Чъэпыогъум и 5-р — кIэлэегъаджэм и Маф
Адыгэ РеспубликэмкIэ гъэсэныгъэм иIофышIэхэу, егъэджэн Iофым иветеранхэу лъытэныгъэ зыфэтшIыхэрэр!
КIэлэегъаджэм и Мафэ фэшI тышъуфэгушIо!
ЦIыфхэм анахь лъытэныгъэшхо зыфашIырэ сэнэхьатхэм зыкIэ ащыщым илIыкIохэм Урысыем илIэужхэр зэкIэ арэгушхох. Нэбгырэ пэпчъ гъэсэныгъэ зэригъэгъотэу ищыIэныгъэ гъогу зытехьэкIэ, гуфэбэныгъэрэ рэзэныгъэрэ афыриIэу икIэлэегъаджэхэр бэрэ ыгу къегъэкIыжьых.
Сыд фэдэрэ лъэхъани кIэлэегъэджэ сэнэхьатыр къыхэзыхыхэрэр гушхуагъэ зыхэлъ, шIум, зэфагъэм кIэлэцIыкIухэр афэзыгъэсэнхэу агукIэ фаехэр, ежь-ежьырэу гупшысэшъунхэ, хэкIыпIэ тэрэз къагъотын алъэкIэу ахэр хъунхэм дэлэжьэгъэнымкIэ теубытагъэ зышIыхэрэр ары.
Урысыем гъэсэныгъэмкIэ хэбзэ шIагъоу иIэхэр лъагъэкIуатэхэзэ, непэ Адыгеим икIэлэегъаджэхэм шIэныгъэ куу кIэлэцIыкIухэм ягъэгъотыгъэнымкIэ, хэгъэгум играждан шъыпкъэу ахэр пIугъэнхэмкIэ Iофышхо зэшIуахы.
ЯакъылышIуагъэрэ ящэIагъэрэ ыкIи гуетыныгъэ инэу ахэлъым апае зэкIэ кIэлэегъаджэхэм тызэрафэразэр къэтэIо. Адыгеим гъэсэныгъэм зыщиушъомбгъуным зиIахьышхо хэзышIыхьэгъэ кIэлэегъэджэ-ветеранхэр ары анахьэу тызыфэразэхэр.
Ныбджэгъу лъапIэхэр, тыгу къыддеIэу тышъуфэлъаIо псауныгъэ пытэ, щыIэкIэшIу шъуиIэнэу, шъузфэгъэзэгъэ Iофым гъэхъэгъакIэхэр щышъушIынхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр