IофшIэпIэ зэфэшъхьафхэм ялэжьэкIо хьалэлхэу къэралыгъо шIу­хьаф­тынхэмрэ бгъэхалъхьэхэмрэ къызфагъэшъошагъэхэм ащыщ Шэу­джэн районым ит ООО-у «Зарям» имеханизатор IэпэIасэу Сергей Панкрушиныр.

Советскэ лъэхъаныр етыфэ мэкъумэщ хъызмэтшIапIэм сов­хоз щызэхэщэгъагъэр, ащ ­Сергей иныбжьыкIэгъум къыщыублагъэу Iоф щишIагъ, ООО-р зыщызэхащэм иIофшIэн щыпидзэжьыгъ.

Ар «IофшIэным къыфэхъугъэ цIыф» зыфаIорэм фэд. Исэнэ­хьаткIэ (механизатор широкого профиля) я 3-рэ класс иI, тракторнэ бригадэм щэлажьэ.

«Заряр» дэгъукIэ зигугъу ашIырэ хъызмэтшIапIэхэм аха­лъытэзэ къырэкIо. Я 70-рэ илъэсхэм къащегъэжьагъэу мыщ пэщэныгъэ дызезыхьагъэхэу Бэгъэдыр Рэмэзанэ, Шэуджэн Борис, Хьаджэмыкъо Руслъан районым имызакъоу, АдыгеимкIи лэжьыгъэу къахьыжьырэмкIэ пэрытныгъэр аIыгъэу къыры­кIуагъэх. Мы лъэхъаным цIыфхэр зэхэзыщэхэрэр ыкIи зыгъэ­лажьэхэрэр Къэгъэзэжь Му­рат. Лэжьыгъэм икъэхьыжьынкIэ республикэм щызэхащэрэ зэ­нэкъокъухэм текIоныгъэр бэрэ къащыдахы.

IофшIэным къыфэхъугъ

Сергей Панкрушиныр тракторист династиеу обществэм щылажьэхэрэм ащыщ. Техникэм хэшIыкI ин фыриI, IофышIэ пэ­рыт. Зыхэт механизаторхэри ежьым фэдэх, зэгурэIох, зэдэлажьэх, ягубгъохэм лэжьыгъэр ащагъэбагъо.

Джэджэ районым уикIэу Шэуджэн районым узихьэкIэ, апэ щыплъэгъухэрэр ООО-у «Зарям» ишъофхэр ары. Ахэр сыдигъуи къахэщых. Уахътэм елъытыгъэу зэм шIуцIабзэу жъуагъэх, етIанэ бжыхьасэхэр къыхэкIыгъэхэу олъэгъух, бжы­хьэм комбайнэхэм лэжьыгъэр щыIуахыжьы…

ЧIыгур къятэжьы

IофшIэнхэм зэкIэми Сергей Панкрушиныр игуапэу ахэлажьэ. Илъэс 30-у ар губгъом зитым хэт фэдэуи къыгурыIуагъ лэжьыгъэм игъэбэгъон техникэ за­къом зэремыпхыгъэр. ЧIыгур цIыфым къызетэжьырэр ищыкIэгъэ пстэу­ри игъом зыригъэгъотыкIэ ары. Илъэс къэс ар жъохэрэм, пхъэхэрэм, чIыгъэшIур чIыгум езыгъэкIухэрэм ахэт.

ООО-у «Зарям» чIыгу гектар миным ехъу егъэлажьэ. Аужырэ илъэсхэм уахътэм диштэрэ техникэ зэтегъэпсыхьагъэ зэрагъэгъоты, ахэр агъэфедэхэзэ губгъом къыщагъэкIырэ культурэхэм ахагъахъо.

Сергей хъызмэтшIапIэм ичIыгухэм азыныкъо изакъоу ылэ­жьэу хъугъэ. 2018-рэ илъэсым обществэм технологиякIэхэр агъэфедэзэ, гектар пэпчъ коцэу центнер 50,5-рэ, хьэу — 45,6-рэ, натрыфэу — 26,3-рэ, тыгъэ­гъазэу центнер 27,5-рэ къыра­хыжьыгъагъ. КъыкIэлъыкIорэ илъэсым пчъагъэхэм ахагъэ­хъуагъ. Лэжьыгъэхэр зыгъэбэгъуагъэхэм механизаторэу ыкIи водителэу Сергей Панкрушиныр ахэтыгъ, апэ итыгъ пIоми ухэу­къощтэп.

2020-рэ илъэсым ар комбайнэу «Джон-Дир» зыфаIорэм тесэу бжыхьасэу ыкIи тыгъэ­гъазэу лэжьыгъэ тонн 3750-рэ ыIожьыгъ.

Игъэхъагъэхэм къакIэкIуагъ

Сергей иIофшIакIэ осэшIу сыдигъуи фашIыгъ, щытхъу тхылъхэр бэу къыратыгъэх. «Адыгэ Республикэм мэкъумэщ хъызмэтымкIэ иIофышIэ гъэ­шIуагъ» зыфиIорэ цIэ лъапIэр къыфагъэшъошагъ.

Илъэс 30 хъугъэ ащ Iоф зишIэрэр. Зыдэлажьэхэрэми ООО-м испециалистхэми шъхьэ­кIэфэныгъэ къыфашIы. Ипшъэ­рылъхэр щытхъу хэлъэу егъэца­кIэх. ЛэжьэкIошху, цIыфышIу.

Техникэм изытет зэрэлъыплъэрэм, къутагъэу зэрэщимыгъэтырэм, ыIэ зэрэхэлъ зэпытым яхьатыркIэ лэжьыгъэ бэгъуагъэ хъызмэтшIапIэм илъэс къэс къызэрихьыжьырэм иIахь хэлъ.

«Лажьэрэм лыжъ ешхы», — аIо цIыфхэм. ООО-м федэу къыхьырэр зэпхыгъэр илэ­жьа­кIохэм яIофшIакI. «Зарям» амал иIэ хъугъэ ящыкIэгъэ автомобильхэр, комбайнэу «Джон-Дир» зыфаIорэм фэ­дэхэр, нэмыкIэу ящыкIагъэхэр къащэфынхэу. Хьамэр дэгъоу зэтырагъэпсы­хьагъ, лэжьыгъэ лъэпкъыкIэхэм ячылапхъэхэр агъэфедэх, алъа­къо пытэу теуцуагъэх.

ЛэжьэкIо пэрытэу, механиза­тор чанэу, водитель IэпэIасэу Сергей Панкрушиным илъэсыбэ хъугъэу гъэхъэгъэшIухэр ышIыхэзэ зэрэлажьэрэм пае цIэ лъапIэу «Урысые Федерацием мэкъумэщ хъызмэтымкIэ изаслуженнэ IофышI» зыфиIорэр къыфагъэшъошагъ. Шъаукъо Аслъангуащ.