Адыгеим и ЛIышъхьэу КъумпIыл Мурат республикэм и Правительствэ зычIэт унэм Тыркуем и Лъэпкъ ЗэIукIэшхо идепутатхэмрэ Кавказым ипредпринимательхэм я Ассоциацие (КАФИАД) хэтхэмрэ зэIукIэгъу щадыриIагъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м и Премьер-министрэ ипшъэрылъхэр зыгъэцакIэу КIэрэщэ Анзаур, АР-м иминистрэхэм я Кабинет хэтхэр, Тыркуем и Лъэпкъ ЗэIукIэшхо идепутатэу Байбатур Мурат, Тыркуем игенеральнэ консулэу Новороссийскэ щыIэ Байяр Фырат, КАФИАД-м итхьаматэу Таймаз Юсыф ыкIи нэмыкIхэр.

Тыркуем илIыкIохэу зэIукIэгъум хэлэжьагъэхэр Адыгеим щыпсэухэрэмрэ ащ ипащэхэмрэ къафэгушIуагъэх къэралыгъо гъэпсыкIэ зяIэр илъэси 100 зэрэхъугъэм фэшI ыкIи респуб­ликэм тапэкIи хэхъоныгъэшхо­-хэр ышIынэу къыфэлъэIуагъэх.

Адыгеим къызэрэкIуагъэхэм фэшI хьэкIэ лъапIэхэм зэрафэразэр ариIуи, тиреспубликэ Тыркуем лъэныкъо зэфэшъхьаф­хэмкIэ зэдэлэжьэныгъэу дыриIэм зызэрэригъэушъомбгъурэр Къум­пIыл Мурат къыхигъэщыгъ.

«Тикъэралыгъохэм япащэхэу Владимир Путинымрэ Реджеп Эрдоганрэ язэпхыныгъэхэм нахь заушъомбгъу. IэкIыб къэралыгъо­хэм, адыгэ нэбгырэ миллион пчъагъэ зыщыпсэурэ Тыркуери ахэм зэрахэтэу, зэпхыныгъэу адытиIэр гъэпытэгъэнэу федеральнэ гупчэм зэрилъытэрэм Адыгейми дырегъаштэ», — къыIуагъ КъумпIыл Мурат.

ЭкономикэмкIэ хэгъэгуитIуми зэдэлэжьэныгъэу зэдыряIэм зегъэушъомбгъугъэнымкIэ Урысые-тырку парламент купым мэхьанэшхо зэриIэр респуб­ликэм ипащэ къыхигъэщыгъ. 2019-рэ илъэсым имэлылъфэгъу Адыгеим илIыкIо куп Тыркуем зэрэкIогъагъэм зэфыщытыкIэхэр нахьышIу зэрэхъухэрэр къыгъэлъэгъогъагъ.

КъумпIыл Мурат зэрэхигъэу­нэфыкIыгъэмкIэ, социальнэ инф­раструктурэм зегъэушъомбгъугъэнымкIэ, хэгъэгуитIуми ащыпсэухэрэр нахь зэпэблагъэ шIыгъэнхэмкIэ экономикэ, инвес­тиционнэ проектхэу зэ­дагъэцакIэхэрэр, культурэ- гуманитар зэпхыныгъэу зэдыряIэхэр амалышIоу щытых.

«Адыгеим къэралыгъо гъэ­псыкIэ иIэ зыхъугъэм ия 100-рэ илъэс мыгъэ хэтэгъэунэфыкIы. Къихьащт илъэсым Тыркуер зызэхащагъэр илъэси 100 хъущт. Ахэр мэхьанэшхо зиIэ хъугъэ-шIагъэх. Адыгеимрэ Тыркуемрэ тапэкIи язэпхыныгъэхэр нахь зэрэпытэщтхэм, язэфыщытыкIэхэм зызэрау­шъомбгъущтым тицыхьэ телъ», — къыIуагъ КъумпIыл Мурат.

АР-м и Къэралыгъо Совет –— Хасэм и Тхьаматэу Владимир Нарожнэм хьакIэхэм шIу­фэс къарихи, бизнесымкIи, культурэмкIи Iофтхьабзэу зэрахьащтхэм адыгэхэу Тыркуем щыпсэухэрэр чанэу къазэрахэлэжьэщтхэм ицыхьэ зэрэтелъыр къы­Iуагъ.

«Зэдэлэжьэныгъэ зэрэзэдытиIэ лъэныкъо шъхьаIэхэмкIэ зызэрэжъугъэчанырэм фэшI республикэм и Къэралыгъо Совет — Хасэм идепутатхэм ацIэкIэ «тхьаегъэпсэушхо» шъосэIо», — къыIуагъ Владимир Нарожнэм.

Тыркуем къикIыгъэхэу Байбатур Мурат, Байяр Фырат, Таймаз Юсыф ыкIи нэмыкIхэри зэIукIэгъум къыщыгущыIагъэх. БизнесымкIи культурэмкIи язэдэ­лэжьэныгъэ зырагъэушъомбгъу, къэралыгъуитIуми язэпхыныгъэ­хэр агъэпытэ зэрашIоигъор хьакIэхэм къаIуагъ.

«Тыркуемрэ Урысыемрэ ащыпсэурэ адыгэхэм язэдэлэжьэныгъэ хэгъэгуитIумкIи федэу щыт. Тилъэпкъ къы­хэкIыгъэхэм къэралыгъо хабзэм икъулыкъухэм IэнатIэхэр ащаIыгъых, экономикэмкIи, социальнэ лъэныкъомкIи, культурэмкIи зэпхыныгъэу адыряIэм нахь зызэрэрагъэу­шъомбгъущтым пылъых», — къыIуагъ Тыркуем и Лъэпкъ ЗэIукIэшхо идепутатэу Байбатур Мурат.

«ИлъэситIукIэ узэкIэIэбэжьмэ республикэм тыкъэкIо­гъагъ. ЗэIукIэгъу зэдытиIэ къэс хэгъэ­гуитIуми яфедэ зыхэлъ проектхэм ягъэцэкIэнкIэ гъэхъагъэу тиIэхэр нахь къэлъагъох. ТапэкIи тизэпхыныгъэхэм язе­гъэушъомбгъун лъэшэу тынаIэ тедгъэтыщт», — къы­Iуагъ Тыркуем игенеральнэ консулэу Новороссийскэ щыIэ Байяр Фырат.

«Республикэм къэралыгъо гъэпсыкIэ зэриIэр илъэси 100 зыщыхъурэм Адыгеим тыкъы­зэрэкIуагъэр лъэшэу тигуап. Мы хъугъэ-шIэгъэшхом тизэпхыныгъэхэм нахь зызэрау­шъом­бгъущтым игугъапIэ къып­хелъхьэ», — къыхигъэ­щыгъ КАФИАД-м итхьаматэу Таймаз Юсыф.

Адыгеимрэ Тыркуемрэ сатыу- экономикэ зэдэлэжьэныгъэу зэдыряIэм епхыгъэ нэмыкI Iофы­гъохэми зэIукIэгъум щатегущы­Iагъэх.