Мырэущтэу зэджэгъэхэ экологическэ Iоф­тхьабзэм зэрэ Адыгееу тыгъуасэ хэлэжьагъ. Къалэхэми, районхэми ащыкIогъэ шIыхьаф­хэм цIыфхэр къякIолIэгъагъэх.

Хабзэ зэрэхъугъэу, зичэзыу шIыхьафым хэбзэ къулыкъу­шIэхэр, предприятиехэм ыкIи учреждениехэм ащылажьэхэрэр, ныбжьыкIэ ыкIи общест­веннэ организациехэм ахэтхэр хэлэжьагъэх.

Къалэм щыкIощт шIыхьафыр къэмысызэ, ащ хэлэжьэщт коллективхэм агъэцэкIэщт Iоф­шIэнхэр афагъэнэфэгъагъэх. ЦIыф­хэм чъыгхэр къаупкIы­хьагъэх, пыдзафэхэр къаугъоигъэх, гъогубгъухэр агъэкъэ­бзагъэх.

ШIыхьаф мафэм Iоф зыща­шIэрэ чIыпIэхэр зыукъэбзыгъэ­хэр макIэп. Ахэм ащыщ Адыгэ Республикэм культурэмкIэ и Министерствэ игупчэ бухгал­терие зычIэт унэр. Къэбзэ-лъа­бзэу ящагу къапхъэнкIыгъ, лъэс гъогоу къапэблагъэри, унэ лъа­псэри агъэкъэбзагъ. Зы къутами, зы тхылъыпIэжъи плъэ­гъурэп.

Гупчэм ибухгалтер шъхьаIэу ыкIи ипащэу Шэуджэн Минсурэ къытфиIотагъ: «Iофтхьабзэу «Зеленая Россия» зыфиIорэм гъэ къэс тыхэлажьэ. Непи зэрэколлективэу Iоф тшIэнэу тыкъы­дэкIыгъ, нэбгырэ 36-рэ тызэ­рэхъурэр.

Iофыгъом детэгъаштэ, сыда пIомэ къэбзэныгъэм чIыгур зэригъэдахэу, гури егъэкъабзэ. ТиIофшIапIэ къэлэ гупчэм хэхьэ, цIыф кIуапIэу щыт. Тхьамафэ къэс къытпэгъунэгъоу ермэ­лыкъхэр щашIых, мэщытыри къытпэблагъ, зыгъэпсэфыпIэ гупчэри тапашъхьэ ит. Ащ пае илъэс къэс тэ арэу щытми гъат­хэмрэ бжыхьэмрэ шIыхьафхэр зэхэтэщэх».

Къэлэ дэкIыгъом, Гавердовскэм узыщэрэ гъогу зэхэкIыпIэм пыдзафэхэр Iузыщырэ машинэшхохэр щытхэу, хэкIэу къаугъоигъэр дзыохэм арылъэу къакIэрытхэу тахэхьагъ. Гъогу бгъуитIури зыгъэкъэбзэнэу зы­тефагъэр къэлэ администра­цием, нэмыкI организациехэм яIофышIэхэр ары. IофшIэныр къаухыгъэу ахэр шъофым къи­кIыжьыщтыгъэх.

НэмыкI чIыпIэхэми цIыфхэм къафагъэуцугъэ пшъэрылъхэр ащагъэцэкIагъэх. Аужырэ шIы­хьафым имызакъоу, ащ ыпэкIэ зэхащэщтыгъэхэми къалэм игъэ­къэбзэнкIэ Iофыбэ ащызэшIуа­хыгъ. Адыгеим мэзхэмкIэ и ГъэIорышIапIэ Iутхэр шIыхьафхэм чанэу ахэлэжьагъэх, къэлэ пар­кым Iоф щашIагъ, нэужым «Мэз­дахэ» къыпэгъунэгъу чIыгухэм пыдзафэхэр къащау­гъоигъэх.

Лицей-интернатым иеджа­кIохэр зэдеIэжьхэзэ еджапIэм ищагу къагъэкъэбзагъ, къэгъагъэхэр къызщыкIырэ чIыпIэхэр агъэшъэбагъэх.

Станицэу Ханскэм дэт чы­лысым къыпэблэгъэ чIыгур цIыф­хэм аукъэбзи, хэкIыр дащыжьыгъ. Гвардейцэ ныбжьыкIэхэм уцыжъхэр аупкIагъэх, чъыг къутамэхэр къаугъоигъэх.

Iофтхьабзэм республикэм ирайонхэри хэлэжьагъэх. Джэ­джэ районым иадминистрацие иIофышIэхэмрэ общественнэ организациехэмрэ ежь фаеу къыдэкIыгъэхэр ягъусэхэу псэу­пIэм иурамыбгъухэр агъэкъэ­бзагъэх.

ШIыхьафым ишIуагъэ къэ­кIуагъ. Адыгеир къэралыгъо гъэпсыкIэ иIэу зыпсэурэр илъэ­си 100 зэрэхъурэм къалэхэр, район гупчэхэр, къуаджэхэр, псэупIэхэр фызэтырагъэпсы­хьагъэх. Шъаукъо Аслъангуащ.