ШIэжьым ивахтэу «Новороссийск-2022-рэ» зыцIэр Iоныгъом и 5-м щегъэжьагъэу и 17-м нэс къушъхьэхэу «Колдун» ыкIи «Сахарная Голова» зыфиIохэрэм ащыкIуагъ. Хэгъэгу зэошхом илъэхъан мы чIыпIэхэм цIыфыбэ ащыфэхыгъ, ахэм лIыхъужъныгъэу зэрахьагъэр непи тщыгъупшэрэп. Мыщ къыдыхэлъытагъэу зэхащэгъэ лъыхъон Iоф­тхьабзэм Урысыем ишъолъыр 41-мэ къарыкIыгъэ хьыкум пристав 200 хэлэжьагъ. Ахэм ащыщыгъ хьыкум приставхэм я Федеральнэ къулыкъу Адыгэ Рес­публикэмкIэ и ГъэIорышIапIэ иIофышIэу Владислав Павловыр. ШIэжь Iофтхьабзэр окIофэ советскэ дзэкIолI 35-мэ яхьэдэ къупшъхьэхэр къагъотыжьыгъэх, Iоныгъом и 17-м ахэр зэрифэшъуашэм тетэу икIэрыкIэу агъэтIылъыжьыгъэх. Хэгъэгу зэошхом тарихъ шъыпкъэу пылъыр къыткIэхъухьэрэ лIэужхэм ашIэнымкIэ, якъэралыгъо шIу алъэгъоу къэтэджынхэмкIэ мыщ фэдэ Iофтхьабзэхэм язэхэщэн мэхьанэшхо зэриIэм щэч хэлъэп. ЗэхэщакIохэм зэрагъэнэфагъэмкIэ, шIэжьым ивахтэ тапэкIи лъагъэкIотэщт. Тхьаркъохъо Адам.