ЗэгурыIоныгъэр агъэпытэ
Адыгеим къэралыгъо гъэпсыкIэ зиIэр илъэси 100 зэрэхъугъэм къыдыхэлъытагъэу Iофтхьабзэу «Урыс культурэм и Маф» зыфиIорэр республикэм щызэхащагъ.
Ащ фэгъэхьыгъ Iэнэ хъураеу «Через культуру — к согласию народов» зыфиIорэр Адыгэ къэралыгъо университетым щыкIуагъ. Ащ кIэщакIо фэхъугъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет.
Комитетым иотдел ипащэу Нэхэе Саидэ къызэриIуагъэмкIэ, Урысые Федерацием икъэралыгъо программэу «Лъэпкъхэм афэгъэхьыгъэ къэралыгъо политикэм ипхырыщын», АР-м икъэралыгъо программэу «Лъэпкъ зэфыщытыкIэхэр гъэпытэгъэнхэр, цIыфхэм патриотическэ пIуныгъэ ягъэгъотыгъэныр» зыфиIохэрэм атегъэпсыхьагъэу а Iофтхьабзэр зэхащэ. Ащ хэлэжьагъэх ыпшъэкIэ зигугъу къэтшIыгъэ комитетым итхьаматэу Шъхьэлэхъо Аскэр, философие шIэныгъэхэмкIэ докторэу Шъоджэ Асыет, искусствоведениемкIэ докторэу Алла Соколовар, филологие шIэныгъэхэмкIэ докторэу Беданыкъо Зулихъан, ушэтын гукъэкIхэмкIэ апшъэрэ еджапIэм идепартамент ипащэу Елена Куква, общественнэ организациехэм ялIыкIохэр, студентхэр.
Шъхьэлэхъо Аскэр зэрэхигъэунэфыкIыгъэмкIэ, лъэпкъхэм язэгурыIоныгъэ культурэмкIэ гъэпытэгъэным мэхьанэшхо иI. Джащ фэдэу урысые культурэмрэ лъэпкъ культурэ хабзэхэмрэ якъызэтегъэнэжьынкIэ проектэу агъэцакIэхэрэм ягугъу къышIыгъ.
ГущыIэр лъигъэкIотагъ Шъоджэ Асыет.
— НыбжьыкIэхэм якультурэ ыкIи ягушъхьэбаиныгъэ геополитическэ ыкIи социокультурнэ Iофыгъоу непэ къэуцухэрэм яягъэ екIы. Дунаеу тызщыпсэурэр зыкIэу зэрэщытыр къэралыгъохэм ащыщхэм къагурыIорэп. Культурэхэм язэдэгущыIэгъу иIофыгъо дунаим ыкIи урысые обществэм къызэращыуцугъэр лъэныкъуабэхэм япхыгъ. Ахэм зэу ащыщ Советскэ Союзыр зэрэзэхэзыгъэр, коронавирусым ипандемие зэрарэу зэрэдунаеу къафихьыгъэр. КъохьапIэм икъэралыгъохэу тизэкъотныгъэ зэщызыгъакъохэрэр, нэмыкIхэри, — къыIуагъ ащ.
Iэнэ хъураем хэлэжьагъэхэм къызэрэхагъэщыгъэмкIэ, культурэм игушъхьэбаиныгъэ цIыфхэм, социальнэ куп зэфэшъхьафхэм, этносхэм закъыхегъуатэ. Джырэ щыIакIэм елъытыгъэу лъэпкъ ыкIи этническэ культурэхэр зэхъокIыгъэх. Мыщ дэжьым лъэпкъ зэгурыIоныгъэр къызэтегъэнэгъэным пае культурэхэм язэдэгущыIэгъу имэхьанэ зыкъегъэIэтыгъэн фаеу мэхъу.
Урыс культурэм и Мафэ къыдыхэлъытэгъэ Iофтхьабзэхэр Адыгэ Республикэм и Къэралыгъо филармоние щылъагъэкIотагъэх.
Iэшъынэ Сусан.