Тыгъуасэ Удмуртскэ Республикэм икъалэу Ижевск ия 88-рэ еджапIэ уIэшыгъэу хъулъфыгъэ чIахьи, оныр ригъэжьагъ. ПэшIорыгъэшъэу зэ­ра­гъэунэфыгъэмкIэ, нэбгырэ 15 ыукIыгъ, 21-рэ ыуIагъ.

УкIакIом майкэ шIуцIэ щы­гъыгъ нацистскэ тамыгъэхэр тетхэу, ынэгу къэзымыгъэлъэгъощт паIо щылъэшъогъагъ.

БзэджашIэм ыукIыгъэхэм ащыщэу нэбгырэ 11-р зыныбжь имыкъугъэх, апэрэ классым исыгъэхэри ахэтых, ыуIагъэхэм ащыщэу 14-р кIэлэцIыкIух, къы­тыгъ Следственнэ комитетым. УкIакIом ежьыми зиукIыжьыгъ.

ЕджапIэр къадзыхьагъ, щы­нэгъончъэнымкIэ федеральнэ къулыкъум, Росгвардием ахэтхэм, Урысыем и Следственнэ комитет иследовательхэм, криминалистхэм ыкIи экспертхэм чIыпIэм Iоф щашIэ, псауныгъэр къэухъумэгъэнымкIэ Минис­терствэм илIыкIохэри Ижевск агъэкIуагъэх тхьамыкIагъом хэ­фагъэхэм IэпыIэгъу арагъэгъотынэу.

Уголовнэ Iоф къызэIуахыгъ, ар зэхэзыфыщтыр Следственнэ комитетым игупчэ аппарат.

Следствием зэригъэунэфы­гъэмкIэ, укIакIом мы еджапIэр къыухыгъ, 1988-рэ илъэсым къэ­хъугъ. Iашэ иIэу Росгвар­дием ар щытхыгъэу щытыгъэп, ау психоневрологическэ диспансерым иучет хэтыгъ.

Удмуртием ипащэ хэкIо­да­гъэхэм зыщафэшъыгъощтхэ ма­­фэхэу Iоныгъом и 29-м нэс ыгъэнэфагъ.

Адыгэ Республикэм и ЛIы­шъхьэу КъумпIыл Мурат Адыгеим щыпсэухэрэм ацIэкIэ хэ­кIодагъэхэм яIахьылхэм афэ­тхьаусы­хагъ, шъобж зытещагъэ хъугъэ­хэр псынкIэу зыпкъ иуцожьынхэу афэлъэ­Iуагъ.