ИцIыфхэр Урысыем гум ринэщтхэп
Урысыем и Президентэу Владимир Путиныр Киев къеджагъ псынкIэу заохэр зэпигъэунэу ыкIи зэдэгущыIэгъухэм къафигъэзэжьынэу.
Ащ зэрэхигъэунэфыкIыгъэмкIэ, Донецкэ, Луганскэ народнэ республикэхэм, Запорожьем, Херсон хэкум ащыкIогъэ референдумхэм ахэлэжьагъэхэм агу къариIорэ гъогур къыхахыгъ, Урысыем ахэр гум ринэщтхэп.
— Референдумхэр зыщыкIощтыгъэ лъэхъаным Киев тетыгъор щызыIыгъхэм гурыт еджапIэхэм якIэлэегъаджэхэу, хэдзэкIо комиссиехэм ащылажьэхэрэр аукIынхэу, зишIоигъоныгъэ къизыIотыкIынэу къэкIогъэ нэбгырэ миллионхэр агъэкIодынхэу агъэщынэщтыгъэх, — къыIуагъ Путиным. — Ау Донбасс, Запорожьем, Херсон ащыпсэухэрэм яшIоигъоныгъэ къаIуагъ.
«Киев ихэбзэ Iэшъхьэтетхэми, КъохьапIэм щыпсэухэу ахэм IэпыIэгъу къафэхъухэрэми сыкъызэхахы сшIоигъу — Луганскэ, Донецкэ, Херсон, Запорожьем ащыпсэухэрэр егъэшIэрэу тицIыфхэу мэхъух», — къыIуагъ Урысыем ипащэ.
«Урысыер Киев къеджэ псынкIэ шъыпкъэу заор щигъэтынэу, 2014-рэ илъэсым ригъэжьэгъэ заор ыгъэуцунэу, зэдэгущыIэгъухэм къафигъэзэжьынэу. Джащ фэдэ гъогу закъокIэ ары ныIэп мамырныгъэм уекIун зэрэплъэкIыщтыр», — къыIуагъ ащ.
Владимир Путиным къыгъэгугъагъэх тихэгъэгу исхэм щынэгъончъагъэ яIэнымкIэ Урысые Федерацием ищыкIагъэр зэкIэ ышIэнэу. «Амалэу, кIуачIэу тиIэр зэкIэ къызфэдгъэфедэзэ тихэгъэгу къэтыухъумэщт, тицIыфхэр щынэгъончъэу щыIэнхэмкIэ ищыкIагъэр зэкIэ тшIэщт. ТицIыфхэм япшъэрылъ лъапIэу ар щыт», — къыIуагъ ащ.
АР-м и ЛIышъхьэу КъумпIыл Мурат непэрэ мафэр тикъэралыгъокIэ тарихъ хъугъэ-шIэгъэшхоу ылъытагъ: «Донецкэ, Луганскэ народнэ республикэхэр, Херсон, Запорожскэ хэкухэр Урысые Федерацием зэрэхахьэхэрэм фэгъэхьыгъэ зэзэгъыныгъэхэм зыщыкIэтхэгъэхэ Iофтхьабзэр тыгъуасэ Кремлэм щыкIуагъ.
Урысыем и Президентэу Владимир Путиныр, ДНР-м ипащэу Денис Пушилиныр, ЛНР-м ипащэу Леонид Пасечник, Запорожскэ хэкум ипащэу Евгений Балицкэр, Херсон хэкум ипащэу Владимир Сальдо аIапэ документхэм акIадзэжьыгъ.
Владимир Путиным и Джэпсалъэ къыщыхигъэщыгъ Федеральнэ ЗэIукIэм Урысыем шъолъыриплI зэрэхахьэрэм ехьылIэгъэ конституционнэ законхэм къызэрадыригъэштэщтыр.
Къэралыгъом ипащэ зэрэхигъэунэфыкIыгъэмкIэ, нэбгырэ миллион пчъагъэмэ ар яшIоигъоныгъэу, ООН-м и Устав къыдилъытэрэ яфитыныгъэу ар щыт. Тятэжъ пIашъэхэм, Ижъырэ Урысыем лъапсэ фэзышIыгъэхэм, лIэшIэгъу пчъагъэхэм къакIоцI текIоныгъэхэр къызфыдахыщтыгъэ зыкIыныгъэр ылъапсэу щыт а фитыныгъэм.