Адыгеим иэкономикэ икъэгъэлъэгъон шъхьа­Iэхэр, пандемиер илъэситIум зэрэщыIагъэр къыдыхэлъытагъэу, хахъоу иIэхэр къызэтырагъэнэн алъэкIыгъ.

Республикэм пстэумкIи продукциеу къыщашIыгъэм ихахъо проценти 104-м нэсыгъ, къыдэгъэкIыжьыным ииндекс — проценти 110-рэ. АщкIэ Адыгеир икIыгъэ илъэсым Къыблэ федеральнэ шъолъырымкIэ апэрищымэ ахэфагъ.

Пандемием иапэрэ илъэс IофшIэн зимыIэу къэнагъэхэм япчъагъэ хэхъогъагъэмэ, икIыгъэ илъэсым фэдитфыкIэ нахь макIэ хъугъэ ыкIи пандемиер къимыхьэзэ зэрэщытыгъэм нэсыжьыгъ. АщкIэ зишIуагъэ къэкIуагъэр гъэрекIо федеральнэ ыкIи республикэ мэхьанэ зиIэ Iофыгъохэу зэрахьагъэхэр арых. Предпринимательствэм IэпыIэгъу егъэгъотыгъэнымкIэ зэшIуахыгъэр ахэм ащыщ. ГущыIэм пае, предпринимательствэ цIыкIум ыкIи гурытым апылъ субъекти 161-мэ сомэ миллион 332-рэ зытефэгъэ кредит цIыкIухэр аратыгъэх. Федеральнэм дакIоу шъолъыр IэпыIэгъури республикэм щарагъэгъоты. Кредит пыутхэм ятын ахэм ащыщ.

Республикэм иэкономикэ инвестициехэр къещэлIэгъэнхэр апшъэу къызэрэнэжьырэр АР-м и ЛIышъхьэу КъумпIыл Мурат къыкIегъэтхъы. АщкIэ зэшIуахырэм шIуагъэ къызэритырэр къегъэлъагъо Лъэпкъ Рейтингым изэфэхьысыжь – икIыгъэ илъэсым икIэуххэмкIэ Адыгеим я 11-рэ чIыпIэр ыубытыгъ ыкIи уплъэкIун-лъыплъэн къулыкъухэм алъэныкъокIэ бизнесым анахь макIэу теIункIэхэрэ шъолъырищым ахэхьагъ.

ИкIыгъэ илъэсым мылъку шъхьаIэм зэкIэмкIи инвестициеу сомэ миллиард 33-м ехъу къыхалъхьагъ. Джырэ уахътэм республикэм сомэ миллиард 77-рэ зыосэ инвестиционнэ проект 25-рэ щызэшIуахы. Джыри зыдэлажьэхэрэм ащыщых проектышхохэу щэм икъэхьыжьынрэ икъыдэгъэкIыжьынрэ ателъытагъэу компаниеу «Мирный-Адыгея» зыфиIорэр зыпылъым иятIонэрэ чэзыу, компаниеу «Ромекс Group» зыфиIорэм Адыгэкъалэ дэжь къыщишIырэ гъэтIылъыпIэу щэпIэ зэхэтэу интернет-тучанэу OZON-м паер. Про­ектым ыуасэр — сомэ миллиарди 6,2-рэ. Ащ IофшIэпIэ чIыпIэ мини 2 къызэIуихыщт. Тэхъутэмыкъое районым къыдэуцощт промышленнэ паркым IофшIэпIэ чIыпIэ мини 3 къытыщт. ИнвесторхэмкIэ тишъо­лъыр хъопсагъо хъуным пае инфраструктурэр зэтырагъэпсыхьэ.

Санкциехэм ялъэхъан Урысыем ишIу къэралыгъохэм Iоф адэшIэгъэн, зэзэгъыныгъакIэхэр адэгъэпсыгъэнхэ зэрэфаер ЛIышъхьэм къыкIигъэтхъыгъ ыкIи мы IофшIэ­ным тишъолъыр щыпылъых.

«Тэ типшъэрылъ – инвестициехэм ахэгъэхъогъэ­ныр, Адыгеим иэкономикэ кIочIакIэ етыгъэныр, ащкIэ тишъо­лъыр щыпсэухэрэм ящыIакIэ нахьышIу шIыгъэныр ары», — къыIуагъ КъумпIыл Мурат.

Адыгеим щызэшIуахырэ пстэуми осэ ин къафи­шIыгъ къэралыгъом и Президентэу Владимир Путиным. Ар зишIуагъэу АР-м и ЛIышъхьэ ылъытагъэр шъолъырым ихэбзэ къулыкъу пстэуми язэдэлэжьэныгъ, обществэм, къэралыгъо хабзэм ыкIи бизнесым федеральнэ IэпыIэгъур къызфагъэфедэзэ Iоф зэрэзэдашIагъэр ары.

Федеральнэ гупчэм ишIуагъэкIэ зэшIуахыгъэхэм ащыщ псырыкIопIэшхоу ыкIи псыубытыпIакIэу ашIыгъэ­хэр. Ахэр зырагъэжьэгъагъэхэр джыри илъэс 14-кIэ узэкIэIэбэжьмэ ары. Къэралыгъом и Правительствэ, Адыгеим илIыкIоу Къэралыгъо Думэм щыIэ депутатэу Владислав Резник яшIуагъэкIэ проектыр 2018-рэ илъэ­сым рагъэжьэжьыгъ, Мыекъуапэрэ Мыекъопэ районымрэ ащыпсэурэ нэбгырэ мин 220-рэ фэдиз ащ къыхиубытэрэр.