ЗэIукIэгъу гъэшIэгъон
Лъэпкъ IэпэIасэу Бжьэнбэхъо Люсе адыгэ шъуашэхэр зэридыхэрэм фэгъэхьыгъэ зэхахьэр Мыекъуапэ щызэхащагъ.
КъокIыпIэм щыпсэурэ лъэпкъхэм искусствэхэмкIэ я Къэралыгъо музей и Темыр-Кавказ къутамэ щыкIогъэ Iофтхьабзэр музеим ипащэ игуадзэу Сулейманова Фатимэ зэрищагъ. Ащ къыIотагъ Бжьэнбэхъо Люсе илъэсыбэ хъугъэу адыгэ шъуашэхэр зэришIыхэрэр. Джырэ уахътэ Мыекъуапэ унэе IофшIапIэ къыщызэIуихыгъэу саехэр, цыехэр едых.
Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм икIэлэегъаджэхэу Абрэдж Гощэфыжь, Ирина Рожковар, Хъуажъ Рэмэзан, кIэлэеджакIохэр зэхахьэм хэлэжьагъэх. Адыгэ Республикэм культурэмкIэ и Министерствэ икъулыкъушIэу, тарихъ шIэныгъэхэмкIэ кандидатэу Теуцожь Нуриет изэфэхьысыжьхэм къащыхигъэщыгъ Бжьэнбэхъо Люсе Адыгэ Республикэм и Лъэпкъ театрэ исэнэхьаткIэ зэрэщылэжьагъэр. Опытэу иIэр ныбжьыкIэхэм къафиIотэныр шэнышIу зэрэфэхъугъэр.
КIэлэегъаджэхэм, кIэлэеджакIохэм яупчIэхэм Бжьэнбэхъо Люсе джэуапхэр къаритыжьыгъ. ЗэIукIэгъум пIуныгъэ мэхьанэ иIэу, гум шIукIэ къинэжьынэу кIуагъэ.