Апэрэу зэхащагъ

ХэбзэухъумакIохэм къызэратырэмкIэ, мы аужырэ уахътэм тыгъон ыкIи гъэпцIагъэ зыхэлъ бзэджэшIа­гъэхэм япчъагъэ республикэм щыхэ­хъуагъ.

Ащ къыхэкIыкIэ УФ-м хэгъэгу кIоцI IофхэмкIэ и Министерствэ иотделэу Мыекъуапэ щыIэм ипащэу Сергей Логиновым унашъоу ышIыгъэм диштэу рес­публикэм икъэлэ шъхьаIэ пэшIорыгъэшъ Iофтхьабзэхэр щызэхащэнхэу рахъухьагъ.

Полицием иучастковэ уполномоченнэхэм Мыекъуапэ иурам шъхьаIэхэм атет тучанхэр, кафехэр, къэралыгъо организациехэр къакIухьагъэх, цIыфхэм пэшIорыгъэшъ задэгущыIэгъухэр адашIыгъэх. Зэ-­ кIэмкIи чIыпIи 180-мэ ащыIагъэх.

— Мыщ фэдэ Iофтхьабзэ апэрэу зэхэтщагъ ыкIи ащ елъытыгъэу социальнэ псэуалъэу къыхиубытагъэр багъэп. ТапэкIэ а пчъагъэми, хэбзэухъумакIоу хэлажьэхэрэми ахэдгъэхъощт, — къаIуагъ Мыекъуапэ иполицейскэхэм.

БзэджашIэхэм Интернетым иамалхэр къызфагъэфедэзэ цIыфыбэ агъапцIэ. А лъэныкъом шъунаIэ тежъугъэтын зэрэфаер хэбзэухъумакIохэм шъугу къагъэкIыжьы.

— Ахъщэу къышъуатыжьырэр къэшъулъытэжьыным шъудэмышъхьах. Сомэ мин, мини 2, мини 5 хъурэ банкнотхэр къышъуIэкIэхьагъэхэмэ, ахэм ­яномерхэр шъутхых. Ащ охътабэ ыхьыщт, ау шъу­къагъэпцIэным ищынагъо нахь макIэ хъущт, чIэнагъэ шъушIыщтэп, — къыхагъэщы хэбзэухъума­кIохэм.

Тучан инхэм, сатыушIыпIэ гупчэхэм Iоф ащызышIэхэрэми сакъыныгъэ къызхагъэфэн фае, сыда пIомэ мыхэм бэрэ ятыгъох.

Iофтхьабзэм къыдыхэлъытагъэу узэрэзекIон фаер зэрытхэгъэ хэушъхьафыкIыгъэ тхьапэхэр полицейскэхэм агощыгъэх.

ЯтIонэрэ едзыгъор рагъэжьагъ

Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытэгъэ феде­раль­нэ проектэу «ГъогурыкIоныр щынэгъончъэным» епхыгъэ Урысые кампаниеу «Расставь приоритеты!» зыцIэм иятIонэрэ едзыгъо чъэпыогъум и 3 — 7-м Адыгэ Республикэм щыкIуагъ.

ГъогурыкIоным ишапхъэхэр агъэцэкIэнхэм, гъогу зэпырыкIыпIэхэр щынэгъончъэу щытынхэм Iофтхьа­бзэр афытегъэпсыхьагъ. Проектым къыдыхэлъытэгъэ Iофтхьабзэхэр университетхэм, гурыт сэнэхьат зыщарагъэгъотырэ еджапIэхэм, республикам иавтошколхэм ащыкIуагъэх.

Участковэ анахь дэгъур къыхахыщт

УФ-м хэгъэгу кIоцI IофхэмкIэ и Министерствэ кIэщакIо зыфэхъугъэ Урысые зэнэкъокъоу «Народный участковый-2022» зыфиIорэм иятIо­нэрэ едзыгъо Адыгеим щылъа­гъэкIуа­тэ. Хабзэ зэрэхъугъэу, Iофтхьабзэр уцугъуищэу зэтеутыгъ.

Апэрэ едзыгъор Iоныгъом и 11-м щегъэжьагъэу и 20-м нэс муниципалитетхэм ащыкIуагъ. КъулыкъушIэ анахь дэгъухэр чIыпIэхэм къащыхахыгъэх.

