Мыекъопэ авиационнэ клубыр социальнэ мэхьанэ зиIэ проектэу «Адыгеим парашют IэпэIэсэныгъэмкIэ иныбжьыкIэ гупчэ — щыIэныгъэм авиациер къыщыхэхыгъэнымкIэ ныбжьыкIэхэм адэIэпыIэрэ амал» зыфиIорэм ипхырыщынкIэ Президентым игрантэу къыфагъэшъошагъэм ишIуагъэкIэ IофшIэн зэфэшъхьафхэр ыгъэцэкIагъэх. Джы грантым игъэфедэн епхыгъэ IофшIэныр ыкIэм фэкIо.

Адыгеим иныбжьыкIэхэр ошъогум ибыбэнхэмкIэ яхъопсапIэхэр къадэзыгъэхъухэрэр, летнэ, авиационнэ училищхэм ачIэхьанхэмкIэ зыгъасэхэрэр Мыекъопэ аэроклуб закъор ары. Ащ ипащэу Евгений Антошкиным къызэриIуагъэмкIэ, проектым ипшъэрылъэу агъэнэфа­гъэр зэкIэ зэшIуахыгъ. Ахэр анахьэу илъэс 14 — 18 зыныбжь кIэлэ­еджакIохэм ыкIи студентхэм гъэсэныгъэ тедзэ аэроклубым щарагъэгъотыныр, парашют къепкIэхыным тегъэпсыхьэгъэ егъэджэнхэр зэхащэнхэр.

Мыекъуапэ иныбжьыкIэхэм парашютыр гъэфедэгъэнымкIэ программэм тетэу шIэныгъэхэр зэрагъэгъотын амал яIагъ. Ащ фэгъэхьыгъэ Iофтхьабзэхэр мы илъэсым игъэтхапэ къыщегъэ­жьагъэу Iоныгъом нэс кIуагъэх. Классхэм егъэджэн сыхьатхэр зэрэщыряIагъэм имызакъоу, Ессентуки иаэроклуб ащэгъа­гъэх. Ащ юниорхэм яхэшыпыкIыгъэ командэхэм ягъэхьазырынэу кIохэрэм ахэлэжьагъэх.

Парашют спортыр респуб­ликэм щызэлъарагъэшIэным епхыгъэ Iофтхьабзэхэм якIэухыгъэр аэроклубым иIофышIэхэр Мыекъуапэ и Мафэ ихэгъэунэфыкIын зэрэхэлэжьагъэхэр ары. Парашют къепкIэхыным зыз­щыфагъэсэн алъэкIыщтым, ащ епхыгъэ къэбархэр мыщ къыщаIотагъэх.