«Единэ Россием» и «Гвардие ныбжьыкIэрэ» «Волонтер ро­тэмрэ» ягуфэкIо купэу гъэтхапэм и 30-м къыщегъэ­жьагъэу ЛНДР-м щыIэр цIыф жъугъэхэм IэпыIэгъу афэхъу.

Донбассрэ нэмыкI чIыпIэхэу шъхьафит ашIы­жьыгъэхэмрэ ащылэжьэщт гуфакIохэр зыщагъэсэщтхэ гупчэ жъоныгъуакIэм къызэIуахыгъ. Джыдэдэм Гвардие ныбжьыкIэмрэ «Волонтер ротэмрэ» ягуфакIохэм «Единэ Россием» шIушIэнымкIэ игуп­чэхэм Iоф ащашIэ.

ДНР-м, ЛНР-м, Запорожскэ, Херсонскэ хэку­хэм референдумыр ащыкIо зэхъум «Гвардие ныбжьыкIэм» хэтхэр Мариуполь щызэрахьэгъэ Iоф­тхьабзэхэм гуфакIоу ахэлэжьагъэх. Москва, Санкт­Петербург, Адыгэ Рес­пуб­ликэм, Марий Эл, Баш­кортостан, Алтаим, Мордовием, Челябинскэ, Московскэ, Владимир, Са­ра­тов, Новосибирскэ, Ро­стов хэкухэм къарыкIыгъэ гу­фэ­кIо 55-рэ хэдзыпIэ чIы­пIэхэм ащылэжьагъ. ­Адыгэ Республикэм ыцIэкIэ шIу­шIэнымкIэ гупчэу Мариуполь щыIэм цIыфхэм IэпыIэгъу щафэхъугъ Адыгеим и Гвардие ныбжьыкIэ ипащэу, партиеу «Единэ Россием» и Генеральнэ совет хэтэу, къалэу Мые­къуапэ идепутатэу Бэрзэдж Асиет.

«ГуфакIохэм тырягъусэу шIушIэнымкIэ гупчэу Мариуполь дэтым тыщы­Iагъ. Волонтерхэм яшIуагъэкIэ къэлэдэсхэм мамыр щы­IакIэм къыфа­гъэзэжьы. Джащ фэдэу хэдзыпIэхэми тащылэ­жьагъ, хабзэр амыу­къоным тылъыплъагъ. Бырсыр къахэмыхьэу мэкъэтыныр рэхьатэу кIуагъэ. ЦIыфхэм мыщкIэ чаныгъэ къызхагъэфагъ, уна­гъом исхэр зэгъусэу къа­кIохэу, амакъэ атэу хъугъэ. ТапэкIэ гъогоу зэрыкIощтхэр мы мафэхэм ахэм къыхахыгъ. Илъэси 8 цIыфхэр зэжагъэхэр къадэхъугъ: Донбасси, нэмыкI чIыпIэхэу шъхьа-фит ашIыжьыгъэхэри Урысыем иунэгъошхо щыщ хъужьыщтых. Мэфитфэ кIогъэ Iофтхьабзэм къыщынэфагъ цIыфхэм Урысыем игъусэхэ зэрашIоигъор. Къалэхэмрэ районхэмрэ язэтегъэпсыхьа­жьынкIэ Iофышхо зэшIотхынэу къытпыщылъ. Ре­ферендумыр егъэжьапI ныIэп», — къыIуагъ Бэр­зэдж Асиет.