Лъэпкъ проектэу «Псауныгъэм икъэухъу­мэн» зыфиIорэм ишIуагъэкIэ республикэм псауныгъэм икъэухъумэн ылъэныкъокIэ хэхъоныгъэ инхэр ышIыгъэх. ИкIыгъэ илъэсым изакъоу сомэ миллиарди 9 мы лъэны­къом ихэхъоныгъэ пэIуагъэхьагъ.

Адэбз узхэмкIэ республикэ сымэджэщэу М. Iошъхьэ­мафэм ыцIэ зыхьырэм, АР-м иклиническэ сымэджэщ, Мыекъопэ къэлэ клиническэ сымэджэщым медицинэ Iэмэ-псымэу 5 2021-рэ илъэсым къаIэкIэхьагъ. Хэ­ушъхьа­фыкIыгъэу адэбз узхэм зыщяIазэхэрэ республикэ сымэджэщым мыгъэ Iэмэ-псымэ 22-рэ къыIэкIагъэ­хьанэу агъэнэфагъ, ащ щыщэу 14-р диспансерым къащэгъахэу агъэфедэ.

Гуузхэм апэшIуекIогъэныр къыздыхэлъытэгъэ проектым диштэу АР-м иклиническэ сымэджэщ, Мыекъо­пэ къэлэ сымэджэщым, Адыгэкъалэ дэт сымэджэщэу К. Батмэным ыцIэ зыхьырэм медицинэ Iэмэ-псыми 132-рэ аIэкIагъэхьагъ. КIэлэцIыкIухэм япсауныгъэ икъэухъумэн лъэныкъо хэхыгъэ шъхьафэу республикэм зыщыдэлажьэхэрэм ащыщ. Технологие шэпхъэ анахь лъагэхэм адиштэрэ Iэмэ-псымэхэр кIэлэцIыкIухэм зыщяIазэхэрэ сымэджэщхэм арагъэгъотыгъэх. Аужырэ илъэситфым Джэджэ район гупчэ сымэджэщым кIэлэцIыкIухэм зыщяIазэхэрэ амбулаторие щашIыгъ. Кощхьэблэ район гупчэ сымэджэщым иамбулаторие Блащэпсынэ къыщызэIуахыгъ. Красногвардейскэ районым ит псэупIэу Еленовскэм фельдшер-мамыку Iэза­пIэм Iоф ышIэнэу щиублагъ. Шэуджэн район сымэджэщым, Красногвардейскэ район гупчэ сымэ­джэщым ихирургическэ ыкIи итерапевтическэ отделениехэм гъэцэкIэжьынхэр ащыкIуагъэх. УЗИ, рентген-аппаратхэр, сымаджэхэм апае пIэкIорхэр, сымэджэщхэм апае автомобильхэр программэхэм къатIупщыгъэ мылъкумкIэ къафащэфыгъэх. IэпыIэгъу псынкIэм иавтопарк автомобиль 20 кIэу хагъэхьагъ. ЧIыпIэ койхэм апэрэ медицинэ IэпыIэгъур языгъэкIырэ къулыкъухэм автомобиль 11 къафащэфыгъ. Илъэсым ыкIэ нэс Мые­къуапэ ирайон цIыкIоу Восходым IэзапIэм ишIын щаухыщт. Теуцожь районым ит къуаджэу Джэджэхьаблэ ыкIи Кощхьэблэ районым ит псэупIэу Зэкъошныгъэм амбулаториехэр щашIынхэу аублагъ, Тэхъутэмыкъое районым ит псэупIэу Инэм IэзапIэ щашIыщт. Къоджэ псэупIэхэм хэхъоныгъэ ягъэшIыгъэным фэгъэ­хьыгъэ программэу УФ-м мэкъу-мэщымкIэ иминистерствэ 2022-рэ илъэсым зэшIуихырэм диштэу республикэм ирайон зэфэшъхьаф­хэм фельдшер-мамыку IэзэпIи 3-рэ амбулаториеу 2-рэ джыри къащызэIуахыщт.

Къыхэгъэщыгъэн фае, пандемием илъэхъан Адыгеим лъэкIэу иIэр рихьылIи, уз мэхъаджэм ебэныгъ. ИщыкIэгъэ фэIо-фэшIэ пстэури зэшIуахыгъ, хэушъхьафыкIыгъэу сымэджэщхэри зэтрагъэпсыхьагъэх. Амал зэриIэкIэ медицинэм инэмыкI лъэныкъохэри къызэтрагъэуцуагъэхэп. Джы кол-гупчакIэ тиIэ хъугъэ, ащ упчIэ пстэоу медицинэм ылъэныкъокIэ къэуцухэрэм джэуапэгъу щафэхъух. Сомэ миллион 36-рэ пэIуагъа­хьи, зырагъэушъомбгъугъ.