ЯтIонэрэ уцугъом къыдыхэлъытагъэу АР-м хэгъэгу кIоцI IофхэмкIэ и Министерствэ исайт шъуихьанышъ, шъугу рихьырэ къулыкъушIэм шъумакъэ фэшъутын амал шъуиI.

Чъэпыогъум и 16-м нэс ар кIощт.

Чъэпыогъум и 7-м щыублагъэу онлайн шIыкIэм тетэу цIыфхэм амакъэ атын алъэкIыщт. Ахэм анахьэу зыдырагъэштэгъэ, амакъэ зыфатыгъэ къулы­къушIэр къэнэфэщт. ТекIоныгъэр къыдэзыхыгъэм Адыгеир ящэнэрэ федеральнэ едзыгъом къыщигъэлъэгъощт.

Полициемрэ обществэмрэ зэпхыныгъэу яIэр гъэ­пытэгъэным, цIыфхэм хэбзэухъумакIохэм цыхьэу афашIырэм хэгъэхъогъэным, мы къулыкъум имэхьанэ зыкъегъэ!этыгъэным фэIорышIэ илъэс пчъагъэ хъугъэу зэхащэрэ зэнэкъокъур.

Хэбзэгъэуцугъэм диштэу...

Донецкэ ыкIи Луганскэ народнэ республикэхэм, Украинэм къары­кIыгъэхэр АР-м хэгъэгу кIоцI Iоф­хэмкIэ и Министерствэ кощын Iоф­хэмкIэ и ГъэIорышIапIэ рагъэблэ­гъагъэх. Пшъэрылъ шъхьаIэу зэдэгущыIэгъум иIагъэр Урысыем ущыпсэунымкIэ хэбзэгъэуцугъэм къыдилъытэрэ шапхъэхэр цIыфхэм алъыгъэIэсыгъэныр, цIыфхэр зыгъэгумэкIырэ упчIэхэр зэхэфыгъэнхэр ары.

Закъыфэзыгъэзэгъэ нэбгырэ пэпчъ иIофыгъо хэ­бзэухъумакIохэм зэхафыгъ, ахэм яупчIэхэм джэуапхэр къаратыжьыгъ. Адыгеим къихьагъэхэм анахьэу анаIэ зытырагъэтын фэе лъэныкъохэр агу къагъэ­кIыжьыгъэх.

МыцыхьэшIэгъу пкъыгъохэр зышъулъэгъухэкIэ шъузэрэзекIон фаер

ЦIыфыбэ зыщызэрэугъоирэ чIыпIэхэм ащыщ мыцыхьэшIэгъоу пкъыгъо зыщы­шъулъэгъукIэ, шъублэмыкI. Гъунэгъоу щытхэм ащыщ иемэ шъукIэупчI, арэу­щтэу зымыхъурэм, полицием макъэ ежъугъэIу.

Зыщышъумыгъэгъупш:

— къэжъугъотыгъэ пкъыгъор къызэкIоцIышъумых ыкIи шъумыгъэкощы; — пкъыгъор зиер, амал иIэмэ, зэжъу­гъашIэ;­ — зиер къэшъумыгъотыгъэмэ, полицием макъэ ежъугъэIу; — гъунэгъоу щыт цIыфхэм зэлъяжъугъашI мыцыхьэшIэгъу пкъыгъо зэрэщылъыр; — нахь чыжьэу IукIынхэу яшъуIу.

Джыри зэ шъугу къэтэгъэкIыжьы!

Ны-тыхэр! ШъуикIэлэцIыкIухэм ящыIэныгъэкIэ

ыкIи япсауныгъэкIэ шъоры пшъэдэкIыжь зыхьырэр. Ахэм агурыжъугъаIу сыд фэдэрэ пкъыгъоу урамым къытырагъуатэрэм щынагъо къыхэкIын зэрилъэкIыщтыр. Къэжъугъотрэ пкъыгъохэм шъхьафитэу шъуа­дэземыкIу.

НэкIубгъор зыгъэхьазырыгъэр Тхьаркъохъо Адам.