Чъэпыогъум и 1-р — зыныбжь хэкIотагъэхэм я Маф
Заомрэ IофшIэнымрэ яветеранхэу лъытэныгъэ зыфэтшIыхэрэр!
Тинахьыжъхэу Адыгэ Республикэм щыпсэухэрэр!
Зыныбжь хэкIотагъэхэм я Дунэе мафэ фэшI гуфэбэныгъэ хэлъэу тышъуфэгушIо!
Тинахьыжъхэу хъупхъэу Iоф зышIагъэхэм, заом лIыхъужъныгъэ щызезыхьагъэхэм, цIыфыгъэ шэпхъэ дахэхэм арыгъуазэхэзэ зищыIэныгъэ къэзыхьыгъэхэм, къэралыгъомрэ обществэмрэ хэхъоныгъэ ашIыным зиIахьышхо хэзышIыхьагъэхэм тазэрафэразэр къэтэIо.
Тинахьыжъхэр республикэм иобщественнэ-политикэ ыкIи икультурнэ щыIакIэ чанэу хэлажьэх, ныбжьыкIэхэр яхэгъэгу фэшъыпкъэхэу пIугъэнхэм яIахьышIу хашIыхьэ, дзэм, дзэ къулыкъум ямэхьанэ къемыIыхыным анаIэ тырагъэты.
Тинахьыжъхэу илъэсыбэрэ Iоф зышIагъэхэр, ти Адыгейрэ Урысыемрэ яфедэ зыхэлъ IофшIэным гуетыныгъэ зэрэфышъуиIагъэм апае тышъуфэраз.
Псауныгъэ пытэ, щыIэкIэшIу шъуиIэнэу, шъунасыпышIоу джыри илъэсыбэрэ шъукъытхэтынэу шъуфэтэIо! Шъуиунагъохэм фэбагъэ арылъэу, шъуигупсэхэм шъузэхашIыкIэу, анаIэ къышъутетэу шъущыIэнэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр