Аужырэ уахътэм тиреспубликэ зекIо къа­кIохэрэм япчъагъэ зэхапшIэу нахьыбэ хъугъэ — илъэсым зекIо миллионныкъо фэдиз. Шъыпкъэ, пандемием илъэхъан гъунапкъэ­хэр зэфэшIыгъагъэх, джы тызхэтыри лъэ­хъэнэ псынкIэп. Ау цIыфхэм тишъолъыр егъэзыгъэкIэ къыхахэу щытэп. Зэ щыIагъэм джыри къыгъэзэжьэу хабзэ хъугъэ. АщкIэ зишIуагъэ къакIохэрэм ащыщ мыщ щызэшIуахырэ Iофтхьабзэхэр.

ТичIыопс идэхагъэ, илъэс къэс инфраструктурэм изэтегъэпсыхьан хахъо зэрэфашIырэр, лъэпкъ шхыныгъохэу чыжьэу зикъэбар Iугъэхэм ямэфэкIхэм зекIохэр къыращалIэх, пчъагъэрэ къагъэзэжьы. Сыдым ымыуаса адыгэ къуаем и Мафэ! Ар къэралыгъом илъэпкъ мэфэкIхэм ахагъэхьагъэу мэфэпчъым хэт.

Мы лъэныкъомкIи Адыгеим федеральнэ IэпыIэгъур къышъхьапэ. Лъэпкъ проектхэр агъэфедэх. Корпорациеу Туризм.РФ зыфиIорэм зэзэгъыныгъэу дашIы­гъэм ишIуагъэкIэ илъэсищым Адыгеим инфраструктурэм изэтегъэпсыхьан пае мылъкушIу къыIэкIэхьащт гъогоу Гъозэрыплъ – Лэгъонакъэ зыфиIоу зекIохэм нахь агу рихьырэ чIыпIэхэр зэзыпхыщтхэм иухын пэIухьащтыри зэрэхэтэу. Мы корпорацием зэрэдэлажьэхэрэм ишIуагъэкIэ экокурортэу «Лэгъонакъэ» щыIэныгъэм щыпхырыщыгъэныри нахь псынкIэ хъущт. Мы проектым АдыгеимкIэ социальнэ-экономическэ мэхьанэшхо иI, зекIоным илъэныкъо шэпхъэ лъагэхэм анигъэ­сынэуи щэгугъых. ИкIыгъэ илъэсым мы лъэныкъом аригъэгъотыгъэ фэIо-фашIэхэм ауасэ сомэ миллион 900 хъущтыгъэмэ, экокурортым апэрэ илъэсэу Iоф зыщишIэщтым, къызэралъытэрэмкIэ, федэу къыхьыщтыр сомэ миллиарди 2-м ехъукIэ нахьыбэн ылъэ­кIыщт.