АР-м и ЛIышъхьэу КъумпIыл Мурат республикэм щыщэу мобилизацием хэфагъэхэр зыщагъэхьазырхэрэ я 227-рэ артиллерийскэ бригадэм щыIагъ.

Ащ игъусагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, АР-м идзэ комиссарэу Александр Авериныр, Къыблэ дзэ шъолъырым и Зэхэубытэгъэ стратегическэ командование иинспектор куп хэтэу Юрий Колягиныр.

АР-м и ЛIышъхьэ дзэ къулыкъум ащэгъэ тичIыпIэгъухэм гущыIэгъу афэ­хъугъ, ящыкIагъэр зэкIэ арагъэгъотыгъэ­мэ, псэукIэ амал тэрэзхэр аратыгъэхэмэ кIэупчIагъ.

— Непи, хэушъхьафыкIыгъэ дзэ операциер зыщыкIорэ чIыпIэм шъуа­щагъэми IэпыIэгъу тышъуфэхъуным тыфэхьазыр, щыгъынэу, оборудованиеу, Iэзэгъу уцэу, гъомылапхъэу шъуи­щыкIэгъэщтыр икъоу къышъуIэ­кIэдгъэхьаным ыуж титыщт. УФ-м и Президентэу, Апшъэрэ Главнокомандующэу Владимир Путиным пшъэ­рылъэу къыгъэуцугъэхэр жъугъэцэ­кIэнхэшъ, шъупсаоу, шъуузынчъэу къэжъугъэзэжьыныр пстэумэ анахь шъхьаI, — къыIуагъ КъумпIыл Мурат.

ДзэкIолIхэм яунагъохэми IэпыIэгъу зэрафэхъущтхэр ЛIышъхьэм къыхигъэщыгъ. Ежь кIалэхэр къызкIэлъэIугъэхэр джа чIыпIэ дэдэм волонтерхэм къаугъо­игъэх, ахэр муниципалитетхэм аIэкIагъэ­хьащтых, хэзыгъэ имыIэу зэкIэри гъэцэкIагъэ хъуным ЛIышъхьэм ынаIэ тетыщт.

Республикэм ипащэ пшъэрылъ афишIыгъэу, АР-м и ЛIышъхьэ ыкIи министрэхэм я Кабинет я Администрациерэ дивизионэу зэхащагъэм икомандиррэ зэпхыныгъэ зэдыряIэщт. Къыхэдгъэщын, партиеу «Единэ Россием» иIэпыIэгъукIэ мобилизацием хэфагъэхэм апае щазмэхэр, ощхым ущызыухъумэщт щыгъынхэр, аптечкэхэр, нэмыкIэу ящыкIэгъэщтхэр нахьыпэкIэ къащэфыгъэх.

АР-м и ЛIышъхьэ ипресс-къулыкъу.