Адыгеим къэралыгъо гъэпсыкIэ иIэ зыхъугъэм ия 100-рэ илъэс къыдыхэлъы­та­гъэу Iэнэ хъураеу «Бухгалтер учетымрэ къэралыгъо мылъкум игъэзекIон фэ­гъэхьыгъэ отчетымрэ язэхэщэнкIэ шIыкIэ-амалыкIэу щыIэхэр» зыфиIорэр Iо­ны­гъом и 26-м къыщегъэжьагъэу и 28-м нэс Адыгеим щыкIощт.

Урысые Федерацием финансхэмкIэ и Министерствэ идепартаментхэм япащэхэр, ахэм ягуадзэхэр ыкIи Урысые Федерацием ишъо­лъыр 25-мэ яуплъэкIокIо къулы­къухэм яIэшъхьэтетхэр зэхэсыгъом хэлажьэх.

Зэхэсыгъом зыщатегущы­Iэхэрэр бюджет хэбзэгъэуцугъэм зэхъокIыныгъэхэр фэшIыгъэнхэр, къэралыгъо финанс уплъэкIуным изэхэщэн, правэм ылъэныкъо­кIэ бюджетым епхыгъэ амалхэу щыIэхэр, джащ фэдэу фи­нанс уплъэкIунымкIэ зигъо нэмыкI Iофыгъохэр.

Iофтхьабзэм изэхэщакIохэр ­Адыгэ Республикэм къэралыгъо финанс уплъэкIунымкIэ и ГъэIорышIапIэрэ Адыгэ Республикэм финансхэмкIэ и Министерствэрэ.

Зэхэсыгъор чIыпIитIумэ ащэкIо: Адыгэ Республикэм и Лъэпкъ музееу И. Шъ. Цэим ыцIэкIэ щытым, ыкIи Адыгэ Республикэм и Лъэпкъ музей. Шъугу къэтэгъэкIыжьы: Адыгэ Республикэм и ЛIышъхьэу КъумпIыл Муратрэ Адыгеим ыцIэкIэ депутатэу Урысые Федерацием и Къэралыгъо Думэ щыIэ Владислав Резникрэ яIэпыIэгъу хэлъэу псэолъитIоу зигугъу тшIы­гъэр игъэкIотыгъэу Адыгэ Республикэм щызэтырагъэ­псыхьажьыгъэх.

Зигъо Iофыгъохэм затегущыIэхэрэ нэуж Iэнэ хъураем хэлажьэхэрэр Адыгеим икультурэ, итарихъ ыкIи ихэбзэ-зэхэтыкIэхэм защагъэгъозэн, анахь мэхьанэ зэратырэ чIыпIэхэр зэрагъэлъэгъунхэ алъэкIыщт.