Адыгэ Республикэр зызэхащагъэр илъэс 31-рэ ыкIи Адыгеим къэралыгъо гъэпсыкIэ зиIэр илъэси 100 зэрэхъугъэм афэгъэхьыгъэ мэфэкI зэхахьэ АР-м и Къэралыгъо филармоние щыкIуагъ. Къэзэрэугъоигъэхэм, шъолъырым щыпсэухэрэм къафэгушIуагъ республикэм и ЛIышъхьэу КъумпIыл Мурат.

Iофтхьабзэм хэлэжьагъэх Урысыем и Президент и Полномочнэ лIыкIоу Къыблэ федеральнэ шъолъырым щыIэм игуадзэу Владимир Гурба, АР-м и Къэралыгъо Совет – Хасэм и Тхьаматэу Владимир Нарожнэр, Адыгеим ипэщагъэхэу Джарымэ Аслъанрэ ТхьакIущынэ Аслъанрэ, АР-м и Парламент идепутатхэр ыкIи министрэхэм я Кабинет хэтхэр, федеральнэ хэбзэ къулыкъухэм ялIыкIохэр, нэмыкIхэри.

Джащ фэдэу мэфэкI зэхахьэм къеблэгъагъэх тилъэпкъэгъухэр зыщыпсэухэрэ Тыркуем и Парламент хэтхэм ащыщхэр, мы къэралыгъом ибизнесменхэр, Израиль, Сирием, Абхъазым ащыIэ адыгэ общественнэ орга­низациехэм ялIыкIохэр, Урысыем ичIыпIэ зэфэшъхьафхэм — Краснодар краим, Къэбэртэе- Бэлъкъарым, Къэрэщэе-Щэр­джэсым, Ростов хэкум, Те­мыр Осетием — Аланием, Став­рополь краим ыкIи Санкт-Петербург къарыкIыгъэхэр.

Владимир Гурба гущыIэр зештэм Урысыем и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым ыцIэкIэ къэзэрэугъоигъэхэм шIуфэс гущыIэхэмкIэ закъыфигъэзагъ. Адыгэ Республикэр ишэн-хабзэхэм атемыкIэу хэхъоныгъэшIухэр зэришIыхэрэр, социальнэ-экономикэ лъэныкъомкIэ, мэкъумэщ ыкIи индустриальнэ къыдэгъэкIынымкIэ амалышIу­хэр зыIэкIэлъ шъолъырэу зэрэщытыр ащ хигъэунэфыкIыгъ.

— Республикэр инвестициехэм алъэныкъокIэ хъопса­гъоу щыт, непэрэ шапхъэхэм адиштэрэ транспорт инфраструктурэ гъэпсыгъэнымкIэ проектышхохэр щыпхыращых. Джащ фэдэу зекIоным хэхъо­ныгъэ ышIынымкIэ амалэу IэкIэлъхэр дэгъоу егъэфедэх. Ау пстэуми анахь шъхьаIэр, Адыгеим сэнаущыгъэ зыхэлъ ыкIи IофшIэныр зугу рихьырэ цIыфхэр зэрэщыпсэухэрэр ары. Мыхэм унагъом, ныбджэгъуныгъэм мэхьанэшхо раты, гъунэгъур агъэлъапIэ, — къыщеIо шIуфэс тхыгъэм.

Адыгеим и ЛIышъхьэу КъумпIыл Мурат къызэриIуагъэмкIэ, республикэм илъэсишъэ гъогоу къыкIугъэр Урысыем итарихъ пытэу епхыгъ. Адыгеим щыпсэухэрэр сыдигъуи зэкъотхэу, лъэпкъхэм якультурнэ-тарихъ кIэн къаухъумэзэ ыпэкIэ лъыкIотагъэх.

— Адыгэхэм автономие яIэ зэрэхъугъэм амалышIухэр къыкIэлъыкIуагъэх. Якультурэ къызэраухъумэщтым дакIоу, тхэным, бзэм, лъэпкъ литературэм ыкIи искусствэм хэхъоныгъэ ашIын, ятарихъ ыкIи якультурэ аушэтын амал аIэкIэлъ хъугъэ, — къыхигъэщыгъ республикэм ипащэ.

Зэрэ Урысые фэдэу, тирес­публикэ ис лъэпкъ зэфэшъхьаф­хэм азыфагу ныбджэгъуныгъэрэ зэгурыIоныгъэрэ зэрилъыр КъумпIыл Мурат къыхигъэщыгъ. Ащ фэдэ зэфыщытыкIэм, зыкIы­ныгъэм ишIуагъэкIэ тицIыфхэм Хэгъэгу зэошхом ТекIоныгъэр къыщыдахыгъ.

— Урысыем и Президентэу Владимир Путиным пшъэ­рылъэу къытфишIыгъэхэм такъыпкъырыкIызэ тиIоф­шIэн непэ тэгъэпсы. Мурад шъхьа­Iэу тиIэр республикэм щыпсэурэ нэбгырэ пэпчъ щы­IэкIэшIу иIэныр ары, — къыхигъэщыгъ Адыгеим и ЛIышъхьэ.

Федеральнэ гупчэм иIэпыIэгъукIэ республикэм хэхъоныгъэ­шIухэр ышIыгъэх. Аужырэ шапхъэхэм адиштэрэ еджапIэхэр, кIэлэцIыкIу IыгъыпIэхэр, сы­мэджэщхэр, фельдшер-мамыку IэзапIэхэр, культурэм иучреждениехэр, спортивнэ комплексхэр щашIых. Щагухэр, чIыпIэхэр зэтырагъэпсыхьэх, гъогухэм язытет нахьышIу мэхъу.

— Непэ республикэм щыкIорэ зэхъокIыныгъэхэм тицIыфхэр чанэу къахэлажьэх. Цыхьэ зэфэтэшIыжьы, зэгуры­Iоныгъэ тазыфагу илъ, арышъ тызэгъусэмэ, зэшIотхыщтыр бэ, — къыIуагъ КъумпIыл Мурат.

Джащ фэдэу мэфэкI зэхахьэм хэлэжьагъэхэм шIуфэс гущы­IэхэмкIэ закъыфигъэзагъ АР-м и Къэралыгъо Совет — Хасэм и Тхьаматэу Владимир Нарожнэм.

Iофтхьабзэр искусствэм иIэпэIасэхэм къагъэхьазырыгъэ концертымкIэ зэфашIыжьыгъ.

Адыгеим и ЛIышъхьэ ипресс-къулыкъу.

Сурэтхэр А. Гусевым тырихыгъэх.