Шэпхъэ лъагэхэм адиштэным фэшI
Республикэм щыпсэухэрэм шэпхъэ лъагэмэ адиштэрэ гъэсэныгъэ агъотын алъэкIыным гъэрекIо сомэ миллиарди 6 пэIуагъэхьагъ.
УблэпIэ лъэныкъомкIэ къебгъажьэмэ, чIыпIэ 360-м ателъытэгъэ кIэлэцIыкIу IыгъыпIэу щы Красногвардейскэ районым къыщызэIуахыгъ. Илъэсым ыкIэ Мыекъопэ районым ит къутырэу Красная Улька зыфиIорэм чIыпIи 150-рэ, станицэу Джаджэм чIыпIэ 240-рэ хъурэ кIэлэцIыкIу IыгъыпIэу щы, станицэу Келермесскэм ыкIи Шэуджэн районым ит къутырэу Тихоновым чIыпIэ шъэрышъэрэ тIокIырэ хъурэ кIэлэцIыкIу IыгъыпIэхэр къащызэIуахыщтых. Шэуджэн районым ит псэупIэхэу Заревэм ыкIи Пщычэу чIыпIэ шъэрышъэрэ тIокIырэ хъурэ кIэлэцIыкIу IыгъыпIэхэр щашIынэу рагъэжьагъ. Ащ ишIуагъэкIэ зыныбжь илъэсищым нэсыгъэ сабыйхэм чIыпIакIэхэр кIэлэцIыкIу IыгъыпIэхэм щыряIэ хъущтых ыкIи илъэси 3-м щыублагъэу илъэси 7-м нэсыхэрэм якупхэр амалыкIэу къэхъущтхэм нахь гупсэф къафишIыщт. Мэхьанэ зиIэ лъэныкъохэм ащыщ еджэпIэ чIыпIакIэхэм якъызэIухын ыкIи ятIонэрэ чэзыу еджэным идэгъэзыжьын. Iоныгъом и 1-м 2021-рэ илъэсым чIыпIэ 1100-рэ хъурэ я 34-рэ лицеикIэ Мыекъуапэ ыкIи чIыпIэ 250-мэ ателъытэгъэ еджапIэ станицэу Ханскэм къащызэIуахыгъ.
Мыгъэ Тэхъутэмыкъое районым ит къу. Бжыхьэкъоежъымрэ АдыгеякIэмрэ, псэупIэу Яблоновскэм зэкIэмкIи чIыпIэ 1350-мэ ателъытэгъэ еджапIэхэм яшIын ащырагъэжьагъ. 2026-рэ илъэсым нэс республикэм еджапIэу итхэм янахьыбэ агъэцэкIэжьын алъэкIынэу программэм амал къытыщт. Сомэ миллион 660-рэ зыпэIухьэгъэ гъэцэкIэжьынхэр республикэм иеджэпIи 9-мэ мыгъэ ащыкIуагъэх.
Физкультурэм ыкIи спортым алъэныкъокIэ Iэмэ-псымэхэр еджапIэхэм ачIагъэуцоным анаIэ тырагъэты. ГъэрекIо спортивнэ зал 17 агъэцэкIэжьыгъ, а пчъагъэм мыгъэ джыри 13 къыхэхъощт. ЕджэпIэ тхылъеджапIэхэм апае сомэ миллион 47-рэ зытефэгъэ зэреджэщтхэ тхылъ мини 110-рэ къащэфыгъ. Мыгъэ зэреджэщтхэ тхылъхэм сомэ миллион 60 апэIуагъэхьагъ.
НыбжьыкIэ сэнаущхэм якъыхэгъэщын ыкIи яегъэджэн тедзэ изэхэщэн гъэсэныгъэм илъэныкъо хэхыгъэхэм ащыщ. Мыекъопэ гурыт еджапIэу N 17-м гъэрекIо кванториум къыщызэIуахыгъ. Цифрэ гъэсэныгъэмкIэ кIэлэцIыкIухэм апае гупчэу «IT-куб» АКъУ-м щагъэпсыгъ. Джыри кванториумитIу мыгъэрэ къэкIощт илъэсымрэ къызэIуахынэу щыт. Язырэр Мыекъуапэ дэт эколого-биологическэ лицееу N 35-м, ятIонэрэр станицэу Ханскэм игурыт еджапIэу N 23-м къачIэуцощтых.
КIэлэеджакIохэм гъэсэныгъэу агъотырэм ишIуагъэкIэ Урысые олимпиадэхэм хагъэунэфыкIырэ чIыпIэхэр нахьыбэу къащахьых. ТекIоныгъэу къыдахыхэрэмкIэ Урысыем и Къыблэ лъэныкъо ишъолъырхэр зытштэхэрэм, тиныбжьыкIэхэм ятекIоныгъэхэмкIэ апэ тит.
Фэдэ гъэхъагъэхэм зиIахьышIу ахэзылъхьэхэрэм ащыщ гъэсэныгъэ гупчэхэу «Точки роста» зыфиIохэрэр. Ащ фэдэу гупчэ 24-рэ республикэм ирайонхэм гъэрекIо къащызэIуахыгъ. Лъэпкъ проектэу «Гъэсэныгъэр» загъэцакIэрэм щыублагъэу къоджэ еджапIэхэм ащ фэдэ гупчэу къачIэуцуагъэр 39-рэ, ахэм кIэлэцIыкIу мини 7-мэ защагъасэ.
ЗипсауныгъэкIэ щыкIагъэхэр зиIэ сабыйхэм гъэсэныгъэ ягъэгъотыгъэным игъэкIотыгъэу дэлажьэх. ЯтIонэрэ илъэс хъугъэу ублэпIэ классхэм ащеджэрэ кIэлэцIыкIухэм щэджэгъо шхын стыр аIэкIахьэ.
Дунэе хъытыум хэхьанхэ алъэкIынэу республикэм иеджэпIэ 50-мэ Iэмэ-псымэхэр ачIагъэуцуагъэх.
Гурыт сэнэхьат гъэсэныгъэ ныбжьыкIэхэм ягъэгъотыгъэнымкIи республикэм амалхэр аретых. «Къоджэ кIэлэегъадж» зыфиIорэ программэм Iоф дашIэ. Ащ кIэлэегъэджэ 27-рэ хэлэжьэгъах. Къуаджэхэм ащылэжьэрэ кIэлэегъаджэхэм япчъагъэ джыри хагъэхъощт.