Адыгеим и ЛIышъхьэу КъумпIыл Мурат Сирием и Адыгэ шIушIэ обществэ ипащэхэм, Израиль ит къуаджэу Кфар-Камэ и Адыгэ Хасэ иIофшIэн чанэу хэлажьэхэрэм ащыщхэм республикэм и Правительствэ и Унэ зэIукIэгъу щадыриIагъ.

Ащ хэлэжьагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэ­лэхъо Аскэр.

Адыгэ шIушIэ обществэм ипащэу Шорэ Хьасан республикэм къэралыгъо гъэпсыкIэ иIэ зыхъугъэм ия 100-рэ илъэс епхыгъэу Адыгеим ипащэхэм ыкIи щыпсэухэрэм къафэгушIуагъ, тапэкIи хэхъоныгъэхэр ашIынхэу, Сирием ис тилъэпкъэ­гъухэм блэгъэныгъэ-къошныгъэ зэпхыныгъэхэу адыриIэхэр нахь пытэнхэу къафэлъэIуагъ.

Адыгэ шIушIэ обществэм анахь чанэу хэлажьэхэрэм ащыщхэу, непэ Къэ­бэртэе-Бэлъкъарым щыпсэухэрэ Барсик Арфан, МэщфэшIу Хишам, Шорэ Хьуссам зэрэдунаеу щыпсэурэ адыгэхэм IофшIэным ыкIи культурэм япхыгъэ зэдэлэжьэны­гъэу азыфагу илъым зегъэушъомбгъугъэным амалышIухэр къызэритыщтхэм яцыхьэ зэрэтелъыр къыхагъэщыгъ.

КъызэраIуагъэмкIэ, непэ Сирием и Адыгэ Хасэ къутэми 5 иI. Дамаскэ дэт Адыгэ Хасэр анахьыжъхэм ащыщ, 1948-рэ илъэсым ар зэхащэгъагъ. Адыгабзэм идиалектхэр зэкIэ зэгъэшIэгъэнхэм, культурэмрэ шэн-хабзэхэмрэ къэухъумэгъэнхэм алъэныкъокIэ зэкIэми IофшIэнышхо агъэцакIэ.

Республикэм и ЛIышъхьэ къызэрэкIуа­гъэхэм пае зэрафэразэр хьакIэхэм ариIуагъ, шIоу щыIэр къадэхъунэу, ягухэ­лъышIухэр пхыращынхэу афиIуагъ, Адыгеим, Къэбэртэе-Бэлъкъар Респуб­ликэм, Къэрэщэе-Щэрджэс Республикэм ыкIи Краснодар краим арыс адыгэхэм зэпхыныгъэ ренэу адыряIэным мэхьанэшхо зэриIэр къыхигъэщыгъ.

«Дунаим тет адыгэ пстэуми цIыфхэу, лъэпкъхэу тыздэпсэухэрэм ящыIакIэ нахьышIу шIыгъэным игупшысэ тызэрипхын фае. Тигуапэ Адыгеим къэралыгъо гъэпсыкIэ иIэ зыхъугъэм ия 100-рэ илъэс тефэу шъуитарихъ чIыгу шъукъэкIон зэрэшъулъэкIыгъэр. Сирием щыпсэурэ адыгэ пстэуми тыгу илъ гущыIэ фабэхэр анэжъугъэ­сыжьых», — къыIуагъ КъумпIыл Мурат.

Республикэм и ЛIышъхьэ а мэфэ дэдэм зэIукIэгъу адыриIагъ Кфар-Камэ и Адыгэ Хасэ итхьаматэу Нэпсэу Зэчэрыерэ ишъхьэгъусэу, общественнэ организацием зиIахьышIу хэзышIыхьэрэ Нэпсэу Назикрэ.

Гуфэбэныгъэ хэлъэу Адыгеим къызэращыпэгъокIыгъэхэм пае зэрафэразэхэр хьакIэхэм къаIуагъ, республикэми цIыфхэу ащ щыпсэухэрэми ящыIэкIэ-псэукIэ нахьышIу хъунэу, ягъэхъагъэхэм ахэхъо зэпытынэу къафэлъэIуагъэх. КъызэрэхагъэщыгъэмкIэ, Израиль адыгэ мини 3,5-рэ фэдиз щэпсэу, ахэми яшIуфэс фабэхэр республикэм июбилей ехъулIэу лIыкIохэм къалъагъэIэсыгъ.

Джащ фэдэу адыгэхэр анахьыбэу зы­щы­псэухэрэ Кфар-Камэ, Рихьание, Ап­шъэ­рэ Галилее адэс адыгэхэм лъэпкъ шэн-хабзэхэр къэухъумэгъэнхэм ренэу анаIэ зэрэтырагъэтырэр къыхагъэщыгъ. Журналэу «Черкес» зыфиIорэр ивритыбзэкIэ ыкIи адыгабзэкIэ Хасэм къыщыдагъэкIы.

«Адыгэхэу Израиль щыпсэухэрэм, хабзэ зэрэхъугъэу, обществэм лъытэныгъэ къащыфешIы, политикэ, общественнэ ыкIи культурнэ лъэныкъохэми ахэм чIыпIэшхо ащаубыты. Израиль икъэралыгъо хабзэ илIыкIохэм хэгъэгум ищыIэныгъэ адыгэхэм чIыпIэ хэхыгъэ зэрэщаубытырэр мызэу, мытIоу къызэрэхагъэщыгъэр лъэшэу тигуапэ», — къыIуагъ КъумпIыл Мурат. Сириемрэ Израильрэ ащыпсэурэ адыгэхэм ялIыкIохэм заIокIэм республикэм и ЛIышъхьэу КъумпIыл Мурат нэпэеплъ медалэу «Адыгэ Республикэр зызэхащагъэр илъэси 100 хъугъэ» зыфиIорэр нэбгырэ пэпчъ ритыгъ. Ащ къызэрэхигъэщыгъэмкIэ, хэгъэгухэу зыщыпсэухэрэм IофшIэнымкIи культурэм ылъэныкъокIи гъэхъагъэхэр ашIынхэм епхыгъэ Iоф­тхьабзэу зэшIуахыхэрэм чIыпIэшхо адыгэхэми щаубыты.

Адыгеим и ЛIышъхьэу ятIонэрэ пIалъэ­кIэ хадзыжьыгъэм шъхьафэу хьакIэхэр фэлъэIуагъэх гъэхъэгъэшхохэр ышIынхэу, гухэлъэу рихъухьагъэхэр зэкIэ щыIэныгъэм щыпхырищынхэу, Урысые Федерацием ишъолъырхэм зыкIэ ащыщэу щыт республикэм тапэкIи хэхъоныгъэ ышIынэу. АР-м и ЛIышъхьэ ипресс-къулыкъу