Лъэпкъ проектхэм ащыщэу «Экология» зыфиIорэр заштэм про­грам­мэ 11 хагъэхьэгъагъ. ЗэкIэри экологием игъэкъэбзэнрэ икъы­зэте­гъэ­нэнрэ фэгъэхьыгъагъэх. Ахэр 2024-рэ илъэсым нэс агъэцэ­кIэнхэу ары Правительствэм унашъоу ышIыгъагъэр.

Пшъэрылъхэм ащыщхэр зэшIуамыхыгъэхэу щытэп, ау зэ­кIэри илъэситIоу къэнагъэм къыкIоцI зэрамыгъэцэкIэшъущтыри къэнэфагъ. Инэу зизэрар къэкIуагъэр зэпахырэ узэу коронавирусыр ары.

Къихьащт мазэм лъэпкъ про­ектхэм зэкIэми Правительствэм зэхъокIыныгъэхэр афишIынхэу зегъэхьазыры. Ахэм ахэфагъ проектэу «Экологиери».

Вице-премьерэу Виктория Абрамченкэм пэшIорыгъэшъэу къызэриIуагъэмкIэ, лъэпкъ проектым игъэцэкIэн 2030-рэ илъэ­сым нэс лъагъэкIотэщт. Зэхъо­кIыныгъэхэр зыфашIыщтхэр псым, жьым ыкIи пыдзафэхэм афэгъэхьыгъэ програм­мэхэр ары.

Жьым игъэкъэбзэнкIэ пшъэ­дэкIыжь зыхьырэр УФ-м чIы­о­псымкIэ и Министерств ары. Ащ ышIыгъэ уплъэкIунхэм къагъэлъэгъуагъ Урысыем икъэлэ 22-мэ жьэу къащащэрэм изы- тет зэрэдэир, къэлэ 24-мэ гу­мэкIыгъохэр зэряIэр. Нахьыбэу ащ фэдэ къалэхэр зыдэщыIэхэр Сыбыррэ Уралрэ, ахэм нэбгырэ миллиони 10-м ехъу ащэпсэу.

Псым, пыдзафэхэм, мэзхэм ыкIи псыхъохэм афэгъэхьыгъэ программэхэми ягъэцэкIэн къызэтырагъэуцощтэп, ау ацIэхэр зэблахъунхэ алъэ­кIыщт. «Чистая страна» зыфиIорэ проектым илъэситIукIэ ыцIэщтыр «Генеральная уборка», «Жьы къабзэм» игъэцэ­кIэн Росприроднадзорым ыпшъэ ралъхьащт. «Мэзхэм якъэухъу­мэн» зыфиIорэм мэзхэр къызщыкIырэ шъолъырхэм хэхъо­ныгъэ ашIыным фытегъэпсы­хьагъ.

Экологием ылъэныкъокIэ Iофыгъохэм язэшIохын зэрэ­лъагъэкIуатэрэм ишIуагъэ къэ­кIонэу мэгугъэх, хэбзэ ахъщэу ахэм атырагъэкIодэщтым ха­гъэхъощт. (Тикорр.).