Адыгеим и Мафэ ипэгъокIэу къэралыгъо ыкIи республикэ тынхэмкIэ къыхагъэщыгъэхэм ахэр къэзыушыхьатырэ тхылъхэмрэ бгъэхалъхьэхэмрэ республикэ филармонием щаратыжьыгъэх.

АР-м и ЛIышъхьэу КъумпIыл Мурат пэублэ псалъэу ащ къыщишIыгъэм УФ-м и Президент, Правительствэм ыкIи УФ-м и Федеральнэ ЗэIукIэ яIэпыIэгъукIэ къэралыгъом ипащэу Владимир Путиным пшъэрылъэу къыгъэуцухэрэр респуб­ликэм зэрэщагъэцакIэхэрэр, УрысыемкIи, АдыгеимкIи мэхьанэшхо зиIэ проектхэр зэрэщыпхыращыхэрэр къыщыхигъэщыгъ.

— Республикэм цIыфэу исхэм яIоф­шIэн, яхэгъэгу, ячIыгу шIулъэгъоу афыряIэр ары экономикэм, социальнэ сферэм алъэныкъокIэ гухэлъ анахь инхэри пхырыщыгъэнхэу зыкIэхъурэр. Шъощ фэдэу исэнэхьат, обществэм, республикэм, къэралыгъом псэемыблэжьэу Iоф афэзышIэхэрэм шэн шъхьаIэу шъухэлъыр Адыгеим инепэрэ ыкIи инеущырэ мафэ шъузэригъэгумэкIырэр ары, — къыIуагъ КъумпIыл Мурат.

Пандемием илъэхъан медицинэм иIофышIэхэм лIыхъужъ шъыпкъэу зыкъы­зэрагъэлъэгъуагъэр республикэм ипащэ къыкIигъэтхъыгъ. Профессионализмэгъэ ин хэлъэу коронавирусым зызщиушъом­бгъурэ лъэхъаным цIыфхэм IэпыIэгъу ятыгъэным иIахьышхо зэрэхилъхьагъэм фэшI Пироговым иорден къыфагъэшъошагъэу ритыжьыгъ Адыгэ республикэ сымэджэщым иврачэу Нэхэе Мирэ.

Джащ фэдэу медицинэм иIофышIэу щытхъуцIэ къызфагъэшъошагъэхэм ащыщых адэбз узхэм зыщяIазэхэрэ Адыгэ республикэ сымэджэщым ирадиотерапевтэу Людмила Алдонинар, Мыекъопэ къэлэ сымэджэщым хирургиемкIэ иотделение ипащэу Геннадий Бабичевыр, Адыгэ республикэ клиническэ сымэджэщым нейрохирургиемкIэ иотделение ипащэу Хьатх Марат.

ЧIыпIэ зыгъэIорышIэжьын IофшIэным, цIыфхэр социальнэу къэухъумэгъэнхэм язегъэушъомбгъун мымакIэу яIахь зэрэхалъхьагъэм фэшI «За заслуги перед Отечеством» зыфиIорэ орденым имедалэу я II-рэ шъуашэ зиIэр къафагъэшъошагъ Кощхьэблэ район администрацием ипащэу Хьамырзэ Заур, АР-м и Къэралыгъо Совет — Хасэм социальнэ политикэмкIэ, унагъом иIофхэмкIэ, псауныгъэм икъэухъумэнкIэ ыкIи культурэмкIэ и Комитет ипащэу Наталья Широковам.

УФ-м и Президент ирэзэныгъэ тхылъкIэ къыхагъэщыгъэх Мыекъопэ къэлэ администрацием ипащэ иапэрэ гуадзэ иIэнатIэ зыгъэцэкIэрэ Сергей Стельмах, Адыгэ къэралыгъо университетым иректорэу Мамый Даутэ.

УФ-м и Президент ищытхъу тхылъ къыфагъэшъошагъ АР-м и ЛIышъхьэ ыкIи Адыгеим иминистрэхэм я Кабинет я Администрацие федеральнэ хэбзэ къулыкъухэм зэпхыныгъэ адыряIэнымкIэ ыкIи политикэ кIоцIымкIэ и ГъэIорышIапIэ ипащэ игуадзэу Бэгъ Людмилэ.

Адыгэ къэралыгъо университетым илIыкIоу Алла Соколовар тын лъапIэкIэ къыхагъэщыгъ. Ащ «УФ-м иапшъэрэ еджапIэ изаслуженнэ IофышI» зыфиIорэ цIэр къыфагъэшъошагъ.

Егъэджэн IофшIэным яIахьэу халъхьа­гъэм пае «УФ-м изаслуженнэ кIэлэ­егъадж» зыфиIорэр къафагъэшъошагъ Людмила Портненкэмрэ Аннета Литвиновамрэ.

— Сыд фэдэрэ лъэхъани IофшIакIэ зэрашIэрэмкIэ Адыгеим ис цIыфхэр къахэщыщтыгъэх. ШIэныгъэу, опытэу шъуиIэм, профессионализмагъэу шъу­хэлъым тапэкIи республикэм хэхъоныгъэ инхэр зэришIыщтхэм цыхьэ фыуагъэшIы, — къыIуагъ КъумпIыл Мурат.

Джащ фэдэу Адыгеим къэралыгъо гъэпсыкIэ зиIэр илъэси 100 зэрэхъу­гъэм пае къыдагъэкIыгъэ медальхэр афагъэшъошагъэх Урысыем IофшIэнымкIэ и ЛIыхъужъэу МэщбэшIэ Исхьакъ, Адыгеим и Президентыгъэу Джарымэ Аслъан, АР-м и ЛIышъхьагъэу, Къэралыгъо упчIэжьэгъоу ТхьакIущынэ Аслъан, АР-м и Къэралыгъо Совет – Хасэм и Тхьаматэу Владимир Нарожнэм, АР-м инахьыжъхэм я Совет итхьаматэу ГъукIэлI Нурбый, Къыблэ дзэ шъолъырым и Зэхэубытэгъэ стратегическэ командование иинспектор куп хэтэу Александр Дорофеевыр, Iоф­шIэным иветеранэу Дзыбэ Кимэ, цIыфхэм яфитыныгъэхэр къэухъумэгъэнхэмкIэ Уполномоченнэу АР-м щыIэ Анатолий Осокиным, АР-м иветеранхэм я Совет итхьаматэу Къоджэ Аслъан, АР-м ихьыкум системэ иветеранхэм я Совет итхьаматэу Трэхъо Аслъан, гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм идиректорэу ЛIыIужъу Адамэ.

«Адыгеим и Щытхъузехь» зыфиIорэ медалымкIэ къыхагъэщыгъэх АР-м и Къэралыгъо Совет – Хасэм зекIонымкIэ, экологиемкIэ ыкIи чIыопсым игъэфедэнкIэ и Комитет ипащэу Евгений Саловыр, медицинэ IэпыIэгъу псынкIэм и Адыгэ республикэ станцие икъутамэу Шэуджэн районым щыIэм ифельдшерэу Хьао Аминэт, АР-м инахьыжъхэм я Совет хэтэу Геннадий Флоринскэр, «Союз нефтегазопромышленников России» зыфиIорэ Общественнэ организацием игъэцэкIэкIо директорэу ГъукIэлI Хьисэ, естественнэ-хьисап республикэ еджапIэм ипащэ игуадзэу Мамыщ Юрэ, ООО-у «Монтаж» зыфиIорэм иэлектрогазосварщикэу Андрей Воробьевыр.

Сурэтхэр А. Гусевым тырихыгъэх.