Iофтхьэбзэ гъэнэ­фагъэхэр щызэрахьэх. Мы илъэсым пыкIыгъэ мазэхэм IофшIэн зимыIэу агъэунэфыгъэр нэбгырэ 3438-рэ, IофшIэн зэрагъэгъотыгъэр 2519-рэ. Мыщ дэжьым къэIогъэн фае джырэкIэ IофшIэпIэ чIыпIэ мини 7 фэдиз зэрэщыIэр. Ар къыз­хэкIырэр промышленнэ производствэм зызэриушъомбгъурэмрэ проект заулэ гъэцэкIагъэ зэрэхъугъэмрэ ары. ГущыIэм пае, мы илъэсым иапэрэ кIэлъэныкъо икIэуххэм нафэ къызэрашIыгъэмкIэ, промышленнэ производствэм зыкъызэриIэтырэм елъытыгъэу ЮФО-м хэхьэрэ шъолъыр анахь дэгъухэм, апэ ит шъо­лъырищым Адыгеир ахэфагъ.

IофшIэн зымыгъотыхэрэм япчъагъэ ыкIи а лъэныкъомкIэ гумэкIыгъоу щыIэ­хэм къакIегъэчыгъэнымкIэ къэралыгъо программэхэр гъэцэкIагъэ зэрэхъухэрэм фэгъэхьыгъэ упчIэу Татьяна Голиковам къыгъэуцугъэхэм Адыгеим и ЛIышъхьэ джэуапхэр аритыжьыгъэх.

IофшIапIэхэм ащамытхыгъэхэу Iоф ащызышIэхэрэм апэшIуекIорэ IофшIэныр республикэм зэрэщызэхэщагъэм КъумпIыл Мурат къыщыуцугъ, цIыфхэм яIэпэIэсэныгъэ хэгъэхъогъэнымкIэ Iофтхьабзэу зэрахьэхэрэм, предприятиехэм зэдэлэжьэныгъэ-гъусэныгъэу адыряIэм ыкIи нэмыкIхэм къатегущыIагъ.

Адыгеим и ЛIышъхьэ къызэрэхигъэщыгъэмкIэ, республикэм иорганизациехэм ащылажьэхэрэр жъугъэу къыIуагъэкI­хэу къыхэкIырэп. Промышленнэ предприятие пстэуми зыпкъ итэу Iоф ашIэ. Организации 5-мэ пIэлъэ гъэнэфагъэкIэ IофшIэныр ащагъэцэкIэным иамал яIэ хъугъэ, организации 3-мэ — общественнэ Iофхэр ащызэшIуахых. Федеральнэ проектэу «ЦIыфхэм IофшIэн ягъэгъотыгъэныр» зыфиIорэм ипхырыщын телъытагъэу мы илъэсым пыкIыгъэ уахътэм загъасэмэ ашIоигъоу нэбгырэ 1592-мэ лъэIу тхылъ къатыгъ, нэбгырэ 551-мэ яшIоигъоныгъэ афагъэцэкIагъ, нэбгырэ 220-мэ егъэджэныр аухыгъ. ЦIыфхэм IофшIэн ягъэгъотыгъэным ылъэныкъокIэ мафэ къэс пIоми хъунэу Iофтхьэбзэ гъэнэфагъэхэр зэрахьэх, зэхъокIыныгъэ­хэр ащ фашIых.

«Тэ дэгъоу къыдгурэIо цIыфхэм Iоф­шIэн яIэным имэхьанэ. Ащ пае респуб­ликэм Iофтхьэбзэ гъэ­нэфагъэхэр щызэрахьэх. Хэгъэгум и Правительствэ ыгъэнэфэгъэ Iофтхьабзэхэм яшIуагъэкIэ республикэм кIэу а лъэныкъомкIэ макIэп щызэшIуахы хъугъэр. Экономикэм тапэкIи хэхъоныгъэ зэришIырэм дакIоу илъэсэу къи­хьащтым цIыфхэм IофшIэн ягъэ­гъотыгъэнымкIэ Iофхэм язытет нахьышIу хъуным тыщэгугъы», — къыхигъэщыгъ КъумпIыл Мурат.

Адыгеим и ЛIышъхьэ къызэриIуа­гъэмкIэ, республикэм зы инвестиционнэ проекти къыщызэтырагъэуцуагъэп. Ары пакIошъ, проект инхэм япхырыщын ыкIэм фэкIо. ГущыIэм пае, 2023-рэ илъэсым республикэм IофшIэпIэ чIыпIакIэу мини 2-м ехъу иIэ хъущт. ТапэкIи а пчъагъэр нахьыбэ хъущт индустриальнэ паркымрэ къушъхьэлъэ гъэпсэфыпIэу «Лэгъонакъэрэ» яшIуагъэкIэ. Зэхэсы­гъом икIэуххэр зэфихьысыжьхэзэ, Адыгеим и ЛIышъхьэ пшъэрылъ заулэ афишIыгъ Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, Адыгэ Республикэм IофшIэнымрэ социальнэ хэхъоныгъэмрэкIэ иминистрэ ипшъэрылъхэр зыгъэцакIэу Мырзэ Джанбэч, джащ фэдэу цIыфхэм IофшIэн ягъэгъотыгъэнымкIэ Адыгэ Республикэм щыIэ ГъэIорышIапIэм ипащэу Галина Цыганковам. IофшIапIэхэм ащымытхыгъэхэу ащылажьэхэрэм къахьырэ зэрарыр ыкIи ащ пэуцужьыгъэн зэрэфаем, къэралыгъо программэхэр зэкIэ икъоу гъэцэкIэгъэнхэмкIэ, IофшIэн зымыгъотырэ цIыфхэм IэпыIэгъу ятыгъэнымкIэ шIэгъэн фаехэм КъумпIыл Мурат анаIэ атыраригъэдзагъ.

АР-м и ЛIышъхьэ ипресс-къулыкъу