Адыгеим и ЛIышъхьэу КъумпIыл Мурат Тыркуем игенеральнэ консулэу Новороссийскэ щыIэм, Тыркуем и Лъэпкъ ЗэIукIэшхо ыкIи Кавказ предпринимательхэм я Ассоциацие (КАФИАД-м) ялIыкIохэм заIокIэм республикэм иинвестиционнэ проектитIумэ нэIуасэ афишIыгъэх. 2019-рэ илъэсым зэрэрахъухьагъэм тегъэпсыхьагъэу Тыркуем ибизнесменхэр Адыгеим къэкIуагъэх. Адыгеимрэ Тыркуемрэ ясатыу-экономикэ зэдэлэжьэныгъэ илъэныкъо шъхьаIэхэм къатегущыIагъ Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Шэуджэн Заур.

КъызэрэхагъэщыгъэмкIэ, 2022-рэ илъэсым иапэрэ кIэлъэныкъо Адыгеимрэ Тыркуемрэ IэкIыб къэрал сатыум епхыгъэ пкъыгъо зэфэшъхьафэу зэIэкIагъэхьагъэр доллар миллиони 5,6-м фэдиз, илъэсэу икIыгъэм елъытыгъэмэ, ар фэдитIукIэ нахьыб. Мы илъэсыр къызихьагъэм къыщыублагъэу Тыркуем Адыгеим къы­IэкIигъахьэрэр процент 14-кIэ нахьыбэ хъугъэ. Ахэм ахэхьэх фарфорыр, цэфыр, шъхьаныгъупчъэхэм яшIынкIэ агъэфедэхэрэр, хьакъу-шыкъу лъэпкъхэр ыкIи нэмыкIхэр.

Адыгеим 2021-рэ илъэсым къыщыублагъэу 2022-рэ илъэсым нэс Тыркуем IэкIигъэхьагъэхэм ащыщых коцыр, хьэр, пынджыр, картоныр, шIомыкIыр ыкIи нэмыкIхэр. Апэрэ илъэсныкъом икIэуххэм къызэрагъэлъэгъуагъэмкIэ, доллар миллиони 2,5-рэ фэдиз хъугъэ товарэу Тыркуем IэкIигъэхьагъэр.

Тэхъутэмыкъое районым щашIыщт индустриальнэ паркым, джащ фэдэу къушъхьэлъэ гъэпсэфыпIэу «Лэгъонакъэ» щагъэпсыщтым япхыгъэ инвестиционнэ проектхэр шъхьафэу хьакIэхэм арагъэлъэгъугъэх.

КъызэрэхагъэщыгъэмкIэ, гектари 194-м ехъу зыубытыщт индустриальнэ паркым логистикэмкIэ, гъомылапхъэхэр, мебелыр, чIыдагъэмрэ газымрэ япхыгъэ оборудованиер, псэолъапхъэхэр ыкIи нэмыкIхэр къы­дэзгъэкIыщт предприятиехэр щашIыщтых. 2040-рэ илъэсым нэс проектышхоу агъэцэкIэщтым сомэ миллиард 17 пэIухьанэу ыкIи IофшIэпIэ чIыпIакIэу мини 10 фэдиз иIэнэу ары къызэрэрадзэрэр.

«Тыркуем ипромышленнэ паркхэм тарыгъуазэзэ мы проектыр зэхэдгъэуцуагъ. Нафэ къызэрэтфэхъугъэмкIэ, экономикэмкIэ ахэм шIуагъэ къызэ­рахьырэр щыIэныгъэм къыщылъэгъуагъ, тэри тицыхьэ телъ ащ фэдэ проектхэм шIогъэшхо къызэрахьыщтым», — къыхигъэщыгъ КъумпIыл Мурат.

Проектэу «Лэгъонакъэ» епхыгъэу къызэраIуагъэм­кIэ, компаниеу «Резот Инвестмент» зыфиIорэм ар егъэцакIэ. 2025-рэ илъэсым ехъулIэу проектым иапэрэ чэзыу аухыщт. 2022-рэ илъэсым къыщыублагъэу 2024-рэ илъэсым нэс Урысые Федерацием и Правительствэ иунашъо тетэу федеральнэ бюджетым а гухэлъхэм апэIухьащт сомэ миллиарди 6,2-м нэс къыщыдалъытагъ. ЗэрэрахъухьагъэмкIэ, бюджетым къыхимыубытэрэ инвестициехэр 2030-рэ илъэсым ехъулIэу сомэ миллиард 45-м нэсыщтых. Ахэм амал къатыщт лыжэхэмкIэ къызщакIухьан алъэкIыщт гъогу километрэ 37-рэ ашIынэу, IофшIэпIэ чIыпIэ мини 2 зэхащэнэу, джащ фэдэу хьакIэщ номер мини 2,5-рэ агъэпсынэу.