Донецкэ ыкIи Луганскэ народнэ республикэхэмрэ Херсонскэ ыкIи За­­порожскэ хэкухэмрэ Урысыем къызэрэхэхьагъэхэм фэгъэхьыгъэу тыгъуа­сэ Мыекъуапэ концерт-митинг щыкIуагъ.

Адыгэ Республикэм и Лъэпкъ музей дэжь къыщызэрэугъоигъэх IофшIэпIэ зэфэшъхьафхэм ялIыкIохэр, апшъэрэ ыкIи гурыт гъэсэныгъэ зыщызэрагъэгъотырэ еджапIэхэм ачIэсхэр, общест­веннэ организациехэм ахэтхэр, ныбжьыкIэхэр, республикэ парламентым идепутатхэр, минист­рэхэм я Кабинет хэтхэр.

Адыгеим иветеранхэм я Совет ипащэу Къуаджэ Аслъан, Къыблэ дзэ округым и Зэхэт стратегическэ командование иин­спекторэу Александр Дорофеевыр зэхахьэм къыщыгущыIагъэх, чIыналъэу шъхьафит ашIыжьы­гъэхэм ащыпсэухэрэм къинэу ателъыгъэр дэгъэзыжьыгъэнымкIэ тикъэралыгъо зэшIуихыгъэм мэхьэнэ ин зэриIэр къыхагъэщыгъ.

Нэужым муниципальнэ творческэ купхэм концерт къатыгъ.

Илъэсыбэм къин хэтыгъэ цIыфхэм яшIоигъоныгъэ къызэрадэхъугъэм, мамыр щыIакIэм зэрэфаблэхэрэм адырагъаштэу, къэралыгъом щыпсэухэрэм зыкIыныгъэ азыфагу дэлъынэу зэрэщытым мы зэхахьэр инэпэ­еплъ хъугъэ.

«Адыгеим щыпсэухэрэм джыри зэ къаушыхьатыгъ Донбасс, Запорожьем, Херсон мамырныгъэ щыIакIэр агъэпсызэ, тикъэралыгъо исубъектхэм ахэтхэу, зэкъошныгъэр азыфагоу щыIэхэ зэрашIоигъом зэрэдырагъаштэрэр. Тэ — тызэгъус, тэ — ты Урысый!» — къащитхыгъ Адыге­им и ЛIышъхьэу КъумпIыл Му­рат исоциальнэ нэкIубгъохэм.