Къэралыгъом иIэпыIэгъу къанэсы
Республикэм исоциальнэ щыIэкIэ-псэукIэ икIыгъэ илъэсым сомэ миллиарди 4-рэ миллион 800-рэ пэIуагъэхьагъ, ар ыпэрэ илъэсым елъытыгъэмэ, миллиард ныкъокIэ нахьыб.
Сабыйхэм ягъэмэфэ зыгъэпсэфыгъо, япсауныгъэ игъэпытэн, унэгъо Iужъухэм IэпыIэгъу ягъэгъотыгъэныр — апшъэрэ Iофыгъохэу зэшIуахых. АщкIэ яIэпыIэгъух къэралыгъо программэхэр, лъэпкъ проектхэр, къэралыгъом и Президент иунэшъо хэхыгъэхэр.
ИкIыгъэ илъэсым Адыгеим сабый 4553-рэ къихъухьагъ, мы пчъагъэр ащ ыпэрэ илъэсым 135-кIэ нахьыб. Унэгъо Iужъоу 7709-рэ тишъолъыр щэпсэу.
Унагъохэм IэпыIэгъоу арагъэгъотыхэрэм ащыщ социальнэ контрактым къыдыхэлъытагъэр — IофшIэн агъотынымкIэ, егъэджэнымкIэ, яIоф е унэе хъызмэт къызэIуахынымкIэ адеIэх. ГъэрекIопагъэ социальнэ контрактыр унэгъо 51-мэ агъэфедагъэмэ, икIыгъэм пчъагъэр 714-рэ хъугъэ, сомэ миллион 87-рэ пэIуагъэхьагъ. Мы IэпыIэгъур къызфэзгъэфедэшъущтхэм ахагъэхъуагъ — мы илъэсым игъэтхэпэ мазэ ыуж IофшIапIэр чIэзынагъэхэр ащ къыхеубытэх. Мы илъэсым социальнэ контракт 700 адашIын гухэлъ щыI, сомэ миллион 90-рэ апэIуагъэхьащт.
Лъэпкъ проектэу «Демографием» къыдыхэлъытагъэу сабыйхэр зэрыс унагъохэм сомэ миллион 667-рэ афатIупщыгъ, я 3-рэ ыкIи ащ къыкIэлъыкIорэ сабый къызэрыхъухьэгъэ унэгъо мин фэдизмэ зэтыгъо сомэ мин 50 зырыз республикэ бюджетым къикIэу аратыгъ.
Къэралыгъо программэу «Iэрыфэгъу щыIакI» зыфиIорэр зыщыIэм къыщегъэжьагъэу сомэ миллион 240-м ехъу агъэфедагъ. Социальнэ инфраструктурэр чIыпIи 158-мэ ащызэтрагъэпсыхьагъ, ар республикэм щызэблахъунэу агъэнафэщтыгъэм ипроцент 80 мэхъу.
Уц Iэзэгъухэр ятыгъэнхэм, зыгъэпсэфыпIэ-зыгъэхъужьыпIэхэм агъэкIонхэм, псауныгъэм изэтегъэуцожьын анаIэ зытырагъэтыхэрэм ащыщых. ИкIыгъэ илъэсым тишъолъыр къэралыгъо программакIэ щатIупщыгъ сэкъатныгъэ зиIэхэм, сабыйхэри зэрахэтхэу, лъэныкъо зэфэшъхьафхэмкIэ язэтегъэуцожьын тегъэпсыхьагъэу.
Социальнэ лъэныкъомкIэ общественнэ организациехэм мэхьанэу яIэр къыдыхалъытэзэ, мысатыу организациехэм апае зэнэкъокъухэр зэхащэх республикэ бюджетым къикIырэ мылъкум щыщ грантхэр аратынхэм фэшI, федеральнэ мылъкум икъещэлIэни пылъых. ИкIыгъэ илъэсым грантэу сомэ миллион 24-рэ атыгъэмэ, мыгъэ а пчъагъэр сомэ миллион 30-м нэс къаIэтыгъ.