Урысыем и Къыблэ шIэныгъэмкIэ ия XIII-рэ фестиваль Мыекъопэ къэралыгъо технологи­ческэ университетым икIэлэегъаджэхэр ыкIи истудентхэр хэлэжьагъэх. Аужырэ илъэсищым Ростов-на-Дону щыкIорэ Iофтхьабзэр мыгъэ Iоныгъом и 24 — 25-м зэхащагъ.

МэфэкI шIыкIэм тетэу ащ икъызэIухын хэлэжьагъэх Рос­тов хэкум зэхэт ыкIи про­фессиональнэ гъэсэныгъэмкIэ ими­нистрэу Андрей Фатеевыр, Ростов-на-Дону и Общественнэ палатэ итхьаматэу Михаил Чернышевыр, Къыблэ феде­ральнэ университетым иректорэу Инна Шевченкэр, нэ­мыкIхэри.

ШIэныгъэм ифестиваль мыгъэ зэрэгъэпсыгъагъэр щыIэныгъэм илъэныкъо анахь шъхьэIищыр джырэ лъэхъаным зэрэзэпхыгъэхэр: «ЧIыопсыр», «ЦIыфыр», «Технологиехэр».

Едзыгъоу «ЧIыопсым» къыдыхэлъытэгъагъэр естественнэ ыкIи физикэ-хьисап шIэныгъэхэм алъэныкъокIэ научнэ-ушэтын гъэхъагъэу яIэхэр къэгъэлъэ­гъогъэнхэр ары. «ЦIыфыр» зы­фиIорэр зыфэгъэхьыгъагъэр гу­манитар ыкIи социальнэ-экономикэ, психологие ыкIи пе­дагогикэ шIэныгъэхэм алъэ­ныкъокIэ ягъэхъагъэхэр ары. Тех­нологическэ едзыгъом архитектурэм ыкIи искусствэм алъэныкъокIэ инженернэ гъэхъа­гъэхэр къыщагъэлъэгъуагъэх.

Аужырэм техническэ шIэныгъэхэмкIэ кандидатэу, доцентэу Сихъу Нэфсэт. «Дегустации без­алкогольных напитков разной функциональной направленности» зыфиIорэм къыдыхэ­лъытагъэу къэкIыхэрэм якъэ­кIуапIэхэм язэгъэшIэнкIэ джырэ шIыкIакIэу агъэфедэхэрэр, узы­мыгъэуташъорэ шъонхэм ягъэхьазырын ащ Iофтхьабзэм къыщигъэлъэгъуагъэх. Фести­валым къекIолIэгъэ хьакIэхэм шъон зэфэшъхьафищ ауплъэкIун амал яIагъ. ХэшIыкI куу а Iофым фызиIэхэм Н. Сихъум ышIыгъэ шъонхэм яIэшIугъэ ха­гъэунэфыкIыгъ.

Джащ фэдэу Мыекъопэ къэралыгъо технологическэ университетым модэмкIэ итеатрэу «К-Star» зыфиIорэр фестивалым исценэ шъхьаIэ къыте­хьагъ. Ащ ипащэр стандартизациемкIэ кафедрэм икIэлэегъаджэу, искусствоведениемкIэ кандидатэу КIэдыкIое Нэфсэт. Лъэпкъ нэшанэр къызыхэщырэ джырэ шъуашэм иколлекциеу «Древо жизни» зыфиIорэр ащ къы-гъэ­хьазырыгъ. Шъуашэхэр студентхэу София Овсянниковам, Ольга Жиляевам, Кристина Ро­машинам, Карина Олейни­ковам къагъэлъэгъуагъэх. Iоф­тхьабзэм итемэ шъхьаIэу мы коллекцием дэгъоу къыриIотыкIыгъ.

Фестивалым хэлэжьагъэхэм ыкIи хьакIэу къекIолIагъэхэм программэ бай къафагъэхьазырыгъ. Ащ хэхьагъэх «Iэнэ хъураехэр», лекциехэр, мастер-­классхэр, зэнэкъокъухэр, викторинэхэр.